Skipulags- og umhverfisnefnd

Sveinn Jónatansson sendir f.h. Varmár ehf. umsókn um breytingu á deiliskipulagi fyrir lóðirnar Breiðamörk 50 og 52. Deiliskipulag við Varmá, frá Fossaflöt og norður fyrir Friðarstaði var samþykkt í bæjarstjórn 12. maí 2021. Markmið breytingarinnar er að sameina lóðirnar, lagfæra innsláttarvillur ofl. Tölvugerðar þrívíddarmyndir fylgja umsókn. Tillögu að deiliskipulagi vantar sem fylgigagn.

Lögð er fram umsókn Landform ehf. dags.27. nóvember 2024 um breytingu á deiliskipulagi Ás og Grundarsvæðis sem samþykkt var 14. maí 2020 í bæjarstjórn. Markmið breytts deiliskipulags er að tryggja stækkun á fyrirhuguðu hjúkrunarheimili og húsnæði fyrir starfsemi Dvalarheimilisins Áss og Grundar. Þétting byggðar er í samræmi við ákvæði gildandi aðalskipulags.

Allar lóðir innan svæðisins eru í eigu Hveragerðisbæjar en lóðarhafar eru Dvalarheimilið Ás og Grund. Innan reitsins eru þjónustuíbúðir auk húsnæðis fyrir tengda starfsemi s.s. eldhús, samkomuhús o.fl. Til stendur að reisa nýtt um 3.200m² hjúkrunarheimili með 44 gistirýmum. Í gildandi dsk. er gert ráð fyrir að hús nr. 21 og 23 við Hverahlíð víki. Til viðbótar nú, er gert ráð fyrir að hús nr. 17 og 19 víki einnig. Lóðir eru sameinaðar á suðurreit en óbreyttar á norðurreit. Nýtingarhlutfall á suðurreit (Hverahlíð 17) verður 0,6 eins og gildandi aðalskipulag kveður á um. Á norðurreit er það óbreytt, 0,27. Húsakönnun og fornleifaskráning fylgja deiliskipulagsbreytingu. Byggingar sem gert er ráð fyrir að víki eru metnar með miðlungs eða lágt gildi.

Lóð undir spennistöð er að finna á suðurreit.

Noland arkitektar óska f.h. lóðarhafa eftir afstöðu skipulagsyfirvalda til niðurrifs á núverandi 69,4 m2 bílgeymslu og uppbyggingu á nýrri og stærri.

Núverandi útveggir bílgeymslu eru byggðir úr holsteini og halda bæði illa hita og eru með lélega hljóðeinangrun, segir í meðfylgjandi bréfi. Komið er að viðhaldi og vill eigandi frekar rífa skúrinn og byggja nýja 160 m2 bílgeymslu sem stálgrindarhús með yleiningum og hefðbundu timburþaki.

Íbúðarhúsnæðið er skráð 116,6m2 og er lóðin 1.1150m2. Núverandi nýtingarhlutfall er 0,16 en myndi fara við stækkun á bílgeymslunni í 0,24.

Í gildandi aðalskipulagi er svæðið innan íbúðasvæðis ÍB7. Þar segir að svæðið sé fullbyggt að mestu en þó er möguleiki á þéttingu byggðar, einkum á baklóðum, sérbýli 1-2 hæðir, að undangengnu deiliskipulagi en áhersla er lögð á að núverandi götumynd haldist að mestu óbreytt, þar sem trjágróður er áberandi.

Svæðið er undir hverfisvernd í aðalskipulagi. Hverfisverndin felur í sér að varðveita beri byggðamynstur og götumynd reitsins. Ef byggja á við hús eða fjölga þeim, skal það alla jafna gert á baklóðum húsa þannig að það hafi sem minnst áhrif á götumyndina. Einnig er heimilt að skipta lóðum þar sem aðstæður leyfa að undangengnu deiliskipulagi.

Lögð er fram umsögn skipulags- og umhverfisfulltrúa að beiðni Skipulagsstofnunar vegna matsskyldufyrirspurnar Landsnets vegna fyrirhugaðrar lagningar á Þorlákshafnarlínu 2.

Um er að ræða 20,9 km 132 kV jarðstreng sem mun liggja frá Hveragerði til Þorlákshafnar. Jarðstrengur Þorlákshafnarlínu 2 mun liggja frá tengivirki við Hveragerði að nýju tengivirki sem byggt verður við núverandi tengivirki Landsnets norðvestan Þorlákshafnar.

Miðað við fyrirliggjandi gögn og teikningar af fyrirhugaðri legu strengsins um land Hveragerðisbæjar, er ljóst að rask á óröskuðu landi verður hverfandi. Það er því mat Hveragerðisbæjar í umsögninni að ekki sé ástæða til að fara í sérstakt mat á umhverfisáhrifum. Hveragerðisbær tekur í umsögninni undir þau sjónarmið sem Landsnet setur fram í skýrslunni að strengurinn muni liggja nokkuð nálægt friðuðum fornminjum og að taka þurfi sérstakt tillit til þeirra sem og að í hönnun endanlegrar legu verði tekið tillit til mannvirkis skólphreinsistöðvar bæjarins. Mikilvægt er að samráð Landsnets og Hveragerðisbæjar um nákvæma og endanlega legu strengsins í landi bæjarins eigi sér stað.

Að lokum er í umsögninni bent á vilja Hveragerðisbæjar til þess að sjá framhald Þorlákshafnarlínu um Sólborgarsvæði innan bæjarmarka einnig í jörð, sem ítrekað hefur komið fram í fundargerðum Hveragerðisbæjar.

Lagðar eru fram fundargerðir starfshópa og nefnda um íþróttamannvirki. Tvær fundargerðir eru frá starfshópi um íþróttamannvirki og fjórar fundagerðir eru frá fundum bygginganefndar um viðbyggingu við íþróttahús.

Greta Guðnadóttir sendir erindi þann 11. desember s.l. með ósk um nýtt strætóskýli. Segir í erindinu að við framkvæmdir á Tívólíreitnum er aðkoma strætó á allt annan hátt og verri en áður. Óskar hún eftir nýju strætóskýli norðan megin Austurmarkar, þeim megin sem strætó stoppar á leið til Reykjavíkur, og telur að ánægjustig bæjarins muni við það hækka, enda napurt og blautt að bíða í rigningu eftir strætó.

Lagður fram tölvupóstur Atla Arnar Egilssonar frá 17. desember 2024 þar sem hann fagnar lækkuðum hámarkshraða á Þelamörk austan Breiðumarkar, sem skipulags- og umhverfisnefnd lagði til og bæjarstjórn samþykkti á fundi sínum þann 8 október s.l. eftir innsent erindi hans.

Í fyrra erindi lýsti Atli áhyggjum af fótgangandi vegfarendum í nágrenni leikskólans Undralands. Að merkingum sé ábótavant, hraðahindranir hafi lítil áhrif og gangbrautir séu ekki við alla göngustíga. Segir í meðfylgjandi tölvupósti að áhrifin hafi ekki verið eins mikil og búist hefði verið við. Bendir hann á nokkrar leiðir til úrbóta, m.a fleiri skilti, bæta við hraðahindrunum og götumerkingum. Óskar Atli eftir að hægt verði að byrja á að bæta töluvert af skiltum til bráðabirgða á meðan að betri lausnum verði hrint í framkvæmd.

Lögð er fram skipulagslýsing deiliskipulags T.ark arkitekta fyrir land Fagrahvamms og Reykjamarkar.

Tilgangur með gerð skipulagslýsingar er að tryggja aðkomu almennings og

hagsmunaðila að skipulagsferlinu á fyrstu stigum þess, auka gagnsæi og gefa þeim sem koma að ferlinu betri yfirsýn frá fyrstu skrefum. Samkvæmt 1. mgr. 40 gr. skipulagslaga skal sveitarstjórn, áður en vinna við deiliskipulagstillögu hefst, taka saman lýsingu á skipulagsverkefni. Í lýsingu skal koma fram hvaða áherslur sveitarstjórn hafi við skipulagsgerðina, upplýsingar um forsendur, fyrirliggjandi stefnu og fyrirhugað skipulagsferli. Þegar framkvæmdaraðili gerir tillögu

að deiliskipulagi, skal hann vinna lýsingu og leggja fyrir sveitarstjórn til samþykktar áður en hún fer í kynningu, sbr. 5.2.2 gr. skipulagsreglugerðar nr. 90/2013.