Tvær nýjar sýningar í Listasafni Árnesinga og leiðsögn
Heimkynni og Óþekkt
Tvær sýningar standa nú í Listasafni Árnesinga í Hveragerði, annars vegar grafísksýningin Heimkynni – Sigrid Valtingojer og hins vegar innsetningin Óþekkt – Tinna Ottesen.
Sunnudaginn 7. maí kl. 15 mun Aðalheiður Valgeirsdóttir sýningarstjóri vera með leiðsögn í safninu um sýninguna Heimkynni sem er samstarfsverkefni með Listasafni ASÍ. Sigrid fæddist 1935 en við andlát sitt 2013 hafði hún arfleitt Listasafn ASÍ að öllum verkum sínum, alls um 300, ásamt ýmsum gögnum þeim tengdum og öll verkin á sýningunni utan eitt, sem er í eigu Listasafns Árnesinga, koma úr safneign Listasafns ASÍ. Auk þess að gefa innsýn í ólíkar aðferðir grafíklistar sem var aðalviðfangsefni Sigridar er hér kynntur heimsborgari því hún nam bæði erlendis og hér á landi, sýndi og starfaði víða og hlaut viðurkenningar fyrir list sína. Sem barn, við lok síðari heimsstyrjaldarinnar árið 1945, lifði Sigrid það vera flóttamaður er fjölskylda hennar var svift eignum og rekin brott frá heimkynnum sínum í Súdeta-héruðum Tékkóslóvakíu. Þau flúðu til Thüringen-héraðs Þýskalands og settust að lokum að í Jena sem þá var á sovésku yfirráðasvæði. Í lok ársins 1947 flúði fjölskyldan til Vestur-Þýskalands. Fullorðin valdi Sigrid Ísland sem heimkynni sín, þegar hún settist hér að árið 1961 og skildi hér eftir arfleifð með rætur í evrópskri menningu.
Á sýningunni Óþekkt er gestum boðið að ganga inn í verkið, einn í einu, en verkið er gagnvirk innsetning sem með tímanum tekur breytingum, m.a. vegna ólíkra eiginleika efnanna sem notuð eru í innsetningunni. Í apríl er efniviðurinn aðallega plast, en í maí mun latex taka við. Efni hegða sér á ólíkan hátt og standa líka sem tákn eða tilvísanir í uppruna sinn og áhrif á umhverfið. Innsetningin hverfist einnig um hið háleita sublím, sem nefnt hefur verið ægifegurð á íslensku, sem á rómantíska tímabilinu vísaði til smæð mannsins andspænis ógnarkrafti náttúrunnar en farið er að túlka sem ógnarkraft tæknivæðingarinnar í samtímanum. Er maðurinn hluti af náttúrunni – eða teljum við okkur yfir hana hafin með því að ætla að stjórna öllu – og getum við það? Tinna er fædd árið 1980 og á ættir að rekja til Hveragerðis. Hún er lagði stund á sjónræn samskipti, sviðshönnun og staðbundnar innsetningar bæði í Danmörku og Belgíu. Allt frá árinu 2009 hefur hún unnið með fjölbreyttum hópum skapandi fólks (myndlistarmönnum, leikhúsmönnum, kvikmyndafólki, tónlistarfólki, hönnuðum) að ýmsum verkefnum hér á landi og erlendis, sem mörg hver hafa unnið til viðurkenninga.
Safnið er opið kl. 12-18 alla daga í sumar til enda september. Aðgangur að safninu er ókeypis og allir velkomnir.
Listasafn Árnesinga
Austurmörk 21, 810 Hveragerði
sími: 483 1727