Leikskólinn Óskaland er níu deilda leikskóli með pláss fyrir allt að 152 börn og er til húsa að Finnmörk 1.

Leikskólinn tók til starfa 22.febrúar 1994 í leiguhúsnæði við Fljótsmörk 2 og var þar til húsa til ársins 2004 með allt að 20 börn og fimm starfsmenn. Starfssemin flutti í nýbyggt húsnæði að Finnmörk 1, sumarið 2004 og opnaði tvær deildir með allt að 42 börn og 10 – 12 starfsmenn. Húsnæðið var fullbyggt með fjórar deildir haustið 2007 með rými fyrir allt að 92 börn og um 24 starfsmenn.

Á árunum 2019 – 2022 var viðvarndi skortur á leikskólaplássum í Hveragerði og var gripið til þess ráðs að útbúa eina deild í salnum í Óskalandi og ein deild var á flakki um bæinn og fékk aðstöðu bæði í grunnskólanum, íþróttahúsinu, bókasafninu, Bungubrekku og í Óskalandi. Alls voru deildirnar orðnar 6 og starfsmenn áfram 40.

Haustið 2022 hófst undirbúningur að opnun nýrra deilda við leikskólann og voru settar lausar kennslustofur á lóð leikskólans með pláss fyrir 40 börn og 8 starfsmenn. Alls var barnafjöldinn orðinn 117 börn. Í júní byrjun 2023 hófst undirbúningur að viðbyggingu við leikskólann með í raun þremur viðbótardeildum. Á sama tíma hófst undirbúningur að úrbótum á starfsmannaðstöðu. Talsverðar breytingar voru gerðar til að mæta auknum fjölda starfsmanna og fjölgun barna. Einni deild í aðalbyggingunni var breytt í kaffistofu og aðrar breytingar gerðar á húsnæði til að uppfylla nútíma kröfur um aðbúnað starfsfólks.

Á meðan að þessum framkvæmdum stóð þurfti að bregðast við löngum biðlista ungra barna og í ársbyrjun 2025 var opnuð deild í Bungubrekku fyrir yngstu börnin meðan beðið var eftir opnun nýju viðbyggingarinnar. Í júní 2025 opnuðu tvær deildir í viðbyggingunni og yngstu börnin í Bungubrekku fluttu „heim“ haustið 2025 opnuðu hinar tvær deildirnar í viðbyggingunni.

Deildir Óskalands voru orðnar níu og gert ráð fyrir allt að 152 börnum.