Á lóð grunnskólans verður Hjálparsveit skáta með stóra sýningu á björgunartækjum og bílum. Öllum boðið að spreyta sig í kassaklifri og að klífa stóra klifurturninn. Tvö ný söguskilti bætast í söguhringinn um ullarvinnslu við Reykjafoss og um hverasvæðið.
Ljósmyndaklúbburinn Blik verður með ljósmyndasýningu frá garðyrkju- og blómasýningunni "Blóm í bæ" á Hótel Örk. Í Þorlákssetri, húsi eldri borgara, verður sýning á ýmiskonar handverki heimamanna. Einnig verða sýningar í Listasafni Árnesinga og á Bókasafninu.
Bleika hverfið fær grænan lit til viðbótar
Rauða hverfið fær gulan lit til viðbótar
Bláa hverfið fær appelsínugulan lit til viðbótar
Verðlaun verða veitt fyrir fallegustu, frumlegustu og mestu skreytingarnar bæði hjá fyrirtækjum og heimilum. Einnig fá litríkustu bæjarbúarnir viðurkenningu.
Fylgist vel með heimasíðu bæjarins www.hveragerdi.is því dagskráin verður uppfærð reglulega fram að bæjarhátíð.
Jóhanna M. Hjartardóttir
menningar- og frístundafulltrúi
Á fundi bæjarstjórnar þann 28. júní s.l. var lögð fram til kynningar reglugerð um styrk brennisteinsvetnis í andrúmslofti sem sett var af Umhverfisráðherra 1. júní s.l.
Eftirfarandi bókun var samþykkt samhljóða:
Bæjarstjórn Hveragerðisbæjar fagnar nýrri reglugerð um
leyfilegan styrk brennisteinsvetnis í andrúmslofti sem Svandís
Svavarsdóttir umhverfisráðherra hefur nýlega sett.
Með setningu reglugerðarinnar eru ríkir hagsmunir almennings
viðurkenndir og einnig viðurkennt að óvissa ríki um heilsufarsáhrif
af langvarandi innöndun brennisteinsvetnis. Því er nauðsynlegt að
sett séu ákveðin mælanleg mörk þannig að almenningur fái notið
vafans. Með setningu reglugerðarinnar er tryggt að dregið verði
verulega úr losun brennisteinsvetnis frá jarðhitavirkjunum og þar
með mögulegum neikvæðum áhrifum á heilsu fólks.
Á fundi bæjarráðs í gær, fimmtudaginn 1. júlí var tekið til afgreiðslu erindi frá Gunnari Magnússyni f.h. Eden aldingarður.
Í bréfinuer rætt um áætlanir rekstraraðila Edens um að flytja inn þrjá apa frá Þýskalandi og jafnframter óskað eftir stuðningi Hveragerðisbæjar við innflutninginn.
Afgreiðsla bæjarráðs var eftirfarandi:
Bæjarráð lýsir yfir ánægju sinni með metnaðarfull áform nýrra rekstraraðila í Eden. Greinilegt er að þar er nú horft aftur til þess tíma þegar sunnudagsbíltúrarnir voru og hétu. Gríðarlegur fjöldi ferðamanna sótti Hveragerði heim og aparnir í Michelsen og talandi krákan í Eden voru þjóðþekkt. Öll teikn eru uppi um að slíkir tímar séu nú að nýju gengnir í garð. Með hækkandi bensínverði eru styttri ferðalög aftur efst á vinsældalistanum og því fagnar bæjarráð öllum áformum sem styrkt geta ferðaþjónustu í Hveragerði. Bæjarráð felur bæjarstjóra að ræða við bréfritara varðandi nánari útfærslur á hugmyndinni um innflutning þriggja apa til Hveragerðis.
Minningar um apana í Hveragerði hafa lifað með þjóðinni og þó að stundum hafi orðið ruglingur um staðsetningu þeirra þá er ljóst að Hveragerði var staðurinn!
Hér má hlusta á brot úr laginu Aparnir í Eden eftir Baggalút
Íbúar Hveragerðisbæjar eiga miklar þakkir skildar fyrir frábæra þátttöku í Garðyrkju- og blómasýningunni Blóm í bæ sem haldin var um síðast liðna helgi. Garðarnir í bænum skörtuðu sínu fegursta og fjöldi bæjarbúa notaði tækifærið og skreytti innkeyrslur og lóðir með frumlegum hætti í tilefni sýningarinnar.
Fjölmargir innan hins græna geira komu einnig að sýningunni bæði
með ómetanlegu vinnuframlagi og ómældu magni blóma, plantna og
grænmetis sem notað var við skreytingar í bæjarfélaginu.
Á fundi bæjarstjórnar þann 28. júní var eftirfarandi ályktun
samþykkt samhljóða:
Bæjarstjórn vill þakka öllum þeim fjölmörgu sem með einum eða
öðrum hætti komu að undirbúningi og framkvæmd sýningarinnar Blóm í
bæ sem haldin var hér í Hveragerði dagana 25. - 27. júní. Án
samstillts átaks og gríðarlegrar sjálfboðavinnu fjölda aðila hefði
sýningin aldrei orðið jafn vegleg og vel lukkuð og raun varð á.
Fyrir það vill bæjarstjórn þakka af heilum hug.
Við getum öll verið afar ánægð með vel heppnaða sýningu. Mikill mannfjöldi lagði leið sína í bæjarfélagið og gaman var að heyra hversu ánægðir gestir okkar voru. Á ellefu stöðum voru garðar íbúa opnaðir gestum og boðið uppá gómsæta garðasúpa. Almenn ánægja var með það nýjung og ljóst að grænmetissúpan er komin til að vera.
Aldís Hafsteinsdóttir
Bæjarstjóri
Flott myndasíða af Blómum í bæ
Tilkynning Bændablaðsins um Blóm í bæ
Frétt um Blóm í bæ á http://www.natturan.is/frettir/5699/
Verðlaun fyrir fegurstu garða Hveragerðisbæjar árið 2010 voru afhent af formanni mannvirkja og umhverfisnefndar, Guðmundi Þóri Guðjónssyni, á Blóm í bæ um helgina.
Eftirtaldir garðaeigendur hluti verðlaun og munu garðar þeirra
verða til sýnis næstkomandi laugardag milli kl. 13 og 16. Allir
áhugamenn um gróður og garða eru hvattir til að nota þetta tækifæri
og skoða garðana sem hlutu viðurkenningu þetta árið.
Hraunbær 22. Eigendur Sólborg Ósk Valgeirsdóttir og
Sigurður Gísli Gíslason.
Innkeyrslan er hellulögð með upphækkuðum beðum beggja
vegna. Í garðinum er fjölbreytt úrval plantna. Þar er gróðurhús og
leiktæki fyrir börn. Athygli vakti fallegt náttúrugrjót sem er
raðað eftir norður hlið húsins. Garðurinn ber þess glöggt merki að
eigendur hafa mikinn áhuga á garðrækt og er okkur hinum góð
fyrirmynd.
Lyngheiði 26. Eigendur Guðríður Karen Bergkvistsdóttir og
Jón B Guðmundsson.
Hér er um gróskumikinn eldri garð að ræða. Mikill gróður
og fjölbreyttur sem klipptur hefur verið til og snyrtur. Ný
hellulögn liggur inn í bakgarðinn. Garðurinn ber þess vitni að þar
hefur verið nostrað við hvert smáatriði.
Þórsmörk 5. Eigendur Ragnheiður Sigurðardóttir og Finnur
Jóhannsson.
Aðkoman að húsinu er fallega hellulögð. Garðurinn er frekar lítill
en snyrtimennskan er í fyrirrúmi. Einfaldur og stílhreinn í senn,
gott dæmi um fallegan garð við nýlegt hús.
Meðfylgjandi mynd af verðalaunahöfum tók Kjartan Már
Hjálmarsson.
F.v. Guðmundur Þór Guðjónsson, formaður mannvirkja og
umhverfisnefndar Sigurður Gísli Gíslason og Sólborg Ósk
Valgeirsdóttir. Guðríður Karen Bergkvistsdóttir og Jón B
Guðmundsson, Finnur Jóhannesson, Ragnheiður Sigurðardóttir og Aldís
Hafsteinsdóttir, bæjarstjóri.
Nú undir hádegi á öðrum sýningardegi Blóma í bæ hefur sólin brotist fram og nú skín sólin á bæjarbúa og gesti og allt útlit fyrir frábæran góðviðrisdag í bænum. Hiti rúm 15 stig og logn.
Hvað er betra en að heimsækja Hveragerði, skoða stórkostlegar skreytingar í bænum og njóta afurða garðyrkjubænda frá öllu landinu, kíkja í Lystigarðinn og sjá nýja útisvæðið. Njóta góðra veitinga og kíkja síðan í Hveragarðinn í leirfótabað eða í sundlaugina í Laugaskarði.
Eigið yndislegan dag í blómabænum Hveragerði.....
Laugardaginn 26. júní milli kl. 16 og 18 verður garðasúpa í boði á eftirtöldum stöðum í bæjarfélaginu:
Heiðarbrún 16
Breiðumörk 17
Grænumörk 1
Varmahlíð 15
Kambahrauni 10
Bröttuhlíð 4
Laufskógum 40
Frumskógum 9
Valsheiði 6
Lyngheiði 1
Hraunbæ 20
Notið tækifærið og skoðið fallega garða í Hveragerði og gæðið ykkur á gómsætri súpu um leið.
Leitið að merkinu með súpupottinum, það vísar rétta leið !
Garðyrkju og blómasýningin Blóm í bæ var sett við hátíðlega athöfn í gær kl. 16. Við setninguna fjallaði Guðmundur Þór Guðjónsson formaður mannvirkja og umhverfisnefndar um aðdraganda og undirbúning hátíðarinnar um leið og hann þakkaði sérstaklega Elfu Dögg Þórðardóttur, mannvirkja og umhverfisfulltrúa Hveragerðisbæjar fyrir hennar mikla framlag og þá góðu hugmynd að hér skyldi haldin sýning með þessum hætti. Ennfremur fjallaði Guðmundur um einingu græna geirans gagnvart sýningunni og þann aukna sýnileika sem þessi mikilvægi hluti atvinnulífs landsmanna nýtur þessa dagana. Framlag garðyrkjumanna, blómaskreyta og annarra sem að sýningunni koma er ómetanlegt.
Jón Bjarnason, ráðherra sjávarútvegs og landbúnaðar, ávarpaði síðan samkomuna og slíkt hið sama gerði Vilhjálmur Lúðvíksson, formaður Garðyrkjufélags Íslands.
Mikill fjöldi fólks lagði leið sína til Hveragerðis í gær en í dag laugardag er aðaldagskrá sýningarinnar.
Gestir fá afhenta dagskrá um leið og ekið er inní bæjarfélagið. Fólk er hvatt til að leggja bílum sínum utan við aðal sýningarsvæðið og njóta síðan þess sem boðið er uppá á tveimur jafnfljótum.
Veðrið hér í Hveragerði núna í morgunsárið er yndislegt. Logn, milt og léttskýjað.
Fjölmennur hópur vinnur nú að undirbúningi sýningarinnar Blóm í bæ sem hefst formlega á morgun kl. 16.
Í kvöld munu sjálfboðaliðar hittast við lystigarðinn kl. 20 til að leggja lokahönd á útlit bæjarins. Allir velkomnir...
Blómaskreytar leggja nú nótt við nýtan dag til að ljúka skreytingum fyrir sýninguna. Á meðfylgjandi mynd má sjá nokkra sem unnu í dag að skreytingum á miðbæjartorginu.
Hér má líka
lesa skemmtilega frétt um aðstoð sem barst úr óvæntri
átt.
Í máli Gísla Páls Pálssonar, formanns nefndarinnar, kom m.a. fram að Magnús hafi byrjaði að semja lög 16 ára gamall þegar hann var á sjó en fyrsta hljóðfærið með í þeirri sjóferð var þriggja strengja gítar. Hann fluttist til Hveragerðis haustið 2001 ásamt konu sinni og tveimur sonum. Magnús hefur á ferli sínum samið ógrynni góðra laga. Í apríl 2006 samdi Magnús Hveragerðislagið í tilefni af 60 ára afmælis bæjarins. Hann samdi það undir áhrifum af umhverfi bæjarins og ber lagið glöggt þess merki. Frægasta lag Magnúsar er án vafa "Ísland er land þitt" og samdi hann það árið 1981. Textann við það lag samdi Margrét Jónsdóttir árið 1944. Lagið varð ekki vinsælt strax heldur liðu nokkur ár áður en það almennilega sló í gegn meðal landsmanna. Í dag líta margir á þetta lag sem ígildi þjóðsöngs, svo fallegt og þjóðlegt þykir lagið.
Til heiðurs Magnúsi við hátíðahöldin í Laugaskarði fluttu þær Berglind María, Dagný Lísa og Sædís, Ísland er land þitt.
Ágætu bæjarbúar!
Nú er komið að Garðyrkjusýningunni „Blóm í bæ“ sem verður haldin dagana 25.-27. júní n.k. Þetta árið verður lögð áhersla á blómaskreytingar, garðplöntur og 125 ára afmæli Garðyrkjufélags Íslands. Þema sýningarinnar er „Börn og ævintýri“.
Í fyrra tóku íbúar svo sannarlega virkan þátt í sýningunni með sólblómaræktun og skreytingum við hús og eru væntingar til þess að svo verði einnig nú.
Allir taki virkan þátt ...
Íbúar eru hvattir til að taka virkan þátt í sýningunni með því að
skreyta hús sín og garða á frumlegan hátt með blómum. Verðlaun
verða veitt fyrir mest skreytta húsið, best skreytta húsið og
skemmtilegustu skreytinguna. Glæsileg verðlaun eru í boði frá
Garðheimum.
Garðasúpa.
Nokkrir íbúar munu opna garða sína þessa helgi og bjóða gestum upp
á grænmetissúpu sem kostuð er og matreidd fyrirfram. Óskað er eftir
fleiri aðilum til að gera slíkt hið sama. Áhugasamir hafi samband
við skrifstofu Hveragerðisbæjar. Einungis þarf að hafa garðinn
opinn síðdegis á laugardag og því er æskilegast að geta dreift
Garðasúpunni sem víðast um bæinn. Í Hveragerði eru margir fallegir
garðar og grónir sem gestir hefðu gaman af því að skoða.
„Blóm í skóm“...
.. er heiti á þema í keppni um flottustu blómaskreytingarnar í skóm
og stígvélum. Óskað er eftir því að íbúar taki þátt í þeirri keppni
og skreyti skó barna sinna og annarra fjölskyldumeðlima og skili
inn til okkar í samkeppnina fimmtudaginn 24. Júní milli 17 og 19 í
íþróttahúsinu. Glæsileg verðlaun eru í boði frá Garðheimum.
Blómakerið í garðinum...
...er heitið á keppni í sampottun í kerjum. Nota má fjölært,
sumarblóm, kryddjurtir og allt sem grænt getur talist í hvers kyns
potta sem er. Tilvalið er að vanda sig sérstaklega þetta sumarið og
setja flotta samsetningu í ker og sýna gestum sýningarinnar
afraksturinn þessa skemmtilegu helgi. Kerjunum þarf að skila inn í
samkeppnina fimmtudaginn 24. Júní milli 17 og 19 í íþróttahúsinu.
Glæsileg verðlaun eru í boði frá Garðheimum.
Hverfaskógrækt
Nú á að hefja hverfaskógrækt í bæjarfélaginu á hinum ýmsu opnu
svæðum. Markmiðið er að útbúa svæði í íbúðahverfum þar sem
gróðursett verða tré, berjarunnar og fjölæringar. Svæðin eiga að
vera sjálfbær og líkjast sem allra mest náttúrulegum svæðum.
Laugardaginn 26. júní verður fyrsta svæðið vígt, milli Lyngheiðar
og Valsheiðar. Eru íbúar hvattir til að mæta og hjálpa til í um
klukkustund með alla fjölskylduna og taka þannig virkan þátt í að
skapa skóg í bænum okkar. Mæting kl. 10.00. Kakó og skógarkaffi í
boði
Með bestu kveðjum og von um gott samstarf og gott veður.
Kveðja
Elfa D. Þórðardóttir
Mannvirkja- og umhverfisfulltrúi Hveragerðisbæjar
Fjölmargar kvartanir berast nú bæjarskrifstofu vegna ónæðis og
óþæginda sem íbúar verða fyrir vegna ágangs annarra manna
katta.
Af því tilefni er rétt að minna á að í Hveragerði gildir samþykkt
um kattahald sem lesa má í heild sinni hér.
Í samþykktinni segir m.a. í 1. gr: "Samþykkt þessi er gerð til
að stuðla að því að eigendur og umráðamenn katta fari vel með ketti
og tryggi þeim góða vist, sjái til þess að þeir lendi ekki á
flækingi eða valdi nágrönnum óþægindum."
Kettir skuli vera örmerktir og skráðir.
Af gefnu tilefni er rétt að benda á að alla ketti ber að skrá á
skrifstofu skrifstofu Hveragerðisbæjar. Þar fær eigandi kattarins
afhenta númeraða plötu sem setja skal á hálsól kattarins en á henni
kemur fram kemur nafn og númer kattar, heimilisfang og símanúmer
eiganda. Allir kettir skulu bera þessa merkingu.
Þar sem vitað er að margir kettir týna ólum sína bæði fljótt og örugglega er sú skylda einnig lögð á eigenda katta að hver köttur skuli örmerktur eða auðkenndur varanlega með húðflúri í eyra. Skrá skal slíkt merki við skráningu kattarins.
Rétt er að ítreka að það er með öllu óheimilit að halda kött/ketti þar sem enginn býr til dæmis í gróðarstöðvum eða í sumarhúsum.
Einungis 2 kettir á hverju heimili - allir kettir með
bjöllu!
Með skýrum hætti kemur fram í samþykkt um kattahald að á
hverju heimili megi einungis vera 2 kettir. Undanþágu er hægt að fá
frá þessu hámarki sé um ræktun katta að ræða.
Köttum hefur fjölgað í bæjarfélaginu og eigendum þeirra ber rík skylda til að sjá til þess að þeir valdi ekki nágrönnum eða öðrum ónæði, óþrifum eða tjóni. Nú þegar ungar fara að skríða úr eggjum er einnig full ástæða til að minna á að kettir eiga skilyrðislaust að vera með bjöllu og reyna skal að takmarka útiveru katta sem mest á þessum árstíma.
Dýraeftirlitsmaður fangar ketti sem valda
ónæði.
Dýraeftirlitsmaður hefur fangað fjölda katta að undanförnu. Merktum
köttum er komið til skila til eigenda sinna. Aðrir kettir eru
geymdir í dýrageymslu og hafi þeirra ekki verið vitjað innan viku
eru þeir aflífaðir.
Kattaeigendur sem bera hag dýra sinna fyrir brjósti eiga því skilyrðislaust að fara eftir þeim reglum sem gilda um kattahald. Sjá til þess að kötturinn sé skráður og merktur bæði með ól og örmerki. Með öllum tiltækum ráðum ber siðan að leita leiða til að koma í veg fyrir að kötturinn valdi öðrum óþægindum.
Aldís Hafsteinsdóttir
Bæjarstjóri
Eftirfarandi frétt er af www.mbl.is
Á síðasta ári var settur fiskteljari í Varmá í Ölfusi. Til þess að teljarinn virkaði sem skyldi var nauðsynlegt að setja fyrirstöðu í ána, sem beindi allri fiskumferð í gegnum teljararammann. Þar sem nokkur álagengd er í Varmá var ákveðið að útbúa sérstakan álastiga, sem hjálpaði smáálum að komast upp fyrir stíflufyrirstöðuna. Á vef Veiðimálastofnunar kemur fram að állinn hrygnir í sjó, í Saragossahafinu. Lirfurnar berast að stöndum Evrópu en ungviðið leitar á uppeldisstöðvar í fersku vatni. „Álastigar eru vel þekktir erlendis, en ekki er vitað til þess að slíkir stigar hafi verið reyndir hér á landi fyrr. Álastigar eru gjörólíkir hefðbundnum fiskstigum, en taka þarf tillit til sérstakrar líffræði álsins og lakrar sundhæfni hans í straumvatni. Smíði slíkra stiga er einföld, en álastigi getur verið trébretti sem vatnsfilma rennur eftir. Yfirborðið þarf að vera úr hrjúfu efni, þannig að hæfni álsins til að “skríða” eftir yfirborðinu nýtist. Halli slíkra stiga má ekki vera meiri en 40%. Vonast er til þess að stiginn reynist álnum í Varmá vel og hann komist leiðar sinnar framhjá teljarafyrirstöðunni," segir á vef Veiðimálastofnunar.
Skipun undirbúningshóps sem vinna á að stofnun ungmennaráðs í Hveragerði var einróma samþykkt á fyrsta fundi bæjarstjórnar að afloknum kosningum.
Undirbúningshópurinn hafi það hlutverk að gera tillögu að stofnun ungmennaráðs, skilgreina hlutverk þess og samsetningu. Tilgangur ungmennaráðs er að vera bæjarstjórn til ráðgjafar um málefni ungs fólks í Hveragerði.
Bæjarstjórn samþykkti ennfremur að Friðrik Sigurbjörnsson,
Sandra Sigurðardóttir og Sunna Björk Guðmundsdóttir skipi
undirbúningshópinn er ljúka skal störfum fyrir 1. september
nk.
Ný bæjarstjórn Hveragerðisbæjar kom saman til
fyrsta fundar í gær sunnudag.
Í nýafstöðnum kosningum hlaut Sjálfstæðisfélag Hveragerðis 64,4%
atkvæða eða hreinan meirihluta og fimm menn kjörna. A-listinn í
Hveragerði hlaut 35,6% og tvo menn kjörna.
Á fundinum var samþykkt að Aldís Hafsteinsdóttir verði ráðin bæjarstjóri en hún hefur gegnt því embætti undanfarin fjögur ár. Forseti bæjarstjórnar verður Unnur Þormóðsdóttir og varaforseti Ninna Sif Svavarsdóttir. Í bæjarráð voru kosnir þeir Guðmundur Þór Guðjónsson, Eyþór H. Ólafsson og Róbert Hlöðversson. Nýr meirihluti hefur ákveðið að árlega muni bæjarfulltrúar skipta með sér verkum þannig að nýr forseti og nýjir aðilar í bæjarráð verða skipaðir að ári.
Helstu verkefni nýrrar bæjarstjórnar verður að
takast á við erfitt efnahagslegt umhverfi, nýta allar leiðir til að
auka atvinnu á svæðinu um leið og íbúum Hveragerðisbæjar verða
búnar bestu mögulegu aðstæður í fallegu og gróskumiklu
umhverfi.
Á fundinum var ennfremur skipað í nefndir og ráð til næstu fjögurra
ára. Fundargerðina í heild sinni er að finna
hér.
Börnin á Óskalandi mættu galvösk í rigningunni í morgun á opna svæðið við hlið skólans til að gróðursetja tré. Þar biðu þeirra bakkar með greni-, birki- og furutrjám sem rötuðu á góðan stað á flötinni neðan við Óskaland. Deildirnar á leikskólanum eru nefndar eftir þessum trjátegundum en auk þess er þar Reynikot svo nú vantar bara að setja niður nokkur reynitré til að hver deild eigi sinn lund.
Undanfarið hefur verið unnið að umhverfisúrbótum á svæðinu austan við Óskaland. Þar hefur verið gerður hóll sem nýtist sem sleðabrekka á veturna auk þess sem stígar hafa verið lagðir og sáð fyrir blómaengi sem vonandi mun gleðja augu nágranna á næstunni. Með útplöntun dagsins hafa síðan börnin á Óskalandi tekið svæðið í fóstur og með tíð og tíma mun þarna vaxa skemmtilegur skógur sem auka mun gildi svæðisins sem útivistarsvæðis. Á meðfylgjandi myndum má sjá börnin á Óskalandi ásam Jenný, Lindu og Haddý starfsmönnum leikskólans og Elfu Dögg Þórðardóttur, mannvirkja- og umhverfisstjóra Hveragerðisbæjar sem stýrði verkinu af myndarskap.
Sundlaugin Laugaskarði opnar föstudaginn 11. júní næstkomandi eftir miklar viðgerðir á laugarkeri. Í jarðskjálftanum 2008 urðu miklar sprunguskemmdir á laugarkerinu og var lokuð sundlaugin nú í maí til að klára endanlega þá viðgerðavinnu. Verkið gekk mjög vel enda veðurfar hagstætt meira og minna allan verktímann. Ákveðið var að byggja yfir laugarkerið sem flýtti verulega verktímanum. Múrþjónusta Helga Þorsteinssonar sá um framkvæmd verksins.
Af tilefni opnunarinnar hefjast heilsudagar í Hveragerði en
mikil vakning hefur verið hjá bæjarbúum á heilsusamlegum
lifnaðarháttum undanfarið. Fólk á öllum aldri stundar útivist og
hreyfingu og er fjölbreytni þeirrar þjálfunar sem er í boði, í
skipulagðri líkamsrækt fyrir almenning, mikil. Sundlaugin
Laugaskarði er miðdepill þeirrar starfsemi þar sem Líkamsræktin
Laugasport er einnig til húsa.
Hér má sjá dagskrá heilsudaganna.
23 ungmenni og námsmenn starfa hjá Hveragerðisbæ bæði sem flokksstjórar í vinnuskóla og við fegrun grænna svæða. Einnig eru starfsmenn á íþróttavelli, hverasvæði og til aðstoðar á hinum ýmsu sumarnámskeiðum sem eru í boði fyrir börn.
Hveragerðisbær hefur lagt metnað í að sinna sem flestum ungmennum í bænum með vinnu. Meira fjármagn var sett í vinnuskólann sumarið 2010 en undanfarin ár enda hafa aldrei eins margir sótt um störf hjá bæjarfélaginu.
Mörg námskeið eru í gangi núna hjá ungmennum bæjarins og er frístundanámskeið í umsjón Páls Sveinssonar eitt þeirra. Krakkarnir eru í ljósmyndamaraþoni og birtast hér nokkrar myndir sem þau hafa tekið.
Fréttatilkynning frá Hjálparsveit skáta, Hveragerði:
Enn eflist starf Hjálparsveitar skáta í Hveragerði en nú
hefur
Aron Karl Ásgeirsson, félagi í sveitinni, hafið þjálfun á nýjum
leitarhundi. Tíkin heitir Glóð og er af Border collie tegund. Nú
þegar er hafið mikið þjálfunarferli hjá Glóð og eiganda hennar og
og mun það standa næstu árin.
Fyrir hjá sveitinni er leitarhundurinn Morris í eigu Jóhönnu Þ.
Magnúsdóttur. Það er mikil styrkur fólginn í því að fá nú annan
leitarhund á svæðið.
Lárus K. Guðmundsson
formaður HSSH
Götustjórarnir í Laufskógum þeir Birgir, Þórhallur og Guðmundur
héldu velheppnaðan götufund/götugrill sunnudaginn 30. maí sl.
Fundurinn var liður í nágrannavörsluverkefni Hveragerðisbæjar sem
nú er verið að innleiða í öllum hverfum bæjarins. Eins og sést á
meðfylgjandi myndum fjölmenntu íbúar götunnar í grillið, enda var
veður mjög gott og mikill áhugi á verkefninu. Á fundinum ræddu
nágrannarnir samvinnu í eftirlits- og öryggismálum og nánara
fyrirkomulag nágrannavörslunnar.
Nágrannavarslan hefur þegar sannað gildi sitt en einmitt í Laufskógunum upplýstist innbrot í einbýlishús vegna árvekni íbúa í götunni.
Þá er viðgerð og málun á laugarkeri sundlaugarinnar Laugaskarði lokið. Verkið gekk mjög vel enda veðurfar hagstætt meira og minna allan verktímann. Ákveðið var að byggja yfir laugarkerið sem flýtti verulega verktímanum. Múrþjónusta Helga Þorsteinssonar sá um framkvæmd verksins. Á morgun verður hafist handa við að setja dúk á veggi laugarkersins og er áætlað að það taki u.þ.b. 3 daga. Áætlað er að opna sundlaugina föstudaginn 11. júní.
Sandblása þurfti málningu af botni laugarkersins. Fyrirtækið
Berglind ehf sá um verkið.
Daði Sólmundarson og hans menn hjá Kambabrún ehf
sá um málningavinnuna.
Hjalti Helgason, verktaki, ásamt Mikka hjá Ör Tréverk ehf sem sá um að reisa yfirbyggingu yfir laugarkerið.
Laugardaginn 29. maí fóru fram kosningar til bæjarstjórnar í
Hveragerði. Alls kusu 1.336 en á kjörskrá voru 1.671 því var
kjörsókn 80%. Úrslit kosninganna voru eins og hér segir.
Úrslit
A- A listinn í Hveragerði: 445 atkvæði (35,6%) - 2 fulltrúar
D- listi Sjálfstæðisfélags Hveragerðis: 804 atkvæði (64,4%) - 5
fulltrúar.
Þór Ólafur og fjölskylda hans sáu einnig um rekstur tjaldsvæðisins síðastliðið sumar og þá var bryddað uppá ýmsum nýjungum eins og rúnstykkjum á tjaldskörina, skátaleikjum, langeldi og fleiri. Mæltust þessar nýjungar vel fyrir en aðsókn að svæðinu hefur trúlega aldrei verið meiri.
Hópur brunavarða frá Slökkviliði Hveragerðisbæjar hefur undanfarið aðstoðað við þrif á gossvæðínu austur undan Eyjafjallajökli. Hefur hópurinn mest verið að störfum í Vík en þörfin fyrir aðstoð er víða mikil. Hópurinn er í sjálfboðavinnu við þessar aðgerðir en bæjarfélagið hefur lagt fram einn af dælubílum slökkviliðsins til verksins.
Á myndunum má sjá félaga í Slökkviliði Hveragerðis, þá Bergþór, Brynjólf og Steinar fá dygga aðstoð við hreinsunarstörfin í Vík frá frú Dorrit Moussaieff en forsetinn herra Ólafur Ragnar Grímsson fylgist sposkur með álengdar.
Nú nýverið var undirritað samkomulag um hönnun og ráðgjöf vegna
uppsetningar á heilsustígakerfi með upplýsingaskiltum Heilsustíga
ehf í hlíðum Reykjafjalls við Hveragerði. Þetta er fyrsti
Heilsustígurinn á landinu og er hann hugsaður til að bæta lýðheilsu
almennings og aðgengi ferðamanna að spennandi útivistarmöguleikum
með uppsetningu þrek- og æfingastöðva. Með tilkomu Heilsustígsins
teljum við að ferðamenn og almenningur sjái nýja möguleika til
líkamsræktar og munum við tengja upphaf og lok göngustígsins við
Sundlaugina Laugaskarði. Hver æfingastöð samanstendur af æfingum
sem reynir á mismunandi vöðvahópa annaðhvort vöðvaþol eða -styrk.
Æfingarnar henta jafnt þjálfuðum sem og óþjálfuðum einstaklingum.
Upplýsingaskilti um framkvæmd æfinga verða á hverri æfingastöð.
Fyrirhugað er að opna fyrsta áfanga stígsins, 5 stöðvar nú í byrjun
sumars. Íþróttafélagið Hamar mun koma að framkvæmdinni ásamt fleiri
stofnunum og félögum í bænum.
Á myndinni eru Hermann G. Gunnlaugsson, verkefnastjóri, Aldís Hafsteinsdóttir, bæjarstjóri, og Jóhanna M. Hjartardóttir, menningar- og frístundafulltrúi.
Teikningar af viðbyggingu við Grunnskólann í Hveragerði voru lagðar fram til kynningar á fundi bæjarstjórnar sem haldinn var þann 15. maí s.l. Teikningarnar byggja á ítarlegri þarfagreiningu um rýmisþörf skólans sem fjöldi hagsmunaaðila kom að á árunum 2008 - 2009.Starfshópur um stækkun grunnskólans hefur samþykkt teikningarnar fyrir sitt leyti. Í þarfagreiningunni er unnið út frá því að skólinn geti hýst þrjár bekkjardeildir í hverjum árgangi enda kom snemma í ljós að sérgreinastofur geta annað þeim fjölda nemenda. Einnig er skólalóðin sérlega stór og aðgengi gott að íþróttahúsi og sundlaug. Ekki síst skipti það máli að skólinn er staðsettur í bæjarfélaginu miðju sem eykur möguleika á nýtingu hans til muna. Í máli arkitekts kom fram að auðvelt væri að áfangaskipta framkvæmdum þannig að í fyrsta áfanga yrði aðstaða möguneytis bætt, sérkennslurými yrði byggt, sérfræðingar eins og sálfræðingar og heilsugæsluhjúkrunarfræðingar fengju sérútbúnar stofur og auk þess myndu bætast við þrjár kennslustofur. Miðrými myndi einnig aukast þannig að stærri samkomur myndu rúmast betur innan veggja skólans.
Á fund bæjarstjórnar mættu dr. Maggi Jónsson, arkitekt skólans, Guðjón Sigurðsson, skólastjóri og Guðmundur F. Baldursson, skipulags- og byggingafulltrúi.
Á fundinum lagði meirihluti
bæjarstjórnarfram eftirfarandi bókun:
Það er fagnaðarefni að nú skuli áform um viðbyggingu við
grunnskólann loks komin á það stig að arkitekt skilar teikningum að
útliti skólans. Í allri þeirri vinnu sem hér hefur farið fram hefur
verið farið eftir ýtarlegri þarfagreiningu sem unnin var árin
2008-2009 og allir hagsmunaaðilar komu að. Ennfremur hefur hér
verið unnið eftir því markmiði að auðvelt væri að áfangaskipta
framkvæmdinni þannig að hún yrði framkvæmanleg fyrir okkar
sveitarfélag. Hér er komin tillaga sem uppfyllir þær óskir sem
brýnastar voru taldar í fyrsta áfanga, stækkun mötuneytis, aðstöðu
fyrir sérfræðinga, heilsugæslu og stjórnendur, rúmgott
sérkennslurými og 3 kennslustofur. Einnig myndast gott miðrými sem
nýst getur á fjölbreyttan hátt í skólastarfinu. Það er vilji
núverandi meirihluta að stutt verði við gott skólastarf með góðum
ytri ramma því er það okkur kappsmál að búið sé vel að
skólastarfinu. Þessar hugmyndir eru liður í því verki sem brýnt er
að verði framhaldið á komandi kjörtímabili.
Á myndunum má sjá þær viðbyggingar sem fyrirhugaðar eru við Grunnskólann í Hveragerði
Viðbyggingarnar séðar frá íþróttahúsinu. Gert er ráð
fyrir nýjum inngangi við enda fyrsta áfanga.
Horft inn viðbygginguna frá kennarastofunni. Til
hægri sést afgreiðsla mötuneytis og aðstaða sérfræðinga en innan
við þær er sérkennslurými. Á efri hæð er gert ráð fyrir
þremur kennslustofum sem koma í framhaldi af núverandi
stofum.
Horft úr enda viðbyggingar í átt að kennarastofunni,
lyftukassinn sést á miðri mynd. Börnin til vinstri eru að
ganga í átt að sérkennslurýminu sem opnast í átt að
Reykjafjalli.
Leir- og vatnsfótaböð voru formlega opnuð á hverasvæðinu í miðbænum föstudaginn 14. maí að viðstöddu fjölmenni.
Það var Guðmundur Þór Guðjónsson, formaður mannvirkja- og umhverfisnefndar sem formlega kynnti þær endurbætur sem undanfarið hafa verið gerðar á svæðinu. Í máli hans kom eftirfarandi m.a. fram:
Síðustu ár hefur markvisst verið unnið að því að stórbæta alla aðstöðu hér á svæðinu og hefur það tekist vel. Búið er að skipta um öll skilti við hverina, byggja nýjar göngubrýr og svæðið allt tekið í gegn. Þá hefur gróðurskálinn verið lagaður og framandi plöntur gróðursettar. Hér fyrir utan er risið húsnæði fyrir nýju fiðruðu íbúa svæðisins og munu þeir í staðinn gefa til baka egg til suðu.
Hverasvæðið er eitt sinnar tegundar í heiminum og eitt af merkilegri náttúruperlum Suðurlands. Hvergi í heiminum er háhitasvæði að finna í miðjum bæ og byggðin myndast í kringum svæðið. Fyrir tilstuðlan hverasvæðisins urðu Hvergerðingar fyrstir til að virkja jarðvarma til að knýja framleiðsluvélar, gera úr mjólk neysluvöru , til að þvo ull og og til að nýta jarðvarmann til blómaræktar sem bærinn er frægur fyrir. Frumbýlingar bæjarins nýttu sér jarðvarmann til húshitunar og hverina til að þvo þvotta, baka hin gómsætu hverabrauð, sjóða mat og kartöflur og um miðja síðustu öld voru fyrst notuð leirböð til lækninga hér á svæðinu eins og sjá má á myndum hér í skálanum. Í dag gegnir hverasvæðið stóru hlutverki fyrir ferðamannaiðnaðinn í Hveragerði. Á síðasta ári heimsóttu svæðið rúmlega 6000 manns og fyrstu fjóra mánuði þessa árs eru gestir orðnir rétt tæplega 1000. Með þessum breytingum, auknu kynningarstarfi og áframhaldandi uppbyggingu svæðisins gerum við ráð fyrir að fjöldi þeirra sem heimsækja hverasvæðið árlega verði 20-30.000 manns.
Guðmundur notaði einnig tækifærði og þakkaði öllum þeimsem komið hafa að uppbyggingunni, verktökum og starfsmönnum áhaldahúss. Einnig þeim aðilum sem veitt hafa styrki til uppbyggingar á svæðinu Eignarhaldsfélagi Brunabótafélags Íslands og Ferðamálaráði.Sérstakar þakkir fengu þærSigurdís Guðjónsdóttir forstöðumaður Upplýsingarmiðstöðvarinnar og Elfa Dögg Þórðardóttir mannvirkja og umhverfisfulltrúi en hún á hugmyndina að þeirri uppbyggingu sem nú hefur verið hrint í framkvæmd.
Á myndinni hér fyrir neðan má sjá fyrstu gesti leirbaðanna, þær Valdísi Helgu Ágústsdóttur, Sigríði Ágústsdóttur og Írisi Marí Kristrúnardóttur. Þær komu gagnvert frá Reykjavík til að prufa leirinn eftir að hafa lesið umfjöllun dagblaða um þessa nýjung.
Hópur mæðra sem geysist um götur bæjarins með barnavagna og
kerrur hefur vakið athygli bæjarbúa að undanförnu. Þarna er kominn
nýr angi í líkamsræktarflóru bæjarbúa en um er að ræða námskeið á
vegum Rakelar Magnúsdóttur, íþróttakennara, sem heitir Kerrupúl.
Svipuð námskeið eru í gangi í Reykjavík, á Selfossi, Akureyri og
Ísafirði og nú hefur Hveragerði bæst í hópinn. Njóta þessi námskeið
hvarvetna mikilla vinsælda. Eru þau hugsuð fyrir konur (og auðvitað
karla) með lítil börn og eru þátttakendur með krílin sín í vögnum
sínum við æfingarnar. Hér í Hveragerði er yngsta barnið 7 vikna
gömul dama en elsta barnið er tæplega ársgamalt. Vitaskuld er þó
ekkert aldurstakmark í hópnum.
Að sögn þátttakenda gefur Rakel ekkert eftir þrátt fyrir að allir
séu með pínulítil kríli og nýtir hópurinn óspart hið frábæra
umhverfi í Hveragerði við æfingarnar. Skokkað er upp og niður hinar
og þessar brekkur í bænum og notast við ýmsa staði til að gera
æfingar eins og til dæmis leikgrindina undir Hamrinum og
skrúðgarðinn.
Hópurinn hittist á mánudögum, miðvikudögum og föstudögum kl. 10.30
fyrir utan íþróttahúsið og eru allir foreldrar velkomnir í
hópinn.
Eftir æfingarnar er gott að bregða sér á kaffihús !
Göngustígurinn undir Reykjafjalli býður uppá mikla möguleika til líkamsræktar.
Eftirfarandi upplýsingar um kerrupúl eru fengnar að láni af
heimasíðunni www.kerrupul.is
KERRUPÚL er ekki bara göngutúr úti í náttúrunni. Kerrupúl er
alhliða æfingakerfi, frá toppi til táar, fyrir mæður sem vilja
rækta líkama og sál eftir barnsburð. Barnið fær að koma með og
njóta útiverunnar og samverunnar við móður og önnur börn.
Sem mæður sjálfar, vitum við hvað það er mikilvægt að vera í
jafnvægi um leið og við beinum athyglinni að því að rækta líkama og
sál. Stuðningur og samband við aðrar mæður sem eru eins þenkjandi
og með svipaðar áherslur í lífinu, er ómetanlegur.
Kerrupúlstímar eru byggðir upp á upphitun, kraftgöngu og
stöðvaþjálfun. Ef
barnið þitt verður óvært, sýnum við ykkur æfingar sem hægt er að
gera á meðan barnið er róað.
Hvað þarf ég til að mæta í kerrupúlstíma?
* Þegar þú mætir í kerrupúlstíma skalt þú að hafa með þér
vatnsbrúsa, því það er mjög mikilvægt að vökva sig vel, sérstaklega
fyrir mjólkandi mæður!
* Vertu í góðum skóm, hlaupaskór eða góðir gönguskór eru besti
kosturinn, alveg flatbotna íþróttaskór, sem eru ætlaðir til dags
daglegrar nota en ekki til íþróttaiðkunar, geta verið varasamir og
aukið hættu á að þú misstígir þig og meiðir á þér ökklann.
* Góður íþróttabrjóstahaldari er LÍFSNAUÐSYNLEGUR, gjafahaldararnir
halda því miður oftast ekki nógu vel þegar verið er að hreyfa sig
af krafti eins og við gerum í kerrupúlinu!
* Gott er að klæða sig í nokkur lög af fötum því í íslenskri
veðráttu er gott að geta fækkað lögunum eftri því sem manni hitnar
í púlinu, og bætt síðan aftur á sig þegar við stoppum til að
teygja.
33% meira – nú einnig á gjaldsvæði 3 og 4
Reykjavík, 10. maí 2010
Frá og með 19. apríl sl. hefur viðskiptavinum Strætó á höfuðborgarsvæðinu boðist að kaupa 30 daga kort sem gildir í 40 daga. Með því að kaupa 90 daga kort fást 120 dagar og sé keypt 9 mánaða kort gildir það í heilt ár. Tilboðið á við um kort sem keypt eru á vefnum og stendur fram til 15. október nk. Nú hefur verið ákveðið að viðskiptavinir á gjaldsvæðum 3 og 4 njóti þess líka. Þeir viðskiptavinir á svæðum 3 og 4 sem hafa keypt kort á vefnum eftir 19. apríl geta fengið kortið sitt endurútgefið með 33% tilboðinu.
Strætó bs. leitast stöðugt við að bæta þjónustuna við farþega sína og liður í því er að gefa viðskiptavinum kost á hagkvæmum leiðum til að nýta strætó sem ódýran og umhverfisvænan ferðamáta. Tilboðið er fyrst og fremst sett fram til þess að fá fleiri til að nota strætó reglulega og koma til móts við þá sem nú leita leiða til að draga saman útgjöld heimilisins. Um leið er tilboðið hvatning til notenda strætó um að nýta Strætó.is til að kaupa kort, leita sér upplýsinga um leiðakerfið, áætlun vagnanna o.s.frv.
„Við finnum fyrir auknum áhuga hjá almenningi á að nýta sér strætó, því samkvæmt talningum fyrstu þrjá mánuði ársins hefur farþegum í strætó fjölgað umtalsvert miðað við sama tíma í fyrra. Við finnum einnig að margar fjölskyldur hyggjast leggja einum bíl auk þess sem fjölmargir vinnustaðir hafa markað sér þá umhverfisstefnu að bjóða starfsfólki sínu upp á niðurgreiddar og vistvænar almenningssamgöngur í stað þess að leggja dýrmætt land undir bílastæði. Með tilboðinu um 33% lengri gildistíma korta viljum við koma til móts við fólk, auðvelda því að stíga þessi skref og hvetja til aukinnar notkunar á almenningssamgöngum,“ segir Reynir Jónsson, framkvæmdastjóri Strætó bs.
Á vefnum www.straeto.is er einfalt að kaupa kort og leita upplýsinga um leiðakerfi og áætlun Strætó.
Nánari upplýsingar veitir: Reynir Jónsson, framkvæmdastjóri Strætó bs., í síma 540 2700
Eftirtaldir listar verða í kjöri við
bæjarstjórnarkosningar í Hveragerði þann 29. maí
2010
A-listinn í Hveragerði.
1. Róbert Hlöðversson Sviðsstjóri
2. Jóhanna Ýr Jóhannsdóttir BA í guðfræði
3. Njörður Sigurðsson Verkefnastjóri
4. Halldóra Guðlaug Steindórsdóttir Tölvunarfræðingur
5. Steinar Rafn Garðarsson Sjúkraflutningamaður
6. Harpa Björnsdóttir Leikskólakennari
7. Heimir Eyvindarson Leiðbeinandi
8. Guðný Elísabet Ísaksdóttir Stöðvarstjóri
9. Úlfur Björnsson Framhaldsskólakennari
10. Sunna Björk Guðmundsdóttir Leiðbeinandi
11. Garðar Rúnar Árnason Grunnskólakennari
12. Auður Guðbrandsson Eldri borgari
13. Greta Guðnadóttir Fiðluleikari
14. Herdís Þórðardóttir Innkaupastjóri
D-listi Sjálfstæðisfélags Hveragerðis
1. Eyþór H. Ólafsson Verkfræðingur
2. Unnur Þormóðsdóttir Hjúkrunarfræðingur
3. Guðmundur Þór Guðjónsson Fjármálastjóri
4. Aldís Hafsteinsdóttir Bæjarstjóri
5. Ninna Sif Svavarsdóttir Æskulýðsfulltrúi
6. Lárus K. Guðmundsson Slökkviliðsmaður
7. Elínborg Ólafsdóttir Förðunarfræðingur
8. Friðrik Sigurbjörnsson Nemi
9. Hjördís Harpa Guðlaugsdóttir Nemi
10. Hafþór Vilberg Björnsson Verslunarstjóri
11. Ragnhildur Hjartardóttir Hjúkrunarfræðingur
12. Kristín Dagbjartsdóttir Lyfjatæknir
13. Birkir Sveinsson Íþróttakennari
14. Guðrún Magnúsdóttir Fyrrv. læknaritari
Menningar- íþrótta og frísstundasvið Hveragerðisbæjar gefur út
sumarbækling í þriðja sinn þar sem er samantekt um afþreyingu og
námskeið fyrir börn og unglinga. Bæklingurinn verður borinn í
hús bæjarbúa í lok maí en hér er farið yfir það helsta sem er í
boði. Fjölmargar umsóknir bárust í sumarvinnu hjá bænum og er
verið að ganga frá ráðningu í störf flokksstjóra og
sumarafleysingar. Við horfum til þess að geta ráðið inn
fleiri unglinga í sumar því Vinnumálastofnun hefur unnið, í samráði
við Samband íslenskra sveitarfélaga, að mótun verklags vegna
átaksvinnu fyrir námsmenn án bótaréttar og atvinnuleitendur
nú í sumar.
Hveragerðisbær starfrækir vinnuskóla fyrir 14 - 16
ára frá 8. júní - 28. júlí. Áhersla verður á ánægjulegt
starfsumhverfi þar sem gefst kostur á starfskynningu, listasmiðju
(götuleikhúsi) og fjölbreytni í vinnutilhögun.
Skólagarðar og kofasmíði (fyrir 6 - 11 ára) hefja
starfsemi sína mánudaginn 8. júní. Fyrstu dagarnir í
skólagörðunum fara í að gera garðana klára og setja niður útsæði og
grænmeti. Haldin verður uppskeruhátíð í lok sumars. Samhliða
skólagörðum verður kofasmíði. Krakkarnir læra að byggja einfalda
kofa og verður kofabyggðin við hliðana á görðunum.
Gæsluvöllur verður starfræktur í húsnæði Skólasels
Grunnskólans í Hveragerði við Fljótsmörk frá 14. júní - 19. ágúst.
Á gæsluvellinum er gæsla fyrir börn fædd 2003 - 2007.
Frístundanámskeið fyrir 11-13 ára (börn fædd
1997-1999)
Í júní verður boðið upp á tvö frístundanámskeið. Markmiðið er að
bjóða upp á fleiri og fjölbreyttari valmöguleika í námskeiðum fyrir
ungmenni bæjarins. Boðið verður m.a. upp á veiðiferð, safnadag,
stafræna ljósmyndun og matreiðslunámskeið.
Íþróttafélagið Hamar mun standa fyrir fjölbreyttum
námskeiðum.
Íþrótta- og ævintýranámskeið verður fyrir 6 – 12
ára. Mikið er lagt upp úr fjölbreyttri útiveru þar sem börnin
kynnast ýmsum íþróttagreinum. Einnig er farið í stuttar
fjallgöngur, göngu- og hjólaferðir, dag í sveit, sund, ýmsa leiki
og margt fleira skemmtilegt.
Sundnámskeið Sunddeildar Hamars hefst
miðvikudaginn 9. júní og stendur til 25. júní, kennt verður
eftir hádegi. Krakkar fædd 2006 og eldri eru velkominn á
námskeiðið.
(28. júní – 14. júlí verður kennt fyrir hádegi ef næg þáttaka
fæst).
Einnig verður boðið upp á körfuknattleiks- og
knattspyrnunámskeið sem eru ekki alveg tímasett.
Golfleikjanámskeið í Gufudal fyrir 6 - 13 ára
(fædd 1997-2003)
Golfklúbbur Hveragerðis býður upp á golfleikjanámskeið í sumar.
Námskeiðin fara fram á golfvelli klúbbsins í Gufudal. Hvert
námskeið er í 5 skipti frá kl. 9 – 12.
Námskeiðin verða: 8. - 11 júní og 14. - 18. júní.
Hestamannafélagið Ljúfur heldur reiðnámskeið Á
Völlum (Eldhestum) fyrir öll börn frá 5 ára aldri og tilheyra
skólaumhverfi Hveragerðisbæjar.
Námskeiðin verða þrjú 31.maí til 4.júní, 7. til 11. júní og
14. til 19. júní (ekki 17. júní).
Hjálparsveit skáta mun halda útivistarnámskeið
fyrir unglinga mánudaginn 14. júní fyrir 14 - 18 ára.
Listasafn Árnesinga verður með sumarnámskeið fyrir
börn.
Að teikna og reikna í náttúrunni 6.- 8. júlí, kl. 13-15 fyrir 8 –
12 ára.
Bókasafnið í Hveragerði býður upp á sumarlestur
fyrir börn eins og undanfarin sumur, þar sem börnin eru hvött til
að viðhalda lestrarkunnáttunni sem þau hafa öðlast yfir
veturinn. Einnig verður fjölbreytt dagskrá, bókamarkaður
o.fl. í tengslum við hátíðir
bænum.
Nánari upplýsingar gefur menningar- og
frístundafulltrúi í síma 483 4000 jmh@hveragerdi.is
Ársreikningur fyrir árið 2009 var samþykktur í bæjarstjórn Hveragerðisbæjar þann 27. apríl síðastliðinn. Þar sést að rekstur bæjarfélagsins kemur mun betur út heldur en árið 2008 og að niðurstaða ársins 2009 er betri heldur en gert var ráð fyrir í upphafi árs. Má þakka þessa niðurstöðu afbragðs góðri vinnu forstöðumanna og starfsmanna bæjarfélagsins sem allir sem einn hafa lagt sig fram um að hagræða hvar sem það var mögulegt.
Viðsnúningur í rekstri
Í upphafi árs var gert ráð fyrir tapi af rekstri
Hveragerðisbæjar uppá tæpar 137 mkr en niðurstaðan í lok árs er tap
uppá 95 mkr sem er 7% af tekjum. Þarna er viðsnúningur
um rúmlega 41 mkr eða 30% að ræða. Ef litið er
til ársins 2008 hefur rekstur bæjarins batnað um 46% en niðurstaða
ársins 2009 er 82 mkr betri en þá var.
Handbært fé frá rekstri er jákvætt
Heildartekjur bæjarins námu rúmlega 1.363 mkr. og rekstragjöld
rúmum 1.213 mkr. Hagnaður fyrir afskriftir og fjármagnsliði er 150
mkr. Afskriftir voru 57,5 mkr en vextir og verðbætur
námu 187,7 mkr, af því eru 118 mkr vegna verðbóta
eingöngu.
Handbært fé frá rekstri er 43,6 mkr sem er jákvæður viðsnúningur um rúmar 104 mkr frá fyrra ári. Handbært fé frá rekstri segir til um hve mikið stendur eftir þegar allir reikningar hafa verið greiddir eða m.ö.o. það sem rekstur bæjarins skilar til fjárfestinga og greiðslu langtímalána. Það er nokkuð ljóst að reksturinn er ekki að skila nægilega miklu þetta árið til að standa undir afborgunum langtímalána sem nema um 149 mkr og því hefur Hveragerðisbær eins og fjölmörg önnur sveitarfélög þurft að taka lán til að standa straum af afborgunum lána (lengja lánstímann).
Umtalsverðar fjárfestingar á árinu
Á árinu 2009 var farið í umtalsverðar fjárfestingar eða 158
mkr. Þar ber hæst frágang gatna og gangstétta: 67,8
mkr, innlausn Sólborgarsvæðisins: 63,7 mkr og kaup á
"Mjólkurbúinu": 23,4 mkr. Aðrar fjárfestingar voru minni í
sniðum. Afborganir eldri lána námu 150 mkr á árinu og
óhagstæðar skammtímaskuldir voru greiddar niður um 57 mk.
Tekin voru ný langtímalán að upphæð 283 mkr.
Verðbólga eykur skuldir
Heildarskuldir án lífeyrisskuldbindinga nema nú um 1.617 mkr og
hafa hækkað um 182 mkr milli ára. Þar af er skuldaaukning
vegna verðlagsþróunar rúmar 118 mkr. Skuldir á
íbúa nema nú 702 þúsundum sem er mun lægra en íbúar margra
sveitarfélaga búa við í dag. Það er ljóst að verðbólga hefur
haft mikil áhrif á skuldastöðu Hveragerðisbæjar en á undanförnun 4
árum hefur verðbólga numið um 42,5% og hefur það eitt og sér aukið
skuldir bæjarfélagsins um 313 mkr. Í upphafi núverandi
kjörtímabils voru skuldir bæjarins rúmur milljarður á
núvirði. Á tímabilinu hafa skuldirnar aukist um rúmar 600
milljónir á meðan að fjárfest hefur verið fyrir rúman milljarð á
núvirði. Á þessu sést best að skuldir eru tilkomnar vegna
fjárfestinga í varanlegum eignum sem allar eiga það sammerkt að
auka og bæta lífsgæði Hvergerðinga og gera það að verkum að hér
hefur íbúum ekki fækkað svo neinu nemur andstætt því sem er í
mörgum öðrum sveitarfélögum.
Rekstur í traustum skorðum
Það er ljóst að við búum nú við efnahagslegt ástand sem engan gat
órað fyrir. Þrátt fyrir það er rekstur bæjarfélagsins í
traustum skorðum.
Í greinargerð skoðunarmanna kemur fram að Hveragerði sé á margan hátt ágætlega í sveit sett þegar litið er til margra annarra sveitarfélaga. Hér í Hveragerði hafa ekki verið tekin erlend lán undanfarið og tekjur hafa ekki dregist saman, þetta tvennt léttir róðurinn. Það er einlæg von mín að bönd náist á verðbólguna þannig að rekstrargrunnur sveitarfélaga, fyrirtækja og heimila í landinu verði tryggður.
Hveragerðisbær hefur undanfarið notið mjög jákvæðrar umfjöllunar á hinum ýmsu sviðum og fyrir það ber að þakka. Það er bjargföst trú mín að með styrkri stjórn til framtíðar litið þá muni Hvergerðingar standa af sér þann storm sem nú geysar í samfélaginu og bærinn okkar standa enn sterkari eftir.
Aldís Hafsteinsdóttir
Bæjarstjóri Hveragerðisbæjar
Aldursflokkamót HSK í sundi fór fram í blíðskaparverðri í Þorlákshöfn á laugardaginn . Eftir spennandi keppni sigraði Hamar með 132 stigum en lið Selfoss hlaut 129 stig. Sundfólk Hamars stóð sig mjög vel og voru framfarir hjá sundfólkinu miklar.
Úrslit mótsins munu birtast á síðu HSK
Íþrótta – og Ólympíusamband Íslands vekur athygli á að dagana
5.. – 25. maí n.k. mun fræðslu- og hvatningarverkefni ÍSÍ, Ísland á
iði, standa fyrir vinnustaðakeppninni „Hjólað í vinnuna“ í
áttunda sinn. Meginmarkmið Hjólað í vinnuna er að vekja athygli á
hjólreiðum sem heilsusamlegum, hagkvæmum og umhverfisvænum
samgöngumáta. Keppnin er byggð í kringum heimasíðu verkefnisins sem
vistuð er á www.hjoladivinnuna.is. Keppt er í 7
fyrirtækjaflokkum , um flesta daga og flesta km. hlutfallslega
miðað við fjölda starfsmanna í fyrirtækjum. Aðalatriðið að fá sem
flesta með, sem oftast.
Allir þeir sem nýta eigin orku til að ferðast til og frá vinnu s.s.
hjóla eða ganga geta tekið þátt.
Gangi ykkur vel
Það er komin hefð fyrir hátíð í Sundlauginni Laugaskarði á sumardaginn fyrsta. Öllum sundlaugargestum var boðið í sund og þeir sem voru árrisulir fengu morgunkaffi, rúnnstykki og vínarbrauð. Eftir hádegið veittu fulltrúar frá sunddeild Hamars viðurkenningu til þeirra sem syntu 200 m eða meira. Sigurður Einar og Árni Þór skemmtu ungum sem öldnum með gítarspili og söng. Veðrið skartaði sínu fegursta og fóru allir í sumarskapi heim eftir góða sundferð.
Sundlaugin lokar 1. maí vegna viðgerða. Miklar sprunguskemmdir
urðu í laugarkerinu í jarðskjálftanum 2008 og á að gera við
sprungur og mála laugarkerið. Lokað verður fyrir alla starfsemi
fyrst um sinn en fyrirhugað er að opna í líkamsrækt og heita potta
laugardaginn 15. maí.
Sundlaugarkerið verður lokað allan maí mánuð. Nánari framvinda
verður kynnt hér á heimasíðunni.
Á sumardaginn fyrsta rituðu fulltrúar Hveragerðisbæjar og
hagsmunaaðilar "Græna geirans" undir samkomulag um aðkomu að
Garðyrkju- og blómasýningunni "Blóm í bæ" 2010-2011:
Þeir aðilar sem þannig hafa ákveðið að taka þátt í þessari
metnaðarfullu garðyrkju- og blómasýningu eru:
Hveragerðisbær, Landbúnaðarháskóli Íslands
Samband Garðyrkjubænda og þar með Félag Garðplöntuframleiðenda,
Félag Blómaframleiðenda og Félag Grænmetisframleiðenda.
Einnig Félag skrúðgarðyrkjumeistara, Félag íslenskra
landslagsarkitekta, Félag blómaskreyta, Garðyrkjufélag Íslands og
þar með taldir undirklúbbar félagsins,
Blómaskreytingaklúbbur GÍ, Matjurtaklúbbur GÍ og Rósaklúbbur
GÍ. Ennfremur mun fyrirtækin Grænn markaður ehf, Samasem
ehf
og Sölufélag Garðyrkjumanna standa að sýningunni.
Ákveðið hefur verið að sýningin fari fram dagana 24.-27. júní 2010
og 23.-26. júní 2011 í Hveragerði.
Markmið sýningarinnar eru:
1. Skapa vettvang til að sýna framfarir í
garðrækt og efla ræktunarmenningu á lands vísu og fjölbreytni
hugmynda í garðrækt.
2. Að veita sýningagestum tækifæri á skemmtilegri
og fræðandi upplifun
3. Efla samvinnu og metnað fagaðila innan græna
garðyrkjugeirans og styrkja samkeppnisstöðu hans.
4. Efla viðskipti innan græna geirans -
kynna vöru og þjónustu þátttakenda
Samkomulagið felur í sér skuldbindingu þess efnis að hver
þátttakandi komi að sýningunni með þeim hætti sem hann telur
hagsmunum sínum best borgið og vinni jafnframt að markmiðum
sýningarinnar í heild sinni af metnaði sem fagsýningu. Þátttakendur
munu leitast við að auðga sýninguna lífi með skapandi og faglegum
hætti með það fyrir augum að laða að gesti og auka áhuga þeirra á
garðyrkju og framlagi ræktunar til fegrunar umhverfis og bættrar
lýðheilsu - og um leið efla viðskipti með vöru og þjónustu
garðyrkjugeirans.
Það er Hvergerðingum mikið ánægjuefni að finna þann stuðning sem
ríkir við sýninguna Blóm í bæ sem í fyrsta sinn var haldin hér í
Hveragerði sumarið 2009. Var það einróma skoðun þeirra
sem stóðu að sýningunni þá að hún hefði tekist afar vel og verið
mikil lyftistöng og kynning fyrir garðyrkju á Íslandi.
Í máli Aldísar Hafsteinsdóttur, bæjarstjóra, kom fram mikið
þakklæti til þeirra fjölmörgu sem lögðu mikið á sig til
að sýningin yrði að veruleika og ekki síður þakklæti fyrir þá
framsýni og dug sem ákvörðun um framhaldið felur í sér.
Meðfylgjandi mynd er tekin við undirritunina sem fram fór á
Landbúnaðarháskóla Íslands að Reykjum þann 22. apríl sl, eða á
Sumardaginn fyrsta.
Golfklúbbur Hveragerðis hlaut Umhverfisverðlaun Hveragerðisbæjar
2010. Svandís Svavarsdóttir, umhverfisráðherra, afhenti
klúbbnum verðlaunin við hátíðlega athöfn á vorsýningu
Garðyrkjuskólans á Reykjum á sumardaginn fyrsta. Verðlaunin voru
veitt fyrir þá miklu uppbyggingu sem átt hefur sér stað á
Golfvellinum í Gufudal.
„Golfvöllurinn í Gufudal er um margt sérstakur en þar hefur
fjöldi sjálfboðaliða lagt hönd á plóg við uppbyggingu vallarins á
undanförnum árum. Gufudalsvöllur er einn fallegasti golfvöllur
landsins, vel hirtur og fjölbreyttur í landslagi. Hann er líklega
eini golfvöllurinn í heiminum sem státar af hver sem torfæru en
kylfingar á 1. braut verða að slá varlega í kringum hverinn þar,“
sagði ráðherra m.a. við afhendinguna.
Erlingur Arthúrsson, formaður GHG og Hafsteinn Hafsteinsson,
vallarstjóri tóku við verðlaununum, áletruðum steini auk þess fékk
klúbburinn fjallareyni sem verður gróðursettur við golfskála
klúbbsins.
Á meðfylgjandi mynd má sjá Guðmund Þór Guðjónsson, formann mannvirkja- og umhverfisnefndar, Svandísi Svavarsdóttur, ráðherra ásamt þeim Hafsteini og Erlingi.
Fimmtudaginn 22. apríl höldum við sumardaginn
fyrsta hátíðlegan.
Líkt og síðustu ár verður fjölbreytt
dagskrá í tilefni dagsins og allir, Hvergerðingar sem og
gestir, hvattir til að taka þátt í henni.
GLEÐILEGT SUMAR!
Landbúnaðarháskóli Íslands
Opið hús að Reykjum í Ölfusi
22. apríl 2010 kl. 10:00-18:00
Í aðalbyggingu skólans fer fram
Íslandsmeistarakeppni í blómaskreytingum og eru allir velkomnir til
að fylgjast með keppendum að störfum. Sumarið er komið í
garðskálanum og hægt er að heimsækja hitabeltið í bananahúsinu og
potta-plöntusafninu. Verkefni nemenda í skrúðgarðyrkju verða til
sýnis í verknámshúsi. Kaffiveitingar og markaðstorg með
garðyrkjuafurðir.
Kl. 14:00-15:00 verður hátíðardagskrá þar sem afhent verða Garðyrkjuverðlaun og Umhverfisverðlaun Hveragerðisbæjar.
Keppendur vinna tvö verkefni sem eru dæmd út frá því hversu fagmannlega þau eru unnin. Annars vegar undirbúið verkefni, sem að þessu sinni hefur þemað Ísland. Síðara verkið er óundirbúið, keppendur fá þá efni í hendur sem þeir eiga að nýta í ákveðið verkefni. Dómarar í keppninni eru frá Íslandi og Noregi
Allir eru velkomnir til að fylgjast með keppendum að störfum og skoða verkin þegar þau eru tilbúin.
Gestir fá tækifæri til að velja fallegasta verkið á sýningunni.
Á markaðstorgi verður til sölu grænmeti, blóm og trjáplöntur. Okkar landsfræga hnúðkál er tilbúið í sölu, þeir sem hafa hug á að komast yfir það ættu að mæta snemma.
Jarðvegurinn getur verið heitur og öruggast að halda sig á stígnum.
Fundarstjóri: Björgvin Örn Eggertsson
14:00 – 14:05 Setning Guðríður Helgadóttir, staðarhaldari
Reykjum
14:05 – 14:25 Garðyrkjuverðlaun 2010 – Menntamálaráðherra, Katrín
Jakobsdóttir
14:25 – 14:30 Tónlistaratriði – Einar Clausen og Jón Kristófer
Arnarson
14:30 – 14:50 Umhverfisverðlaun Hveragerðis – Umhverfisráðherra,
Svandís Svavarsdóttir
14:50 – 14:55 Tónlistaratriði – Einar Clausen og Jón Kristófer
Arnarson
14:55 – 15:15 Íslandsmeistarakeppni í blómaskreytingum,
verðlaunaafhending
Starfsmenntanám í garðyrkju
Á Reykjum í Ölfusi starfar Starfs– og
endurmenntunardeild landbúnaðarháskólans. Þar er boðið upp á
garðyrkjutengt nám á fjórum brautum: blómaskreytingabraut,
garðplöntuframleiðslu, skógar- og umhverfisbraut og
skrúðgarðyrkjubraut. Einnig er boðið upp á fjölbreytt
endurmenntunarnámskeið bæði fyrir fagfólk og almenning. Hægt er að
hefja nám á þessum brautum nú í haust. Umsóknarfrestur er til 4.
júní 2010.
Þeir sem eru að huga að námi við Landbúnaðarháskólann ættu að koma við í kynningarbás í anddyri skólans. Þar fer fram kynning á námsframboði við skólann hvort sem er á framhalds– eða háskólastigi.
Boðið er upp á fjölda námsleiða sem allar tengjast náttúrunni og nýtingu hennar. Allir sem hafa áhuga á landinu okkar og sambúð manns og náttúru ættu að geta fundið nám við sitt hæfi við LbhÍ.
Ágætu íbúar og gestir !
Með þessum orðum óska ég íbúum og gestum Hveragerðisbæjar gleðilegs sumars.
Bæjarstjóri Hveragerðisbæjar
Ljóð eftir Hvergerðinga verða pottagestum til andlegrar upplyftingar.
Kl. 10 Sundlaugin opnar.
Kl. 13-15 Sunddeild Hamars veitir þeim sundlaugargestum sem synda 200 metra eða meira viðurkenningu fyrir sundið.
Kl. 14 Fjölskylduskemmtun í sundlauginni, Einsi sér um fjörið.
Kl. 17:30 Sundlaugin lokar.
Eftirfarandi frétt birtist í Sunnlenska fréttablaðinu í vikunni:
Brotist var inn í íbúðarhús í Hveragerði klukkan tíu í
gærmorgun. Lögregla telur að þjófarnir hafi beðið fyrir utan þar
til þeir sáu húsráðanda fara til vinnu um morguninn.
Nágranni segist hafa séð grænan Volkswagen Polo með þremur farþegum
við húsið. Sem þátttakandi í svokallaðri nágrannavörslu, verkefni
sem nýverið hóf göngu sína í Hveragerði, tók nágranninn niður
bílnúmerið.
Lögregla segir að bílnúmerið hafi reynst stolið en hefur ákveðna
menn grunaða. Málið er í rannsókn.
Aldis Hafsteinsdóttir, bæjarstjóri sagði aðspurð að það væri
Hvergerðingum sérstakt metnaðarmál að tryggja að bæjarfélagið sé
eins öruggt og nokkur er kostur. Til þess var
nágrannavörsluverkefnið sett upp og hefur það strax sannað gildi
sitt. Unnið er að uppsetningu myndavélanna sem vakta eiga
innkeyrslurnar í bæjarfélagið og verða þær teknar í notkun
fljótlega."
Verið er að leggja lokahönd á framkvæmdir á hverasvæðinu í
miðbænum. En bæjaryfirvöld hafa markað þá stefnu að gera veg
hverasvæðisins enn meiri en nú er og undirstrika þannig þá einstöku
perlu sem þetta svæði er. Hverirnir í og við Hveragerði hafa ávallt
verið hluti að daglegu lífi íbúa og hafa þeir verið nýttir til
ýmissa hluta.
Í árdaga byggðar í Hveragerði lá fólk í leirböðum utandyra á
Hverasvæðinu og til að tengjast þeirri fortíð hefur nú verið komið
upp aðstöðu til fótabaða bæði vatns- og leir, en þeir sem til
þekkja segja að húðin verði afar mjúk eftir böðin á svæðinu. Verið
er að byggja hænsnakofa þar sem landnámshænur munu hafa búsetu í
sumar en eggjasuða í hverunum á svæðinu hefur verið afar vinsæl hjá
innlendum sem erlendum gestum.
Brauðbakstur hefur til fjölda ára verið stundaður af Hvergerðingum
í hverum bæjarins og nú mun sú iðja verða gerð sýnileg almenningi
en daglega mun brauð verða sótt í iður jarðar og geta gestir gætt
sér á hverabrauði með eggjum soðnum á svæðinu.
Móttaka er fyrir ferðamenn í skála við Hveramörk, austast á
hverasvæðinu. Þar er hægt að afla sér margvíslegra upplýsinga um
tilvist jarðhitans, tengsl við örverufræði, jarðfræði, sprungur og
eldvirkni. Auk þess er þar útskýrt hvernig nýting jarðhitans fer
fram, greint frá dýpi borhola, afli sem úr þeim fæst og hvernig það
er nýtt. Þar er einnig að finna ýmiskonar framandi gróður og nú
dafna þar bananaplöntur sem vonandi munu bera ávöxt í sumar.
Hin nýja aðstaða á hverasvæðinu verður formlega opnuð um miðan maí
en í framhaldi af því verður svæðið opið gestum á milli kl.
Hverasvæðið verður opið gestum í sumar kl. 10-18. Aðgangur er
ókeypis en greitt er fyrir eggjasuðu, fótaböð og aðra þjónustu.
Leiðsögn er í boði fyrir hópa ef óskað er eftir því.
Á myndinni hér fyrir ofan má sjá
nefndarmenn í mannvirkja- og umhverfisnefnd gera úttekt á
aðstöðunni.
Almannavarnanefnd Árnessýslu kom saman til fundar kl. 11:00 í
morgun. Á fundinn mætti Ágúst Gunnar Gylfason frá
Almannavarnadeild Ríkislögreglustjóra og var farið yfir stöðuna
vegna goss í Eyjafjallajökli og hugsanlegar afleiðingar af
því í Árnessýslu.
Veðurspá er íbúum Árnessýslu hagstæð en ljóst er að ef vindátt
snýst til austlægra átta mun verða hætta á öskufalli í
sýslunni. Áhrif öskufalls eru margvísleg og verður
farið yfir þau hér á eftir.
Greint var frá því í fréttum í gær að rykgrímum hafi verið dreift á
heilsugæslustöðvar. Þar getur almenningur nálgast þær ef þörf
er á. Rykgrímur sem notaðar eru í byggingariðnaði og fást í
byggingavöruverslunum gera sama gagn og eins má vel bjarga sér með
því að setja bara klút fyrir vitin. Öndunargrímur þarf
einungis að nota utanhúss þar sem öskufalls gætir.
Vatnsveitur í sýslunni eru vel búnar og kerfi þeirra
lokuð. Því er ekki talin hætta á að drykkjarvatn
spillist. Hafi einhverjir komið sér upp einkaveitu t.d. við
sumarhús þarf að hafa í huga hvort aska geti borist í
hana. Upplýsingar og leiðbeiningar um vatnsveitur geta
menn fengið hjá Heilbrigðiseftirliti Suðurlands.
Áhrif á heilsu fólks:
Aska er samsett úr fínum ögnum og stærri ögnum. Vindátt og aðrar
aðstæður ráða því hvar hún fellur. Gosaska getur einnig
haft áhrif á fólk en helstu einkenni eru frá:
Öndunarfærum:
Nefrennsli og erting í nefi
Særindi í hálsi og hósti
Fólk sem þjáist af lungnasjúkdómum, t.d. astma, getur fengið
berkjubólgur sem varar í marga daga og lýsa sér í hósta,
uppgangi og öndunarerfiðleikum
Augum:
Gosaska getur ert augu einkum ef augnlinsur eru notaðar. Helstu
einkenni eru:
Tilfinning um aðskotahlut
Augnsærindi, kláði, blóðhlaupin augu
Útferð og tárarennsli
Skrámur á sjónhimnu
Bráð augnbólga, ljósfælni
Ráðleggingar til fólks þar sem öskufalls gætir:
Nota öndunarfæragrímur utanhúss. Æskilegt að nota hlífðarföt.
Séu öndunarfæragrímur ekki tiltækar má nota vasaklút eða annan
klæðnað sem heldur stærri ögnum frá
Ráðlagt að nota hlífðargleraugu
Börn og fullorðnir með öndunarfærasjúkdóma skyldi halda sig
innanhúss
Atriði er varða búfjárhald:
Öskufall:
Forða skepnum undan öskufalli. Hýsa þær eða flytja annað ef
mögulegt er.
Tryggja skepnum hreint drykkjarvatn. Kanna ástand vatnsbóla
og sjá til þess að yfirborðsvatn berist ekki í þau. Hafa rennandi
vatn hjá skepnum á útigangi.
Gefa skepnum á útigangi gott og mikið fóður, tryggja þeim aðgang að
saltsteinum og halda þeim frá beit eins og kostur er. Gera
ráðstafanir til að koma í veg fyrir að aska falli á
fóðrið.
Tryggja eftir föngum að aska berist ekki inn í gripahús.
Sama gildir um gæludýr og aðrar skepnur að mikilvægast er að
forða því að þau drekki úr stöðnu vatni og halda þeim sem mest
innandyra.
Flóðahætta:
Meta aðstæður og ákveða hvort skepnum sé betur borgið innanhúss eða
utan.
Tryggja eftir því sem kostur er að skepnur á útigangi geti forðað
sér undan flóði.
Slys eða sjúkdómar:
Hafa samband við dýralækni ef skepnur slasast eða verða veikar.
Reynt er að tryggja að dýralæknar komist þangað sem nauðsyn
krefur.
Loftræsting húsa / vinnustaða /
stofnana:
Huga þarf að loftræstikerfum húsa / stofnana en síur í slíkum
kerfum kunna að stíflast mjög fljótt ef aska er í því lofti sem
tekið er inn.
Áhrif á vélar:
Aska í lofti sest eðlilega í loftinntök bílvéla. Hægt
er að ryksuga úr loftsíum þeirra en huga þarf að því að skipta um
síu ef það dugar ekki. Fari aska inn á bílvél getur hún
valdið tjóni á vélinni.
Upplýsingar til almennings eru reglulega settar inn á heimasíðu
almannavarnadeildar ríkislögreglustjóra. Sama á við um
heimasíðu Embættis sóttvarnarlæknis, síðu Matvælastofnunar og síðu
Heilbrigðiseftirlits Suðurlands. Fólki er ráðlagt að leita
sér upplýsinga þar ef spurningar vakna.
http://www.almannavarnir.is
http://www.mast.is/index.aspx?GroupId=505&TabId=511&NewsItemID=2312&ModulesTabsId=919
http://www.heilbrigdiseftirlitid.is/
Veðurstofa Íslands heldur utan um upplýsingar um gang gossins á
heimasíðu sinni.
http://www.heilbrigdiseftirlitid.is/
Oddaleikur KR og Hamars í úrslitum Iceland Express deildar kvenna sem leikinn verður í DHL-höllinni, heimavelli KR, í kvöld klukkan 19:15 verður sýndur í beinni útsendingu á sporttv.is. Útsendingin hefst kl. 19 með viðtölum við leikmenn og þjálfara þannig að þeir sem ekki komast til Reykjavíkur geta fylgst með þar.
Þegar bikarinn kemur austur þá tökum við á móti stelpunum við hringtorgið og fögnum á Hoflandsetrinu í kvöld.
Áfram Hamar !
Það er Pétur Guðmundsson, afbrotafræðingur, sem í samvinnu við lögregluna í Árnessýslu stýrði upphafi verkefnisins sem fyrst og fremst byggir á því að fólk fylgist með eigum og heimilum hvers annars. "Afskiptasemi og athygli er það sem öllu skiptir þegar koma á í veg fyrir afbrot og þetta er oft einfaldara að innleiða í smærri bæjarfélögum þar sem allir þekkja alla" sagði Pétur Guðmundsson.
Í máli Aldísar Hafsteinsdóttur, bæjarstjóra kom fram að stefnt væri markvisst að því að gera Hveragerði að öruggasta bæjarfélagi landsins. "Undirbúningur að uppsetningu öryggismyndavéla við innkeyrslurnar í bæjarfélagið er nú á lokastigi, farandgæsla á vegum Securitas er í bæjarfélaginu og þegar virk nágrannavarsla bætist síðan við í öllum hverfum bæjarins þá erum við komin langt á þeirri vegferð að gera Hveragerði að einu öruggasta bæjarfélagi landsins."
Úrslit í Stærðfræðikeppni Suðurlands voru kynnt í gær og átti
Grunnskólinn í Hveragerði tvo keppendur í vinningssætum.
Karolína Ursula Guðnason í 8. bekk sigraði í sínum árgangi og er
fyrsti handhafi nýs bikars frá Kjörís, en gamli bikarinn var orðinn
fullskrifaður þetta árið. Gaman að nýi bikarinn skyldi lenda hjá
heimamanni í fyrstu atrennu. Með Karólínu á myndinni eru Ólafur
Bjarnason umsjónarmaður keppninnar, Sigurður Blöndal kennari og
Sigurlaugur Gíslason frá Íslandsbanka.
Eyþór Heimisson í 10. bekk varð í þriðja sæti í sínum árgangi. Á myndinni með Eyþóri eru Heimir Eyvindarson kennari og Sigurlaugur.
Við óskum Karolínu og Eyþóri innilega til hamingju með þennan
frábæra árangur.
Hamar tryggði sér í kvöld sæti í úrslitarimmu Iceland Express
deildar kvenna eftir sigur á Keflavík í oddaleik liðanna. Þetta er
í fyrsta sinn í sögu Körfuknattleiksdeildar Hamars sem félagið á
lið í lokaúrslitum meistaraflokks. Frábær árangur hjá stelpunum.
Lokatölur voru 93 - 81 og var Julia Demirer með hvorki meira né
minna en 39 stig og 18 fráköst. Hjá Keflavík var það Birna Valgarðs
sem var atkvæðamest með 28 stig. Úrslitaleikirnir verða á móti KR
og verða leikjadagarnir eftirfarandi:
Leikur 1 - Föstudagur 26. mars kl. 19.15 í DHL-höllinni
Leikur 2 - Mánudagur 29. mars kl. 19.15 í
Hveragerði/Toyota-höllin
Leikur 3 - Miðvikudagur 31. mars kl. 19.15 í DHL-höllinni
Leikur 4 - Laugardagur 3. apríl kl. 16.00 í
Hveragerði/Toyota-höllin EF ÞARF
Leikur 5 - Þriðjudagur 6. apríl kl. 19.15 í DHL-höllin EF ÞARF
Fjölmennum og hvetjum stúlkurnar í úrslitakeppninni um
Íslandsmeistaratitilinn !
Þriðjudaginn 23. mars kl. 20 „Bláa hverfið“
Þriðjudaginn 23. mars kl. 12 „Fyrirtæki og stofnanir“
Miðvikudagurinn 24. mars kl. 18 „Bleika hverfið“
Miðvikudagurinn 24. mars kl. 20 „Rauða hverfið“
Fjölmennum og tökum þátt í að gera Hveragerði að enn betra
bæjarfélagi.
Nokkrir sundmenn syntu til heiðurs Guðlaugi Friðþjófssyni og áhöfn Helliseyjar VE 503, föstudaginn 12. mars síðastliðinn. Guðlaugur er hetja sem aldrei gleymist en hann synti til lands þegar báturinn sem hann var skipverji á, fórst suður af Vestmannaeyjumum um 3 sjómílur (5,7 km) frá landi árið 1984. Guðlaugur sem var tuttugu og þriggja ára gamall synti til lands í 6° C heitum og úfnum sjónum. Í nokkur ár hafa sundmenn í sundlauginni Laugaskarði synt til minningar um þetta mikla afrek Guðlaugs.
Sundið í ár tókst mjög vel og var veður gott. Elsti sundmaðurinn
sem synti fullt sund að þessu sinni var Páll G. Sigurþórsson 73 ára
en 7 sundmenn kláruðu heilt Guðlaugssund 6 km en nokkrir fóru hálft
sund. Morgungestir syntu samanlagt um 6,6 km.
Drengir í 11. flokki Þórs/Hamars í körfubolta unnu sæti í
undanúrslitum Íslandsmótsins um liðna helgi er 4. umferð fór fram í
Njarðvík. Liðin í A riðli 11. flokks hafa verið mjög jöfn í vetur
og voru þrjú lið jöfn þegar síðasti leikur Þórs/Hamars og
Keflavíkur fór fram á sunnudag. Lið Þórs/Hamars vann mikilvægan 11
stiga sigur á Keflavík 69 - 58 og enduðu þeir í 3. sæti en fjögur
efstu lið 4. umferðar komast í úrslitakeppnina sem verður haldin
23. - 25. apríl.
Lokastaðan fyrir úrslitakeppnina:
1. KR
2. Breiðablik
3. Þór/Hamar
4. Njarðvík
Starfsfólk Sundlaugarinnar Laugaskarði náði að verja titil frá síðasta ári í Lífshlaupinu en þau voru í fyrsta sæti með mesta dagafjölda í hreyfingu. Þau kepptu í flokki fyrirtækja með 3 - 9 starfsmenn. Þau voru í þriðja sæti með fjölda mínútna í hreyfingu á mann en þar bar af öðrum Sigurgeir Guðmundsson en hann var með 4430 hreyfimínútur á 21 degi.
Frábær árangur hjá þeim öllum og óskum við þeim til hamingju.
Aftari röð: Einar, Sighvatur, Hildigunnur og Steinar. Fremri röð: Sigurgeir, Ólöf, Rúna og Arnfríður
Sigurgeir fékk viðurkenningu fyrir flestar
hreyfistundir á dag en hann bætti sig um 1173 mín. frá síðasta
ári.
Það er Sunnlendingum öllum mikið fagnaðarefni að nú skuli vera
búið að bjóða út tvöföldun Suðurlandsvegar milli Lögbergsbrekku og
Litlu kaffistofunnar, eða 6,5 km kafli. Framkvæmdir munu
hefjast í vor og er óhætt að fullyrða að með þessum vegbótum sé
stigið stórt skref í átt að tvöföldum Suðurlandsvegi alla leið
austur fyrir Selfoss.
Hér fyrir neðan má lesa fréttina sem birtist á vísir.is um
málið.
Fyrsta stóra útboð í vegagerð í heilt ár
Kristján Már Unnarsson skrifar:
Vegagerðin hefur boðið út tvöföldun Suðurlandsvegar við Sandskeið.
Þetta er fyrsta stóra útboðið í vegagerð hérlendis í nærri heilt
ár.
Boðinn er út 6,5 kílómetra kafli milli Lögbergsbrekku og Litlu
Kaffistofunnar og verða tilboð opnuð þann 20. apríl. Þetta er
fyrsta stóra verkið sem Vegagerðin býður út frá því smíði nýrrar
Hvítárbrúar í Árnessýslu var boðin út í mars í fyrra en eftir það
settu stjórnvöld á framkvæmdastopp vegna fjárskorts og útboðum
stærri nýframkvæmda var frestað.
Áætlað er að tvöföldun kaflans um Sandskeið kosti um einn og hálfan
milljarð króna en Hreinn Haraldsson vegamálastjóri segir í
Framkvæmdafréttum Vegagerðarinnar að fjármunirnir fáist með því að
yfirfæra hluta innistæðu, sem var fyrir hendi í árslok 2008, til
ársins 2010. Með sömu innistæðu á einnig að bjóða út í næsta mánuði
tvöföldun Vesturlandsvegar í Mosfellsbæ, en það er verk upp á 500
milljónir króna.
Vinna við bæði þessi verk ætti að vera komin á fullt í byrjun
sumars, og taka rúmt ár, en verklok eru áætluð haustið 2011.
Aldís Hafsteinsdóttir
Bæjarstjóri
Ef að þú átt gamlar myndir úr bæjarlífinu væri gaman að fá þær að láni til skönnunar. Við tökum við myndum á bæjarskrifstofunni í umslögum merktum eigenda og símanúmeri. Að lokinni skönnun verður myndunum skilað til eigenda.
Ungmennafélag Íslands hefur ákveðið að gefa verkefnum á sviði
almenningsíþrótta enn meira vægi í starfsemi félagsins með
það að markmiði að vekja fólk til umhugsunar um mikilvægi
hreyfingar og hollra lifnaðarhátta.
Eitt verkefna UMFÍ á sviði almenningsíþrótta er verkefnið
,,ganga.is“. Á vefnum ganga.is gefur að líta ýmsan fróðleik um hvað
beri að hafa í huga þegar farið er af staði í gönguferð eða
fjallgöngu. Á vefnum má finna fjölda stuttra og langra gönguleiða
um allt land sem og upplýsingar um þau fjöll sem sambandsaðilar
mæla sérstaklega með að þátttakendur í verkefninu ,,Fjölskyldan á
fjallið“ gangi upp á. Lagt er upp með að fjölskyldan hreyfi sig
saman í fallegri náttúru. Inn á vefnum ganga.is er einnig hægt að
finna upplýsingar um helstu sundlaugar og golfvelli landsins sem
gefur góða yfirsýn yfir þá þjónustu sem er fyrir hendi á hverjum
stað.
Til að hvetja fólk enn frekar til aukinnar hreyfingar hefur
verkefninu ,,Hættu að hanga! Komdu að synda, hjóla eða
ganga!“, verið ýtt úr vör. Þátttakendur skrá þá hreyfingu
sem þeir kjósa að iðka hverju sinni á gönguvefinn og geta átt
möguleika á veglegum viðurkenningum og verðlaunum fyrir góða
þátttöku. Nánari upplýsingar um verkefnið verða að finna á vefnum
ganga.is en verkefnið hefst í lok maí og stendur í 103 daga.
Verkefni UMFÍ hljómar vel við fyrirhugaða heilsudaga,
Heilsuþristinn - hreyfing, heilsa og hamingja, sem
verða í Hveragerði 10. - 13. júní næstkomandi. En það
er þríþraut þar sem almenningur gengur/skokkar, syndir eða hjólar
sér til heilsubótar. Nánari upplýsingar um heilsudagana koma
síðar.
Nú er langþráðri forritunarvinnu lokið og búið er að opna tengil inná heimasíðu Heibrigðiseftirlits Suðurlands þar sem nú birtast raunmælingar frá loftmælistöðvunum í Hveragerði og í Norðlingaholti.
Það er Orkuveita Reykjavíkur sem sá um uppsetningu
mælistöðvanna.
Á stöðvunum er mælt magn brennisteinsvetnis (H2S) og brennisteinsdíoxiðs (SO2) í andrúmslofti en einnig má finna þar veðurfarslegar mælingar eins og hitastig, úrkomu og vindátt. Mælirinn hér í Hveragerði er staðsettur við Finnmörk.
Hér má sjá sólarhringsmeðaltal hvers dags ásamt klukkustundarmeðaltali.
Innan skamms verður settur tengill hér á forsíðu þar sem íbúar
geta á auðveldan hátt nálgast þessar upplýsingar.
Elfa D. Þórðardóttir.
Hamar/Þór varð bikarmeistari í unglingaflokki karla í körfuknattleik eftir sigur á Njarðvík 61 – 60. Leikurinn var jafn og spennandi og var sigurinn því sætur. Oddur Ólafsson var útnefndur maður leiksins með 18 stig, 4 stoðsendingar og 4 stolna bolta en næstur honum var Páll Helgason með 12 stig og 6 fráköst. Þeir Ragnar, Baldur Þór og Bjarni Rúnar áttu einnig fínar rispur í liði Hamars/Þórs.
Drengjaflokkur Hamars/Þórs varð að sætta sig við 2. sætið eftir hörku viðureign við sameiginlegt lið Snæfells og Skallagríms. Lokatölur voru 78 – 80 Snæfell/Skallagrím í vil. Hjalti Valur Þorsteinsson var með 22 stig, Oddur Ólafsson með 18 stig og Þorsteinn Már Ragnarsson með 16 stig.
Þriðja lið Þórs/Hamars í úrslitum bikarkeppninnar var 9. flokkur drengja. Þeir komu öllum á óvart með sínum leik en þeir töpuðu naumlega fyrir KR 62 – 63 og lentu í öðru sæti. Erlendur Ágúst Stefánsson var stigahæsti leikmaðurinn með 21 stig, Halldór Garðar Hermannsson var með 18 stig. Sighvatur Bjarkason átti einnig góðan leik en hann tók 11 fráköst.
Sjá
fréttir og myndir á heimasíðu KKÍ
Með samþykkt þriggja ára fjárhagsáætlunar fyrir árin 2011-2013 er uppfyllt lagaskylda sveitarfélagsins auk þess sem mörkuð er eins raunhæf áætlun til næstu ára og nokkur er kostur. Vafaatriðin í hinu ytra umhverfi Hveragerðisbæjar hafa aldrei verið jafn mörg og mikil eins og nú og því er ljóst að þær áætlanir sem hér er lagt upp með geta og munu taka breytingum við gerð fjárhagsáætlana fyrir hvert einstakt ár. Þó er það von bæjarstjórnar að með þessum áætlunum sé markaður sá stígur sem bæjarfélaginu er farsælast að feta næstu árin.
Til að hægt sé að reikna út fjárhagslega stöðu sveitarfélagsins næstu þrjú ár hafa ákveðnar forsendur verið lagðar til grundvallar. Þó er ljóst að þær geta hæglega breyst þegar líður á tímabilið enda verða þær endurskoðaðar árlega við fjárhagsáætlunargerð. Gert er ráð fyrir óbreyttum rekstri á tímabilinu. Þrátt fyrir að yfirfærsla málefna fatlaðra og jafnvel annarra málaflokka verði að veruleika er ekki gert ráð fyrir kostnaði vegna þessa í áætluninni enda yrðu nettó áhrifin á rekstur bæjarins væntanlega lítil þar sem framlag kemur frá ríki til rekstursins. Gert er ráð fyrir hóflegri hækkun skatttekna eða um 3% á ári. Gert er ráð fyrir að aðrar tekjur sveitarfélagsins aukist til samræmis við vænta verðlagsþróun eða um 2% á ári. Framkvæmdum verður haldið í lágmarki næstu tvö ár í þeirri von að það sjái til sólar fljótlega í íslensku efnahagslífi og að þá muni hjól efnahagslífsins taka að snúast enn á ný. Þó standa vonir til að hægt verði að klára frágang eldri gatna, bæta íþróttaaðstöðu og hyggja að viðbyggingu við grunnskólann auk smærri verkefna. Fjárfestingaáætlun er endurskoðuð við fjárhagsáætlunargerð hvers árs í ljósi þess efnahagslega umhverfis sem ríkir á hverjum tíma.
Við áætlunargerðina var gerð ráð fyrir að skuldum bæjarfélagsins
yrði haldið innan þess ramma sem raunhæfur getur talist og að
rekstrarniðurstaða sé jákvæð. Eigið fé bæjarfélagsins mun þar
af leiðandi aukast á tímabilinu.
Lögð er áhersla á góða grunnþjónustu og að standa vörð um störfin
enda er Hveragerðisbær fjölmennasti vinnustaður bæjarins. Áfram
verður haldið vel utan um allt starf sem snýr að börnum og
ungmennum og áhersla lögð á gott skólastarf, hér eftir sem hingað
til. Þriggja ára áætlun byggir á forsendum rekstrar áranna 2010 og
2009 og því er byggt á grunni sem hér hefur þegar verið
lagður.
Þrátt fyrir þá miklu óvissu sem enn ríkir varðandi þróun
efnahagsmála og framtíðarhorfur hvort sem litið er til ríkis,
sveitarfélaga eða heimila í landinu þá er rétt að líta bjartsýnum
augum til framtíðar. Það er bjargföst trú okkar að til framtíðar
verður uppbygging og farsæld ríkjandi í Hveragerði. Mörg teikn eru
á lofti um að svo sé. Breikkun Suðurlandsvegar sem fara á í útboð á
allra næstu vikum, fyrirhuguð stóriðja í Ölfusi og
virkjunarframkvæmdir við Hverahlíð og Gráuhnjúka. Allt stórar
framkvæmdir sem munu hafa mikil og jákvæð áhrif á stöðu
Hveragerðisbæjar og Hvergerðinga. Því hvetjum við til samstöðu
bæjarfulltrúa og bæjarbúa um það starf sem framundan er í
bæjarfélaginu okkur öllum til hagsbóta.
Aldís Hafsteinsdóttir
bæjarstjóri
Hér má sjá greinargerð bæjarstjóra með þriggja ára
áætlun.
Hér má sjá þriggja ára áætlun Hveragerðisbæjar 2011-2013
Engum dylst að vetur konungur hefur óvænt tekið sér bólfestu í bænum okkar, rétt eins og annars staðar á landinu. Í gær og í dag, föstudag, hafa starfsmenn áhaldahúss ásamt verktökum unnið sleitulaust að því að hreinsa götur og gangstéttar í bæjarfélaginu. Þegar þetta er skrifað á föstudagskvöldi hefur allt gatnakerfi bæjarins verið rutt sem og gangstéttar á megin gönguleiðum. Það er bæjaryfirvöldum metnaðarmál að götur bæjarins séu greiðfærar en auðvitað þurfa íbúar oft að sýna ákveðna biðlund þegar mikið snjóar á stuttum tíma. Nú þegar hafa snjómoksturstæki farið þrisvar yfir allan bæinn og ef fram fer sem horfir munu öflugir starfsmenn þurfa að vera á vaktinni í fyrramálið en áfram er spáð snjókomu.
Til hliðar hér á forsíðu er að finna nánari upplýsingar um
forgangsröðun snjómoksturs í Hveragerði sem íbúar eru hvattir til
að kynna sér.
Aldís Hafsteinsdóttir
Bæjarstjóri
Af heimasíðu Grunnskólans í Hveragerði
Stóra upplestrarkeppnin er nú á sínu fjórtánda starfsári og fer á þessu ári fram á 32 stöðum á landinu. Allir sjöundu bekkingar hafa æft sig í vönduðum upplestri síðan á Degi íslenskrar tungu í nóvember síðastliðnum en þá hefst formlegur undirbúningur. Undankeppni Stóru upplestrakeppninnar fór fram í Grunnskólanum í Hveragerði þriðjudaginn 23. febrúar. Dagskráin var með hátíðlegu sniði og fluttu 24 nemendur 7. bekkjar ljóð að eigin vali og lásu sögu fyrir gesti. Foreldrar, afar, ömmur og systkini hlýddu á prýðisgóðan lestur og sérstakir gestir voru nemendur í 6. bekk. Dómarar voru kennarar hér við skólann, þau Inga Lóa Hannesdóttir, Heimir Eyvindarson og Guðjón Árnason. Nemendur við Tónlistarskóla Árnesinga spiluðu í hléi á meðan dómarar réðu ráðum sínum. Sigurvegarar voru Elva Rún Pétursdóttir, Erla Lind Guðmundsdóttir, Sólveig Diljá Haraldsdóttir og Davíð Ernir Kolbeins. Þau verða fulltrúar okkar skóla á aðalkeppni Stóru upplestrarkeppninnar sem fram fer mánudaginn 15. mars á Stað á Eyrarbakka. Við undirbúning er skemmtilegast að upplifa hve nemendur taka verkefnið alvarlega og einnig að sjá hvernig sjálfsöryggi þeirra vex. Huga þarf einnig að líkamsstöðu, sýna áheyrendum sínum virðingu og ná utan um hvert orð, hvern staf og hvert hljóð.Nemendur leggja á sig ómælda vinnu við að læra textann sinn og að mörgu er að hyggja þegar flytja þarf texta sjálfum sér og öðrum til ánægju. Þessi undirbúningsvinna skilaði sér sannarlega vel í gær og upplesarar voru sér til sóma.
Kristín Arna Hauksdóttir.
Frá vinstri: Elva Rún, Davíð Ernir, Erla Lind og
Sólveig Diljá.
Það er ávallt mikið um að vera í Grunnskólanum í Hveragerði enda er þar um að ræða langfjölmennasta vinnustað bæjarfélagsins þar sem saman eru komnir á fimmta hundrað einstaklingar á hverjum degi.
Í Grunnskólanum er enginn dagur öðrum líkur og margt skemmtilegt
að gerast eins og segir í tilkynningu frá Ernu Ingvarsdóttur,
deildarstjóra yngsta stigs. Í sömu tilkynningu sem send er
öllum foreldrum og forráðamönnum nemenda skólans er bent á nýjar
fréttir á heimasíðu skólans en þar má nú lesa um öfluga nemendur
sem tóku þátt í Skólahreysti fyrir hönd okkar Hvergerðinga, um
heimsókn starfsmanna til Íslenska gámafélagsins, um sigurvegara í
Stóru upplestrarkeppninni, danskt kaffihús í skólanum og 100 daga
hátíð í 2. bekk svo fátt eitt sé talið.
Endilega fylgist með öflugu og skemmtilegu skólastarfi í
skólanum okkar á heimasíðu skólans.
Öskudagurinn var haldinn hátíðlegur í Hveragerði í dag.
Fjöldi barna lagði leið sína á bæjarskrifstofuna í skemmtilegum
búningum og sungu hástöfum.
Hér fyrir neðan má sjá nokkrar myndir.
Bæjarstjórn mótmælir harðlega þeirri þjónustuskerðingu sem fyrirhuguð er á Heilbrigðisstofnun Suðurlands samkvæmt tillögum Heilbrigðisráðuneytisins.
Verði vaktir skurðlæknis, fæðingarlæknis og svæfingarlæknis lagðar af og skurðstofu Hsu lokað utan dagvinnutíma og um helgar er verið að færa heilbrigðisþjónustu við Sunnlendinga marga áratugi aftur í tímann.
Með þessari ákvörðun er í raun verið að leggja niður fæðingardeild Heilbrigðisstofnunar Suðurlands þar sem óhugsandi er að starfrækja fæðingardeild sem ekki er studd af fæðingarlækni á vakt. Fæðingar á Hsu voru um 200 árið 2008 auk allrar annarrar þjónustu sem fæðingardeildin veitir. Það er með öllu óásættanlegt að þessi þjónusta verði færð til LSH í Reykjavík með öllu því óhagræði sem því fylgir fyrir notendur þjónustunnar og vandséð að sparnaður náist við slíka ráðstöfun.
Til þess ber einnig að líta að Hellisheiðin getur verið erfiður farartálmi að vetrum og ekki sjálfgefið að samgöngur séu ávallt eins og best verður á kosið. Notendur þjónustu fæðingardeildar við Hsu koma af öllu Suðurlandi og er ekki til bóta að auka enn frekar á ferðalög fæðandi móður með því að flytja fæðingarþjónustuna alfarið til Reykjavíkur. Mikill mannauður og reynsla er fólgin í þeim störfum sem munu tapast af svæðinu ef ákvörðuninni verður haldið til streitu.
Aðgerðir í þágu sparnaðar mega ekki tefla öryggi íbúa í tvísýnu og mikilvægt er að framtíðarsýn sé skýr þegar lagt er upp með breytingar og tilfærslu á þjónustu.
Bæjarstjórn gagnrýnir að ekki skuli hafa verið haft samráð við sveitarfélögin og heimamenn í aðdraganda þessara ákvarðana og skorar á heilbrigðisráðherra að endurskoða ákvörðun sína með öryggi og heill Sunnlendinga að leiðarljósi.
Virk nágrannavarsla er ein albesta forvörn gegn innbrotum og skemmdarverkum sem völ er á. Hér í Hveragerði hefur bæjarstjórn samþykkt að stuðla að virkri nágrannavörslu i samvinnu við tryggingafélag bæjarins VÍS. Pétur Guðmundsson, afbrotafræðingur og lögreglumaður er ráðgjafi okkar við innleiðingu verkefnisins og hefur hann þegar haldið einn fund með forstöðumönnum stofnana bæjarfélagsins þar sem helstu atriði nágrannavörslu voru kynnt. Einnig var þar rætt um næstu skref sem felast í öflugri kynningu til íbúa meðal annars með íbúafundum sem fyrirhugaðir eru í mars.
Fram að þeim mun bæjarfélagið standa fyrir kynningu á verkefninu til að allir verði meðvitaðir um verkefnið áður en kemur að uppsetningu þess í hverju einstöku hverfi.
Hér má lesta helstu atriðin varðandi nágrannavörslu.
Meginmarkmið okkar er að halda afbrotum frá heimilum okkar. !
Undirmarkmið er að fá fólk til að taka saman höndum um öruggara nágrenni! Meira traust – meiri samheldni – færri afbrot. Afskiptasemi og athygli eru einkunnarorð sem gott er að hafa í huga.
Nokkur praktísk atriði varðandi nágrannavörslu.
- Því fleiri sem eru virkir í nágrannavörslunni því sterkari er hún. Lifandi nágrannavarsla fælir þjófinn í burtu frá ykkur, skiptu þér af nágrenni þínu.
- Nágrannavarslan er stofnuð á íbúafundi þar sem kynning er um hvað hún stendur fyrir og hvernig hún virkar.
- Samskiptanet er myndað á milli bæjarins-lögreglu-götustjóra og íbúanna. Með netinu er átt við að götustjóri hefur beint samband við bæinn og lögreglu varðandi fyrirspurnir eða tilkynningar og íbúarnir hafa beint samband við götustjórann með hið sama. Þannig þarf bærinn eða lögregla einungis að tala við einn aðila til að koma út upplýsingum.
- Valinn er götustjóri í hverri götu. Götustjórinn er verkstjórinn og rekur áfram nágrannavörsluna í hverri götu fyrir sig. Ef að gatan er stór þá þarf hann aðstoðargötustjóra sér til aðstoðar.
- Götustjóri kallar til eins íbúafundar á ári og skipuleggur eitt götugrill.
- Skipt er um götustjóra á hverju ári. Þannig verða fleiri ábyrgir í verkefninu og meiri árangur næst.
- Götuskilti merkt nágrannavarsla er sett umm í hverfinu á áberandi stað, helst við inngang allra gatna og við göngustíga.
- Límmiðar með nágrannavörslumerkinu er dreift til uppsetningar við útidyr og bakdyr eða glugga. Forvarnar-atriði.
- Heimili þitt og nágrenni er þitt svæði og nágranna þinna, enginn óæskilegur á að vera að þvælast í götunni þinni. Skráðu niður útlit eða bílnúmer og hringdu í 112 og tilkynntu um grunsamlegar mannaferðir.
- Notaðu tímarofa - sem stjórnar því að ljós eru kveikt og slökkt á mismunandi tímum þegar hús eru yfirgefin. Ljós sem logar stöðugt er jafn gott heimboð og myrkvað hús.
- Ljóskastari með nema í sér og er gott að hafa á bakhlið húsa.
- Gluggastormjárn sem einnig eru flóttaleið í bruna er gott að setja upp. Þau er ekki hægt að opna utan frá. Venjuleg stormjárn halda litlu, krækjur eru nauðsynlegar með.
- Lokaðu öllum gluggum þegar þú ferða að heiman. Fáðu nágranna til að hreyfa við gluggatjöldium af og til, vökva blómin, kveikja á lampa, útvarpi, fjarlæga póst sem er sýnilegur, leggja bíl í þína innkeyrslu við og við, setja rusl í tunnuna þína, slá garðinn eða moka snjó frá dyrum.
- Stór hluti innbrota á sér stað í gegnum svala- eða garðhurðir. Aðgættu að þær séu vel læstar og með krækjum.
- Aukalykla skal ekki geyma úti í námunda við útihurð.
- Kjallaragluggar eru algeng leið inn. Grindur fyrir kjallaragluggum fæla frá þjófa.
- Þegar flutt er í nýtt húsnæði er góð regla að skipta um skrár. Þú veist ekki hversu margir hafa lykil að húsnæðinu.
- Hafðu útiljós kveikt í skammdeginu - það fælir frá þjófa.
- Sumir þjófar ráfa um og leita að tækifærum. Hafðu húsið læst þegar dvalið er í garðinum eða skroppið er frá í stuttan tíma.
- Er stigi eða trappa í garðinum sem getur komið innbrotsþjófi til hjálpar? Liggur hann kannski úti?
- Eftirlitsaðilar, viðgerðarmenn og iðnaðarmenn eiga að sýna skilríki áður en þeim er hleypt inn. Ekki treysta ókunnugum. Þjófar geta verið góðir lygarar.
- Aðgættu að lás á útidyrahurð sé vel varinn. Stundum er nóg að brjóta rúðu og þannig ná til snerilssins.
Með aukinni athygli og svo afskiptasemi gagnvart þeim sem eru að þvælast í götunni þinni þá dregur þú úr líkum á því að þú eða nágrannar þínir verði fyrir innbroti.
Pétur Guðmundsson. Afbrotafræðingur og lögreglumaður. Netfang: gpg@internet.is
Heilbrigður lífsstíll bæjarbúa er áberandi þessa dagana. Mikið líf er í og við sundlaugina og mikil aukning á útivist og hreyfingu fólks á öllum aldri. Fjölbreyttni þeirrar þjálfunar sem er í boði er mikil og er Sundlaugin Laugaskarði miðdepill þessarar starfsemi. Íþróttafélagið Hamar rekur líkamsræktina Laugasport í sundlaugarhúsinu sem stendur fyrir fjölbreyttum námskeiðum við allra hæfi. Sundíþróttin er vinsæl og synda margir sér til heilsubótar eða fara í vatnsleikfimi. Sunddeild Hamars stendur fyrir sundæfingum og eru margir krakkar sem æfa af kappi.
%5B1%5D.JPG)
Boot Camp hópurinn
Þar er vel tekið á !
%5B1%5D.JPG)
Hlaupahópurinn að leggja í´ann
Ekkert gefið eftir í karlaþrekinu
Krúttleg kríli með mömmu í leikfimi
Vatnsleikfimin hefur verið vinsæl í tugi ára
Sælar eftir átökin
Það er aldrei of seint að byrja
!
Lífshlaupið er fræðslu- og hvatningarverkefni ÍSÍ
sem höfðar til allra aldurshópa. Landsmenn eru hvattir til þess að
huga að sinni daglegri hreyfingu og auka hana eins og kostur er
þ.e. í frítíma, heimilisverkum, vinnu, skóla og við val á
ferðamáta. Mörg fyrirtæki í Hveragerði eru skráð til þátttöku og
erum við í 12. sæti yfir sveitarfélög (11.2). Starfsfólk
sundlaugarinnar hefur titil að verja frá síðasta ári og er í
forystu í dag á landsvísu með flestar mínútur í hreyfingu í sínum
flokki. Það er aldrei of seint að byrja. Hvetjum hvort annað til
hreyfingar í a.m.k. 30 mín. á dag.
Sjá heimasíðu Lífshlaupsins
Menningar- og frístundafulltrúi
Tilgangurinn er að stuðla að víðtækri og skiplagðri lýðheilsuáætlun fyrir bæjarbúa. Markmiðið er að til sé heildræn velferðarstefna í bæjarfélaginu og tryggja samvinnu þeirra sem koma að málefnum m.a. barna, ungmenna og eldri borgara í bæjarfélaginu t.d. skóla, frístunda- og íþróttafélaga, félagsmiðstöðvar, kirkju, frjálsra félagasamtaka og fleiri tengdra aðila.
Hlutverk
- er að samhæfa og styrkja enn frekar það lýðheilsustarf sem unnið er í bæjarfélaginu.
- er að vinna að jákvæðum árangri í velferð m.a. barna, ungmenna og eldri borgara.
- er að tryggja samvinnu og samheldni í velferðarstarfinu.
- er að ákveðinn samhljómur sé ríkjandi varðandi velferð bæjarbúa.
- er að tryggja börnum jákvætt og uppbyggilegt umhverfi hvort sem er í skóla eða frítíma.
Lýðheilsu- og velferðarstarf þarf að vera víðtækt og m.a. að taka tillit til
- áfengis- og vímuvarna
- varna gegn ofþyngd
- aukinnar hreyfingar
- ótímabærrar og óæskilegrar kynlífshegðunar ungs fólks
- hollara mataræðis
- öruggrar netnotkunar barna og ungmenna
- bættrar sjálfsmyndar
- aukinnar fræðslu um bætt uppeldi og betri líðan almennings
Allir þeir sem vilja koma einhverjum upplýsingum til samstarfshópsins mega hafa samband við menningar- og frístundafulltrúa, jmh@hveragerdi.is.
Dagur leikskólans 6. febrúar
Árið 2008 var 6. febrúar valinn sem dagur leikskólans. Leikskólanir á landinu halda daginn hátíðlegan hver með sínum hætti. Dagurinn er ætlaður til kynningar á starfi leikskólanna. Nemendur Undralands bjóða upp á myndlistasýningu í Sunnumörk í tilefni dagsins. Þar eru sýndar myndir frá starfinu og verk eftir börnin.
Leikskólinn Undraland er við Breiðumörk 27. Hann var opnaður 1982 , tveggja deilda skóli og 1997 var þriðja deildin byggð. Námskráin okkar mótast af Aðalnámskrá leikskóla og uppeldisstefnu Dewey sem leggur áherslu á uppgvötanir barnsins, reynslu og virkni. Leikurinn er aðal námsleið barnsins ýmist sjálfsprottinn eða leikinn eftir settum reglum. Leikskólanámið er samfellt lífsleikninám þar sem barnið tileinkar sér samskiptavenjur, lærir að bera virðingu fyrir ólíku atgerfi, skoðunum og menningu.
Kveðja starfsfólk Undralands
Eftirfarandi er af vefnum www.kopavogur.net en umsjónarmenn þess
vefjar gerðu könnun á verði skólamáltíða í nokkrum sveitarfélögum á
landinu og var meðal annars haft samband við Hveragerðisbæ vegna
þessa. Það er fróðlegt að geta borið saman mismunandi verðlagningu
sveitarfélaganna og því er eftirfarandi niðurstaða birt hér á
heimasíðunni:
Kopavogur.net gerði verðkönnun meðal nokkurra sveitafélaga í
landinu á máltíðum í grunnskólum. Fjögur sveitarfélög völdu að
svara ekki spurningunni en þau voru Árborg, Fljótsdalshérað,
Hafnarfjörður og Garður en annars var viðundandi svörun. Mörg
sveitarfélaganna tóku það fram að inn í verði máltíðanna væri ekki
tekið gjald fyrir aðstöðu eða þjónustu við framreiðslu máltíðanna.
Eins eru sum sveitarfélögin með frávik sem sérstaklega er greint
frá í neðanmáli. Samanburður á gæðum máltíðanna er ekki metin í
könnuninni.
Garðabær er með langhæsta verðið eða 428 kr. fyrir hverja máltíð en
Grindavík tekur aðeins 180 kr. fyrir hverja máltíð. Munurinn á
hæsta og lægsta verði máltíðanna er því 248 kr. eða 137%.
Sveitarfélag.... Máltíð.... Niðurgr.... Boðuð hækkun
Garðabær........428 kr...........41 kr.
Ísafjörður........412 kr..........189 kr.
Borgarbyggð....356 kr........................10%
Seltjarnarnes...355 kr.
Kópavogur.......320 kr.
Akureyri..........307 kr.
Akranes...........279 kr.
Hveragerði.......260 kr.
Reykjavík..........250 kr.
Mosfellsbær.......250 kr.
Reykjanesbær....215 kr..........192 kr.
Grindavík..........180 kr..........325 kr.
Reykjavíkurborg veitir systkinaafslátt þannig að aðeins er greitt
fyrir tvö yngstu systkini ef þrjú eða fleiri systkini eru í
mataráskrift frá sama heimili.
Kópavogsbær hefur tilkynnt hækkun 1. febrúar og er því nýhækkað
gjald sett í samanburðinn.
Borgarbyggð hefur þrjá grunnskóla á sínum snærum og er morgunmatur
innifalin í verði máltíða í Grunnskóla Borgarfjarðar og
Varmalandsskóla og var gjaldið því hærra í þeim skólum og ekki hæft
til samanburðar en í Grunnskólanum í Borgarnesi er máltíðin seld á
365 kr. og var hann því valinn í samanburðinn.
Fréttina í heild sinni má finna hér:
Þau leiðu mistök urðu í 3. tölublaði Vísbendingar sem fjallar um
Fjármál sveitarfélaga að rangt var farið með íbúafjölda í
Hveragerði og hafði það mikil áhrif á einkunnagjöf bæjarfelagsins.
Þegar réttar tölur hafa verið settar inní reiknilíkanið lendir
Hveragerðisbær í 12. -13. sæti sem sýnir að sveitarfélagið er í
hópi best reknu sveitarfélaga landsins.
Vikuritið Vísbending gefur sveitarfélögum einkunnir árlega í kjölfar skoðunar ársreikninga og eru þar metnir þættir eins og skattheimta, afkoma sem hlutfall af tekjum, hlutfall skulda af tekjum, veltufjárhlutfall og þróun íbúafjölda. Í síðustu Vísbendingu er þessi listi gefinn út og þar lenti Hveragerði í 32. sæti með einkunnina 2,7. Við nánari skoðun kom í ljós að mistök höfðu verið gerð við úrvinnslu gagna en þar kom fram að íbúum hér í bæ hefði fækkað um tæp 11% á tímabilinu sem er þó nokkuð frá hinu rétta sem er fækkun um 0,6%. Þegar búið er að leiðrétta gögn með tilliti til þessa endar Hveragerðisbær með einkunnina 4,2 fyrir fjármálastjórn sem skilar okkur í 12.-13. sætið sem hlýtur að teljast afar gott. Bæjarstjóri hefur farið yfir þessa stöðu með Benedikti Jóhannessyni, ritstjóra, sem mun leiðrétta þessi leiðu mistök í næsta tölublaði Vísbendingar.
Aldís Hafsteinsdóttir
bæjarstjóri
Leikskólinn Undraland hélt bóndadaginn hátíðlegan, feður, afar
og bræður komu í hafragraut og slátur um morguninn. Í hádeginu var
þorrablót og Þorraþrællinn sunginn í sal. Í vikunni á undan voru
börnin búin að undirbúa fagnaðinn og höfðu búið til
þorrakórónur.
Þorraþrællinn sunginn.
Elstu börnin smakka á kræsingunum.
Leikskólarnir í Hveragerði fengu nýverið öryggisvesti að gjöf
frá VÍS. Gunnvör Kolbeinsdóttir. leikskólastjóri á Óskalandi og
Jónína Þórarinsdóttir, aðstoðarleikskólastjóri Undralandi tóku við
gjöfunum ásamt börnum frá báðum leikskólunum.
Fulltrúar meirihlutans í bæjarstjórn samþykktu á fundi
bæjarstjórnar þann 14. janúar tillögu minnihlutans um að 40
milljónir sem fengjust í tjónabætur fyrir Ullarþvottastöðina verði
settar í uppbyggingu gervigrasvallar við Grýluvöll. Í bókun með
svari meirihlutans kemur fram að áhuga minnihlutans á uppbyggingu
íþróttamannvirkja er fagnað og því samþykkir meirihlutinn
tillöguna. Í þriggja ára áætlun sem lögð verður fram á fundi
bæjarstjórnar í febrúar mun stefnumörkun meirihlutans á sviði
íþróttamála liggja fyrir en ljóst er að sú uppbygging kemur til með
að kosta mun meira en þær 40 milljónir króna sem hér eru lagðar
til.
Niðurrif Ullarþvottastöðvarinnar að Dynskógum 17 var samþykkt
á fundi bæjarstjórnar í gær, 14. janúar. Ullarþvottastöðin
skemmdist mikið í Suðurlandsskjálftanum þann 29. maí 2008.
Það er niðurstaða sérfræðinga að mikill kostnaður fylgi því að koma
húsnæðinu í sambærilegt ástand og það var fyrir skjálftann.
Kostnaður við að koma húsnæðinu í nýtingarhæft ástand er aftur á
móti mun hærri og vandséð að bæjarfélagið muni á nokkrum tímapunkti
hafa þau not fyrir húsið að slíkt geti borgað sig enda gerir
skipulag ráð fyrir að húsnæðið víki fyrir annarri notkun.
Skipulags- og byggingafulltrúi telur að húsnæðið sé hættulegt í því
ástandi sem það er í dag enda er burðarvirki þess laskað og hætta
er á að við tiltölulega lítinn skjálfta geti húsið jafnvel
hrunið.
Leitað hefur verið eftir styrk til niðurrifs úr sjóði sem komið var
á fót til stuðnings og uppbyggingar á jarðskjálftasvæðinu og hefur
forsætisráðuneytið og þjónustumiðstöð vegna Suðurlandsskjálfta
samþykkt að kosta niðurrif og förgun Ullarþvottastöðvarinnar í
samræmi við verklagsreglur sjóðsins.
Niðurrifið hefur verið boðið út í samræmi við reglur þar um og
átti Ræktunarmiðstöðin í Hveragerði lægsta tilboð. Mun niðurrif
hefjast á allra næstu dögum.
Hugur heimsbyggðarinnar er hjá íbúum Haíti sem nú upplifa ólýsanlegar hörmungar af völdum jarðskjálftans sem þar reið yfir siðastliðinn þriðjudag. Við Íslendingar búum að stórkostlegu kerfi björgunarliðs sem ávallt er boðið og búið að koma til aðstoðar þeim sem á þurfa að halda, bæði innanlands sem utan. Því er það með miklu stolti sem þjóðin hefur fylgst með fumlausum viðbrögðum alþjóðabjörgunarsveitarinnar sem nú þegar er komin til Haíti. Hvergerðingar vilja leggja sitt af mörkum til að styðja við hjálparstarfið sem þar fer nú fram og því samþykkir bæjarstjórn að greiða sem svarar 100 kr á íbúa til hjálparstarfsins og skiptist upphæðin jafnt á milli Rauða Kross Íslands og Landsbjargar.
Tillagan var samþykkt samhljóða og hefur styrkurinn sem nemur 115.300,- fyrir hvort félag þegar verið greiddur.
Karlalið Körfuknattleiksdeildar Hamars fékk sérstaka viðurkenningu frá Hveragerðisbæ, í leik Hamars og Snæfells, fyrir að hafa sigrað 1. deildina í Íslandsmóti KKÍ á síðustu leiktíð og unnið sæti í úrvalsdeild. Eyþór H. Ólafsson, forseti bæjarstjórnar afhenti viðurkenningarnar í fjarveru Gísla Páls, formanns menningar- íþrótta- og frístundanefndar.
Á myndinni eru Eyþór H. Ólafsson, forseti bæjarstjórnar, Lárus
Ingi Friðfinnsson, formaður körfukn.d. Hamars og Jóhanna M.
Hjartardóttir, menningar- og frístundafulltrúi, við afhendinguna í
gærkvöldi.
Góð stemmning var á Fossflötinni þegar bæjarbúar kvöddu jólahátíðina á þrettándanum. Veðurblíðan var einstök og lýstu litlir bálkestir upp flötina sem skartaði sínu fegursta. Álfasöngur ómaði undir harmonikku- og trommuleik. Grýla og hyski hennar komu úr fossgilinu og heilsuðu upp á gesti áður en þau héldu til fjalla. Unga fólkið þurfti ekki að hræðast Grýlu því flest höfðu verið stillt um jólin. Hátíðinni lauk með glæsilegri flugeldasýningu hjálparsveitarinnar.
Hveragerðisbær þakkar öllum þeim
sem komu fram á hátíðinni en það voru:
Söngsveit Hveragerðis
Leikfélag Hveragerðis
Hjálparsveit skáta Hveragerði
Örlygur Atli Guðmundsson, harmonikkuleikari
Stefán I. Þórhallsson og trommusveinar
Hafsteinn Þór Auðunsson, álfakóngur
Berglind Ólafsdóttir, álfadrottning
Baldur Rafn Gissurarson, hljóðmaður
Helga Baldursdóttir, kirkjuvörður
Starfsmenn áhaldahúss
Grýla, Leppalúði og jólasveinarnir fá sérstakar þakkir fyrir að
gefa sér tíma til að koma við á Fossflöt á heimleið í
Reykjafjall.
Menningar- og frístundafulltrúi
Viðurkenningar fyrir fegurstu jólaskreytingar einstaklinga og fyrirtækja voru veittar við hátíðlega athöfn í Listasafni Árnesinga þann 30. desember sl.
Mannvirkja- og umhverfisnefnd valdi eftirtalin hús fallegust skreytt þetta árið: Valsheiði 7, Hraunbæ 6 og Reykjamörk 12.
Það fyrirtæki sem þótti bera af var Veitingastaðurinn Hoflandsetrið.
Á meðfylgjandi mynd má sjá stolta verðlaunahafa ásamt Guðmundi Þór Guðjónssyni, formanni nefndarinnar og Elfu Dögg Þórðardóttur, mannvirkja- og umhverfisfulltrúa Hveragerðisbæjar.
Þjónustu- og samstarfssamningur til næstu þriggja ára milli
íþróttafélagsins Hamars og Hveragerðisbæjar var undirritaður af
Aldísi Hafsteinsdóttur, bæjarstjóra og Guðríði Aadnegard, formanni
Hamars við hátíðarathöfn í Listasafninu þann 30. des.
síðastliðinn.
Samningnum er ætlað að efla samstarf bæjaryfirvalda og
Íþróttafélagsins og tryggja öflugt íþrótta-, forvarna- og
tómstundastarf fyrir börn og ungmenni í Hveragerðisbæ. Áhersla er
lögð á mikilvægi þess öfluga starfs sem fer fram innan
Íþróttafélagsins Hamars fyrir samfélagið í heild. Til þess að
félagið geti ræktað hlutverk sitt styrkir Hveragerðisbær félagið
árlega með beinum og óbeinum fjárframlögum auk þess sem félagið
tekur að sér fyrir Hveragerðisbæ tiltekin afmörkuð verkefni gegn
greiðslu eins og íþrótta- og leikjanámskeið fyrir börn yfir
sumartímann.
Samningurinn tryggir félaginu rúmar 18 milljónir á þessu þriggja
ára tímabili.
Jafnframt var undirritaður samningur milli Hveragerðisbæjar og
Laugasports um áframhaldandi leigu þess síðarnefnda á húsnæði í
Sundlauginni Laugaskarði fyrir líkamsrækt til þriggja ára.
Laugasport sem er í eigu Íþróttafélagsins Hamars hefur undanfarin
ár rekið líkamsrækt á þessum sama stað og hefur reksturinn gengið
vel og starfsemin nýtur sívaxandi vinsælda.
Íþróttamenn
Hveragerðis 2009 voru kjörin Hafrún
Hálfdánardóttir, körfuknattleikskona með Hamri og
Hafsteinn Valdimarsson, blakmaður með danska
liðinu Aalborg HIK Volley, en þau hafa bæði staðið sig vel með
sínum félagsliðum og landsliðum Íslands í sínum
íþróttagreinum.
Fleiri íþróttamenn voru heiðraðir sérstaklega fyrir góðan árangur í
íþrótt sinni árið 2009 en það voru: Ágústa Gísladóttir fyrir
fimleika, Bjarndís Helga Blöndal fyrir badminton, Gunnar Marel
Einarsson fyrir golf, Hafsteinn Davíðsson fyrir sund og
körfuknattleik, Jan Hinrik Hansen fyrir badminton, Jenný
Harðardóttir fyrir körfuknattleik, Kjartan Sigurðsson fyrir
knattspyrnu Kristján Valdimarsson fyrir blak, Oddur Ólafsson fyrir
hestaíþróttir og körfuknattleik og Ragnar Á. Nathanaelsson fyrir
körfuknattleik.
Karlalið Körfuknattleiksdeildar Hamars fær sérstaka viðurkenningu
fyrir að vinna sæti í úrvalsdeild KKÍ síðastliðið vor og mun
afhendingin fara fram í fyrsta heimaleik liðsins þann 10. janúar
næstkomandi.
Við óskum íþróttamönnunum til hamingju með frábæran árangur á
árinu og velfarnaðar í framtíðinni.
Hafsteinn Valdimarsson og Hafrún Hálfdánardóttir
.jpg)
Guðríður Aadnegard formaður Hamars og Aldís Hafsteinsdóttir
bæjarstjóri undirrituðu þjónustu- og samstarfssamning sem er ætlað
að efla samstarf bæjaryfirvalda og Íþróttafélagsins Hamars og
tryggja öflugt íþrótta-, forvarna- og tómstundastarf fyrir börn og
ungmenni í Hveragerðisbæ.
Í ljósi þess að framundan er brunagaddur eins langt og menn best
sjá hefur verið ákveðið að prufa að gera skautasvell á malbikaða
vellinum á skólalóðinni.
Við hönnun vallarins sem er næst Fljótsmörkinni var gert ráð fyrir
að þar gæti verið skautasvell og því er upplagt að kanna núna þegar
vel viðrar hvort sú hönnun virki. Betri aðstæður gefast varla, logn
og frost.
Öflugir starfsmenn áhaldahúss tóku vel í þessa hugmynd og munu
síðdegis byrja að dæla vatni á planið og ef allt fer að óskum
verður jafnvel hægt að renna sér þarna í kvöld.
Þeir sem hafa hug á að nýta sér svellið eru beðnir um að nota
viðeigandi öryggisbúnað og gæta fyllstu varkárni og eru foreldrar
og forráðamenn barna sérstaklega beðnir um að gæta að þessu hvað
börnin varðar. Allir eru síðan á svellinu á eigin
ábyrgð.
Elfa Dögg Þórðardóttir mannvirkja- og umhverfisfulltrúi og
Guðmundur (Nenni) Pétursson starfsmaður áhaldahúss.
Samkomulag um þjónustu Slökkviliðs Hveragerðisbæja í vesturhluta
Sveitarfélagsins Ölfuss var undirritað á milli forsvarsmanna
Brunavarna Árnessýslu og Hveragerðisbæjar í dag.
Með undirritun samkomulagsins eru aðilar sammála um að slökkvilið
Hveragerðisbæjar sinni útköllum í vesturhluta Sveitarfélagsins
Ölfuss eins og það hefur gert undanfarin ár skv. samningi milli
Hveragerðisbæjar og Sveitarfélagsins Ölfuss frá 1. janúar
2004. Brunavarnir Árnessýslu samþykkja að greiða
Hveragerðisbæ útlagðan kostnað vegna útkalla á þjónustusvæðinu á
samningstímanum en samningurinn tekur gildi þann 1. janúar 2010 og
rennur út án uppsagnar þann 31. mars 2010.
Með samkomulaginu er komið í veg fyrir það óvissuástand sem
margir óttuðust í kjölfar uppsagnar á samningi Ölfusinga og
Hvergerðinga. Vegfarendur um Suðurlandsveg og íbúar í
vesturhluta Ölfuss munu því enn um sinn njóta góðrar þjónustu
Slökkviliðs Hveragerðisbæjar.
Það er orðinn fastur liður í jólahátíð Hvergerðinga að Hveragerðisbær veitir afreksfólki í íþróttum viðurkenningu fyrir unnin afrek á árinu og útnefnir íþróttamenn Hveragerðis. Bæjarstjórn Hveragerðis og menningar-, íþrótta- og frístundanefnd bjóða til hátíðar í Listasafni Árnesinga í dag 30. desember kl. 17. Þar munu verða afhentar viðurkenningar til íþróttamanna fyrir góðan árangur á árinu og kjörnir íþróttamenn Hveragerðis árið 2009.
Það er menningar-, íþrótta- og frístundanefnd sem velur íþróttamann Hveragerðis, karl og konu. Þeir íþróttamenn sem koma til greina þurfa að hafa stundað íþróttir fyrir íþróttafélög í Hveragerði ,óháð búsetu, eða að eiga heimili í Hveragerði þó að íþróttin sé stunduð á vegum íþróttafélags í öðru sveitarfélagi.
Menningar-, íþrótta- og frístundanefnd þakkar þeim fjölmörgu sjálfboðaliðum sem starfa að íþróttamálum og gera það að verkum að íþróttalífið í bænum er eins fjölbreytt og það er. Starf þeirra er sjaldnast metið af verðleikum.
Þeir íþróttamenn sem verða heiðraðir sérstaklega
fyrir góðan árangur í íþrótt sinni árið 2009 eru:
Ágústa Gísladóttir fyrir fimleika
Bjarndís Helga Blöndal fyrir badminton
Gunnar Marel Einarsson fyrir golf
Hafrún Hálfdánardóttir fyrir körfuknattleik
Hafsteinn Davíðsson fyrir sund og körfuknattleik
Hafsteinn Valdimarsson fyrir blak
Jan Hinrik Hansen fyrir badminton
Jenný Harðardóttir fyrir körfuknattleik
Kjartan Sigurðsson fyrir knattspyrnu
Kristján Valdimarsson fyrir blak
Oddur Ólafsson fyrir hestaíþróttir og körfuknattleik
Ragnar Á. Nathanaelsson fyrir körfuknattleik
Karlalið Körfuknattleiksdeildar Hamars fær sérstaka viðurkenningu fyrir að vinna sæti í úrvalsdeild KKÍ síðastliðið vor og mun afhendingin fara fram í fyrsta heimaleik liðsins þann 10. janúar næstkomandi.
Allir velkomnir.
Menningar- og frístundafulltrúi
Í dag fékk Hjálparsveit skáta í Hveragerði að
gjöf sjálfvirkt hjartastuðtæki (AED).
Gjöfin barst frá vel viljuðum einstaklingi sem ekki vill láta nafns
síns getið.
Sveitin vill þakka innilega fyrir þessa góðu gjöf.
Tæki þessi eru alsjálfvirk.
Gjöf þessi er góð viðbót við búnað sveitarinnar sem stór eykur öryggi á svæðinu.
24.
desember
Stjarna
Stjörnutáknið er elsta tákn mannsins og var notað löngu fyrir ritmál. Stjarnan var notuð sem vörn gegn illum öndum og er tákn öryggis og innri hamingju. Í kristinni trú er stjarnan tákn boðunar og komu frelsarans og vísar okkur veginn að ljósinu.
© Guðrún Tryggvadóttir /www.natturan.is
Skata
Sá gamli íslenski siður að borða kæsta skötu á Þorláksmessu er
upprunninn á Vestfjörðum.
Á Suðurlandi var ekki alltaf kæsta skötu að fá og var því
horaðasti harðfiskurinn oft soðinn og snæddur á Þorláksmessu.
Á Þorláksmessu mætti fnykurinn /lyktin af kæstri skötunni
hangikjötsilminum, og jók þannig á tilhlökkunina eftir
hangiketinu.
©Guðrún Tryggvadóttir / www.natturan.is
Samkvæmt tölum Hagstofu Íslands eru Hvergerðingar 2.302 þann 1. desember 2009. Hefur bæjarbúum því fækkað um 12 á árinu sem er að líða en á sama tíma árið 2008 var íbúatalan 2.316. Nemur fækkunin um 0,6% sem miðað við árferði verður að teljast nokkuð gott. Á Suðurlandi hefur íbúum fækkað um 1,2% eða um 295 manns og því höfum við hér í Hveragerði haldið nokkuð vel utan um þá íbúa sem hér eru. Á árinu hefur Íslendingum fækkað um 2.163 eða um 0,7% en mest er fækkunin á Austurlandi eða 3,3%.
Til gamans má geta þess að karlmenn búsettir í Hveragerði eru
1.178 en konur eru 1.124. Börn 1 árs eða yngri eru 59
talsins og einn einstaklingur í bæjarfélaginu er 100 ára eða
eldri.
Hægt er að skoða íbúaþróun einstakra sveitarfélaga hér.
Engill
Engill er æðri vera, verndarengill.
Hann er boðberi Krists og alls hins góða sem í okkur býr.
©Guðrún Tryggvadóttir / www.natturan.is
Það var stór og myndarlegur hópur barna af leikskólanum
Undralandi sem var viðstaddur opnun jólagluggans í K tölvum í dag.
Boðið var upp á kókómjólk, piparkökur og ís og var veitingunum gerð
góð skil.
21. desember
Borðar og slaufur
Hátíðleiki jólanna felst að stóru leiti í barnslegri tilhlökkun
okkar um að óskir geti ræst.
Borðar og slaufur binda inn og innsigla leyndarmálin
tímabundið.
Borðinn bindur saman, tengir og afmarkar.
Slaufan er tákn hinnar hátíðlegu stundar og innsiglar leyndarmálið
sem afhjúpast ekki fyrr en slaufan er leyst.
©Guðrún Tryggvadóttir / www.natturan.is
20. desember
Jólagjöfin
Jólagjöfin er tákn umhyggju og ástar og vísar til gjafa Krists
til mannkyns.
Ástvinum okkar gefum við meðvitað eftir því lögmáli að gjöfin
viðhaldi ást og vináttu.
©Guðrún Tryggvadóttir / www.natturan.is
19. desember
Jólakötturinn
Sagan um jólaköttinn hefur ekki mikið vægi á nútímajólum en var
áður fyrr notuð til að hvetja fólk til að fá sér nýja flík fyrir
jólin.
Að öðrum kosti átti jólakötturinn að éta menn.
Enn eimir þó eftir af því að okkur finnst nauðsynlegt að fá nýja
flík fyrir jólin.
Það eru svo mörg leyndarmálin um jólin að óþarfi er að storka
örlögunum.
©Guðrún Tryggvadóttir / www.natturan.is
18.
desember
Jólatré
Grenitré er sígrænt og minnir á eilíft líf. Með því að skreyta það undirstrikum við gjafmildi jarðar og þá töfra sem náttúran býr yfir. Skrautið sem við setjum á tréð hefur allt ákveðna þýðingu fyrir sálina. Þríhyrningsform grenitrés vísar upp og er tákn elds. Það er einnig tákn föður, sonar og heilags anda.
© Guðrún Tryggvadóttir / www.natturan.is
17.
desember
Jólapokinn
Jólasveinninn ber poka fullan af gjöfum til byggða. Á táknrænan hátt hengjum við síðan poka á jólatréð, eins og til að taka við gjöfum náttúrunnar.
© Guðrún Tryggvadóttir / www.natturan.is
17. glugginn var opnaður í morguní Listasafninu en þar birtist hin glæsilegasta jólapokagluggasýning sem verður í anddyri safnsins yfir hátíðarnar. 20 listamenn gerðu jólapoka úr hvítum pappírspokum og er sjón sögu ríkari.
16.
desember
Rauður litur
Rauður er fyrsti frumliturinn, sá sem hefur hæstu tíðnina og er sá litur sem mannsaugað nemur sterkast. Rauður stendur fyrir líkamann, Jörðina og undirheima sjálfa í fornum trúarbrögðum. Rauður tengist ferhyrningsforminu og er litur hlýju, ástar og kraftsins.
© Guðrún Tryggvadóttir / www.natturan.is
Það voru nemendur úr 3. bekk sem komu ásamt kennurum sínum við opnun sextánda jólagluggans við Rauða kross húsið í morgun.
15.
desember
Jólasveinn
Jólasveinninn er persónugervingur hins góða og ekki fjarri ímyndinni um Guð. Hann er gamall maður með skegg. Hann veitir okkur hlýju og uppfyllir óskir okkar. Rauði liturinn er merki um hlýjuna og skeggið gefur til kynna að hann búi yfir visku. Þríhyrningslaga skotthúfan táknar tengingu jólasveinsins við almættið.
© Guðrún Tryggvadóttir / www.natturan.is
Það voru nemendur úr 4. bekk Ö og eldri borgarar í þriðjudagsgöngu sem voru viðstödd opnun gluggans í dag. Síðan sungu allir saman Skín í rauðar skotthúfur.
Verðlaunaafhending í piparkökuhúsasamkeppni Sunnumerkur fór fram
laugardaginn 12. desember. Alls bárust tíu hús í keppnina öll í
barnaflokki. Dómnefnd var skipuð þeim Almari Þór Þorgeirssyni
bakara hjá Almari bakara, Bergsveini Arelíussyni bakara frá
Ölgerðinni og Guðbjörgu Björnsdóttur matráði í Grunnskóla
Hveragerðis. Það var ekki auðvelt hjá dómnefndinni að velja þrjú
verðlaunahús úr öllum þessum fallegu húsum en þau mátu húsin eftir
frumleika og útliti.
Vinningshafar voru Gígja Njarðardóttir fékk fyrstu verðlaun, Agnes
Hreinsdóttir fékk önnur verðlaun og Sanda Jónsdóttir fékk þriðju
verðlaun. Önnur hús í keppninni fengu öll viðurkenningu. Veglegir
vinningar voru veittir og voru það Bónus, Bókasafn Hveragerðis,
Almar bakari, Góa og Ölgerðin sem gáfu verðlaunin.
Öll húsin verða til sýnis hjá Almari bakara, Sunnumörk til 21.
desember.
Dómnefnd ásamt verðlaunahöfum.
Fyrstu verðlaun.
14.
desember
Grenigreinar
Við skreytum með grenigreinum til að minna okkur á vonina - því lífið býr í grænum greinunum þrátt fyrir langan vetur.
© Guðrún Tryggvadóttir / www.natturan.is
12.
desember
Snjór
Jólin hjálpa okkur í gegnum veturinn og minna okkur á að lífið vaknar aftur eftir langan vetur. Snjórinn, sem er tákn vetrarins, kaldasta tíma ársins, er í raun lífgjafinn því án vatnsins væri ekkert líf á Jörðinni. Snjórinn og jólin eru tengd órofa böndum í hugum okkar. Jafnvel í heitum löndum er jólasnjór svo sterkur hluti af jólatilfinningunni að búin er til eftirlíking af honum.
© Guðrún Tryggvadóttir / www.natturan.is
13. desember
Rauð ber
Berin eru fræ táknrænna runnategunda eins og kristþyrnis og einiberjarunna. Þau eru tákn nýs lífs og vekja upp von um eilíft líf og allsnægtir.
© Guðrún Tryggvadóttir / www.natturan.is
Bæjarstjóri kynnti fjárhagsáætlun fyrir árið 2010 á fundi bæjarstjórnar þann 10. desember sl. Var samþykkt á fundinum að vísa áætluninni til síðari umræðu sem stefnt er að þann 17. desember nk.
Eftirfarandi er greinargerð bæjarstjóra sem lögð var fram á fundinum:
Fjárhagsáætlun Hveragerðisbæjar fyrir árið 2010 ber öll merki
þess efnahagslega umróts sem ríkt hefur í samfélaginu undanfarið
ár. Fyrir ári þegar fjárhagsáætlun ársins 2009 var samþykkt
voru vonir bundnar við að staða mála eftir hrunið myndi skýrast á
árinu og jafnvel færi að sjást til lands árið 2010. Sú
hefur ekki orðið raunin og óvissan um framtíðina er síst minni núna
heldur en var í desember 2008. Óvissa ríkir um
framtíðarhorfur og fá jákvæð teikn eru á lofti.
Fjárhagsáætlunargerð fyrir árið 2010 er því mörkuð ýmsum
óvissuþáttum og gildir það jafnt um Hveragerði sem önnur
byggðarlög á Íslandi. Árið 2010 mun einkennast af lækkandi
tekjum og enn frekari hagræðingu í rekstri.
Í mörgum sveitarfélögum hefur íbúum fækkað þó nokkuð og því er það
fagnaðarefni að íbúum hefur einungis fækkað um 0,3% eða um 8
samkvæmt óstaðfestum íbúatölum þann 1. desember 2009.
Hvergerðingar eru því 2.308 en voru á síðasta ári
2.316. Gert er ráð fyrir að breyting á íbúafjölda verði
óveruleg á árinu 2010.
Útsvarsprósenta verður óbreytt eða 13,28% en þrátt fyrir það er
gert ráð fyrir hækkun útsvarstekna um 2% frá áætlaðri niðurstöðu
ársins 2009 en rauntölur ársins gefa tilefni til að ætla að það sé
raunhæf spá.
Álagningarprósentur fasteignaskatta eru óbreyttar en tekjur
bæjarsjóðs aukast þó um 7,5% vegna fjölgunar eigna á skrá og
breytinga á fasteignamati.
Gert er ráð fyrir að framlag Jöfnunarsjóðs lækki um 8% frá
áætlaðri niðurstöðu ársins 2009.
Reynt er að halda hækkunum þjónustugjalda í algjöru lágmarki en
almennt er gert ráð fyrir að gjaldskrár hækki þó ekki nái hækkunin
að halda í við verðlagsþróun undanfarinna ára. Sem dæmi má
nefna þá er ekki undan því komist að hækka gjöld í mötuneytum um
10% og leikskólagjöld um 5%. Önnur þjónusta eins og til
dæmis aðgangur í sund hækkar einnig en áskriftarmiðar minna
en einstök skipti og áfram verður ókeypis í sund fyrir bæjarbúa
yngri en 18 ára. Í öllum tilfellum er hagur bæjarbúa hafður
að leiðarljósi og hækkunum stillt í hóf eins og mögulegt
er.
Fjárhagsáætlanir einstakra deilda eru unnar í góðri samvinnu við
forstöðumenn stofnana og ber að þakka þann einlæga vilja og
jákvæðni sem starfsmenn hafa sýnt við gerð
fjárhagsáætlunarinnar. Enn sem fyrr er haft að leiðarljósi að
standa vörð um grunnþjónustuna og vernda störf eins og hægt
er. Enn er ætlast til að forstöðumenn komi til móts við
hækkanir launa og verðlags með mikilli hagræðingu bæði í innkaupum
og í starfsmannahaldi.
Helstu breytingar frá fyrra ári eru þessar:
- Breytingar hafa orðið á starfsmannahaldi félagsþjónustu sem
valda lækkun kostnaðar þeirrar deildar. Ennfremur er ljóst að
þörf til ýmissa liða þar er heldur minni en gert var ráð fyrir og
skilar það ákveðinni hagræðingu í rekstri deildarinnar.
- Fræðslumálum er úthlutað svo til sömu upphæð og fyrir árið 2009
en góður árangur hefur náðst í hagræðingu í þeim stóra málaflokki
og fyrir það ber að þakka. Þrátt fyrir það telur bæjarstjóri
að sú hagræðing hafi ekki bitnað á börnum bæjarins.
- Gert er ráð fyrir að hátíðahöld bæjarfélagsins verði með
óbreyttu sniði næsta ár nema að ákvörðun hefur verið tekin um að
tónlistarhátíðin Bjartar sumarnætur verður ekki haldin nema að til
komi styrkir frá utanaðkomandi aðilum sem fjármagnað geti hátíðina
að öllu leyti.
- Húsaleigusamningur bæjarins í Sunnumörk er bæjarfélaginu dýr og
tekur hækkunum miðað við verðlagsþróun. Á árinu 2010 mun
Hveragerðisbær greiða rúmar 50 milljónir í húsaleigu fyrir
bókasafn, bæjarskrifstofu og upplýsingamiðstöð fyrir utan hússjóð
en greiðslur í hann nema um 3 mkr. Samningurinn er óuppsegjanlegur
og gildir til 25 ára.
- Framlag bæjarfélagsins til Brunamála hækkar um 4,3 mkr og munar
þar um framlag Ölfusinga til reksturs slökkviliðsins en frá og með
áramótum mun Slökkvilið Hveragerðisbæjar ekki lengur sinna
vesturhluta Ölfuss eins og verið hefur í áratugi.
- Framlag til umferðar og samgöngumála hækkar um 12 mkr en þar
ber að geta þess að framlag Bjargráðasjóðs uppá 16 milljónir kom
til lækkunar þessa málaflokks árið 2009. Því verður dregið
saman í framkvæmdum við gatnakerfið á árinu 2010.
- Framkvæmdir verða með allra minnsta móti en gert er ráð fyrir
að gatnagerð sem hófst árið 2009 verði lokið á næsta ári og að
framkvæmdir við umhverfisúrbætur, gangstéttar, göngustíga,
kirkjugarð og við samningsbundna reiðvegagerð muni nema um 10
mkr. Þá er gert ráð fyrir að hafist verið handa við hönnun
viðbyggingar við grunnskólann og í þeirri vinnu verði horft
sérstaklega til mögulegrar áfangaskiptingar framkvæmdanna.
Enn eru nokkrar lóðir lausar í bæjarfélaginu og því er ekki gert
ráð fyrir nýframkvæmdum í gatnagerð á
árinu.
Áætlaðar heildartekjur Hveragerðisbæjar (aðalsjóðs, A- og B-
hluta) nema alls kr. 1.278 mkr. fyrir árið 2010.
Þar af eru skatttekjur ráðgerðar kr. 799 milljónir. Framlög
Jöfnunarsjóðs eru áætluð 177 mkr. og aðrar tekjur bæjarsamstæðu eru
rétt um 300 mkr. Rekstrargjöld og reiknaðar afskriftir samstæðu
nema um 1.200 mkr.
Niðurstaða samstæðu án fjármagnsliða er því jákvæð um 77 milljónir
sem er 6% af tekjum. Fjármagnsliðir eru áætlaðir 172 mkr og er
rekstrarniðurstaða samstæðu því neikvæð um 95 mkr. Gert
er ráð fyrir nokkurri lækkun fjármagnsliða milli ára en í áætlun er
gert ráð fyrir 5% verðbólgu. Náist bönd á verðbólguna
mun það aftur á móti beint skila sér í betri afkomu bæjarsjóðs og
sem dæmi um það má nefna að verði verðbólga 3,5% þá mun niðurstaða
ársins verða neikvæð um 67 mkr verði engin verðbólga á árinu 2010
mun samstæðan verða svo til hallalaus.
Í lok árs 2009 verða langtímaskuldir samstæðu 1.336
milljónir. Lífeyrisskuldbinding sveitarsjóðs verður 317
milljónir.
Afborganir langtímalána verða rúmlega 153 mkr og ný lántöka á árinu
2010, 70 mkr.
Nánari útfærsla einstakra liða mun koma fram i greinargerð sem lögð
verður fram við síðari umræðu um fjárhagsáætlun þann 17. desember
nk.
Aldís Hafsteinsdóttir
Bæjarstjóri
Eftirfarandi frétt er af heimasíðuDvalaheimilisins Áss:
Aðventan getur verið yndislegur tími. Fátt er huggulegra en að kveikja á kertum og hlusta á falleg jólalög. Heimilið er svo lánsamt að eiga góða að, margir hugsa fallega til okkar á þessum tíma m.a. með það í huga að gleðja heimilismenn með söng. Í liðinni viku kom Söngsveit Hveragerðis í sína árlegu jólaheimsókn og söng víðsvegar um heimilið við góðar undirtektir. Um hádegisbilið í gær komur þrír ungir söngfuglar, þær Berglind María Ólafsdóttir, Sædís Másdóttir og Kristín Munda Kristinsdóttir. Þær sungu nokkur jólalög eins og englar og fengu heimilsmenn til að taka undir með sér. Síðar sama dag komu í heimsókn, einnig í sína árlegu heimsókn, tónelska fjölskyldan, þau Sr. Jón Ragnarsson, Gyða Halldórsdóttir og sonur þeirra Ragnar. Þau sungu og léku á hljóðfæri þekkt jólalög. Er öllum þessu listamönnum færðar kærlegar þakkir fyrir heimsóknina.
Fimmtudagsmorguninn 10. desember fóru allir nemendur ásamt starfsfólki í vasaljósafriðargöngu. Lagt var af stað kl. 8:20 og gengið upp sundlaugarbrekkuna að Reykjum og þaðan í átt að Ölfusborgum. Genginn var góður hringur og komið heim í skóla um það bil 40 mínútum seinna. Veðrið var milt og myrkrið svart og því komu vasaljósin í góðar þarfir. Í ár breyttum við skipulagi göngunnar á þann veg að nú var nemendum raðað niður í vinahópa sem gengu saman. Þetta fyrirkomulag reyndist afar vel og var gangan sérstaklega ánægjuleg. Þegar horft var til baka við göngubrúna við NLFÍ var eins og jólasveinarnir væru búnir að setja jólaseríu utan í Reykjafjall. Vasaljósafriðargangan er orðin ein af ómissandi hefðunum okkar í Grunnskólanum.
Bestu kveðjur
Stjórnendur
11.
desember
Snjókarl
Eins og snjórinn er snjókarlinn persónugervingur vetrarins sem vinar. Veturinn er settur í rómantíska umgjörð sem við getum ráðið við, mótað og skapað.
© Guðrún Tryggvadóttir / www.natturan.is
11. glugginn var opnaður í morgun hjá Kjörís. Glugginn er staðsettur til hægri við innkeyrsluna að fyrirtækinu. Það var snjókarl sem birtist í glugganum í slagveðursrigningu sem hafði engin áhrif á hann. Börn úr 2. bekk í Grunnskólanum komu og voru viðstödd opnunina. Boðið var upp á íspinna og sungu krakkarnir jólalag.
10. desember
Jólasokkur
Jólasokkurinn- eða skórinn gegnir því hlutverki að taka við gjöfum jólasveinsins. Gjöf í skóinn er einskonar ósk um fararheill um lífsins veg. Vestan hafs er sokkur hengdur á arininn á jólanótt, en í Evrópu setja börnin skóinn sinn út í glugga, en aðeins eina nótt, aðfaranótt 6. desembers, á messu heilags Nikulásar.
Á Íslandi byrja börnin að setja skóinn sinn út í glugga þrettán dögum fyrir jól þar sem íslensku jólasveinarnir eru þrettán.
© Guðrún Tryggvadóttir / www.natturan.is
9.
desember
Grænn litur
Græni liturinn er andstæðulitur rauða litsins. Þeir mynda sterka heild saman en eyðileggjast við samruna. Allt frá frumkristni hefur græni liturinn verið tákn æskublóma og frjósemi Jarðarinnar og hann minnir okkur á lífið sjálft. Rauður og grænn saman endurspegla andstæðurnar í náttúrunni.
© Guðrún Tryggvadóttir / www.natturan.is
Hópur nemenda úr Grunnskólanum komu við opnun 9. gluggans sem er neðst í Laugaskarðsbrekkunni. Piparkökur runnu ljúflega niður í morgunrökkrinu.
Gangasöngur Grunnskólans í Hveragerði hefur vakið verðskuldaða athygli hér innan bæjarfélagsins enda er hann hluti af gömlum og góðum jólahefðum sem skapast hafa hér í Grunnskólanum. Nú hafa aðrir landsmenn fengið nasasjón af því hversu skemmtilegur siður þetta er en gangasöngnum voru gerð góð skil í kvöldfréttum Ríkissjónvarpsins í gærkvöldi. Þar mátti sjá hundruðir nemenda taka lagið undir styrkri stjórn Guðjóns Sigurðssonar, skólastjóra, við undirleik Heimis, Sævars og Páls. Eins og við var að búast tóku krakkarnir lagið "Snjókorn falla" sem er víst alvinsælasta lagið í gangasöng og ætlar þakið yfirleitt að rifna af skólanum þegar það er sungið. Gangasöngur er 2 - 3 sinnum í viku fram að jólum og næst verður sungið í fyrramálið.
Hér geta áhugasamir séð frétt Ríkissjónvarpsins um gangasönginn.
8. desember
Bjalla
Bjallan (klukkan) er mikilvægt tákn í öllum trúarbrögðum. Henni er ætlað að hjálpa okkur að finna hinn hreina hljóm sálarinnar, samhæfa og færa á æðra stig. Hátíðin hefst þegar klukkum er hringt.
© Guðrún Tryggvadóttir / www.natturan.is
Það voru litlir fingur leikskólabarna frá Óskalandi sem hringdu litlum jólabjöllum í Smágörðunum í morgun þegar 8. glugginn í jóladagatalinu var opnaður.
7. desember
Jólakúla
Hringur er hið fullkomna form, án upphafs eða endis, tákn Guðs og eilfíðar. Hin þrívíða kúla er bæði upphafspunkturinn og alheimurinn. Glansandi kúlur endurspegla umhverfið og virka því á dularfullan hátt á okkur og minna á stórkostleikann sem umlykur okkur og sem við erum hluti af. Jólakúlan er því eitt mikilvægasta jólatáknað í hugum okkar.
© Guðrún Tryggvadóttir / www.natturan.is
Fjölmenni var við opnunina. Bæði komu börn úr leikskólanum Undralandi og hópur frá grunnskólanum sem átti heiðurinn af skreytingum gluggans.
5. desember
Hjarta
Hjartað er tákn ástar og kærleika og vekur samstundis hlýjar tilfinningar með okkur. Það má segja að hjartað sé það tákn sem nýtur hve mestra vinsælda í nútímanum en sögulega séð er hjartaformið fremur nýtt af nálinni. Kærleikurinn kemst vel til skila í þessu samstæða mjúka formi og á því vel við jólin.
© Guðrún Tryggvadóttir / www.natturan.is
Þessi fallegi gluggi var opnaður í versluninni Kíano á laugardaginn. Aldís Hafsteinsdóttir, bæjarstjóri og nokkrir bæjarfulltrúar voru viðstaddir opnunina.
6.
desember
Kerti
Kertaljósið er í hefðbundnu jólahaldi okkar jólaljósið sjálft. Ljósið býr yfir djúpstæðri merkingu um jólaboðskapinn. Það býr yfir frumkraftinum; eldinum sem er táknrænn fyrir lífið sjálft, einkum hið innra líf. Það er ljósið innra með okkur; trúin, vonin og kærleikurinn.
© Guðrún Tryggvadóttir / www.natturan.is
Sjötti glugginn var opnaður við Iðavelli/Eden á öðrum í aðventu.
Stelpurnar okkar sigruðu KR í DHL höllinni í gærkvöldi í Subway bikarnum í körfuknattleik með 10 stiga mun, 64 - 74. KR stelpurnar hafa verið sigursælar í vetur í deildinni og voru bikarmeistarar síðasta árs. Hamars stelpur eru með sigrinum komnar í 8 liða úrslit.
Til hamingju stelpur og gangi ykkur sem best !
Sjá frétt á heimasíðu Hamars
4. desember
Könglar
Þeir bera fræ barrtrjánna. Könglarnir sem tréð gefur af sér eru nauðsynlegir fyrir áfram-haldandi tilveru stofnsins. Þannig hefur köngullinn án efa ratað inn í undirmeðvitund okkar sem eitt af hinum nauðsynlegu frjósemistáknum jólanna.
© Guðrún Tryggvadóttir / www.natturan.is
Í morgun opnaði Blómaborg fallega skreyttan jólaglugga. Grunnskólabörn úr 2. bekk voru viðstödd opnunina og buðu Helga og Harpa Rós börnunum upp á mandarínur og piparkökur.
3. desember
Piparkökuhús
Húsið sem slíkt stendur fyrir okkur sjálf, sálina og bústað hennar í líkamanum. Húsið er bakað í ofni (hreinsunareldi), skreytt og borðað til næringar og gleði, ekki síst til að halda upp á lífið sjálft.
© Guðrún Tryggvadóttir / www.natturan.is
Opnaður var í morgun þriðji glugginn í jóladagatali bæjarins í Hverabakaríi. 1. bekkur úr grunnskólanum var viðstaddur opnunina og birtist fallegt og upplýst piparköku-jólaþorp í glugganum. Starfsfólk Hverabakarís bauð börnunum og viðstöddum upp á kakómjólk og piparkökur.
2.
desember
Jólastjarnan
Stjörnutáknið er eitt elsta tákn
mannkyns og var notað löngu fyrir ritmál.
Stjarnan var notuð sem vörn gegn illum öndum og er tákn öryggis og
innri hamingju. Í kristinni trú er stjarnan tákn boðunar og komu
frelsarans og leiðir okkur að ljósinu. Jólastjarnan (Euphorbia
pulcherrima) hentar vel sem stjörnutákn hér í skammdeginu þar sem
hún blómgast um vetrarsólhvörf.
© Guðrún Tryggvadóttir / www.natturan.is
2. glugginn í jóladagatali bæjarins var opnaður í morgun við Garðyrkjustöð Ingibjargar. Glugginn er hinn glæsilegasti og komu leikskólabörn frá Óskalandi og voru viðstödd opnunina. Starfsfólk garðyrkjustöðvarinnar buðu upp á kakó og piparkökur og sungu leikskólabörnin jólasöngva.
Aðventukrans
Aðventukransinn skipar stóran sess í undirbúningi jólanna. Hann er hringur og undirstrikar hið óendanlega og er tákn Guðs og eilífðar. Kertin fjögur á kransinum undirstrika tímamælinguna. Orðið aðventa merkir að það líði að jólum.
© Guðrún Tryggvadóttir / www.natturan.is
Það voru leikskólabörn á Undralandi sem afhjúpuðu fyrsta gluggann við lystigarðinn á Fossflöt ásamt Guðmundi Þór Guðjónssyni, form. bæjarráðs. Einnig eru starfsmenn bæjarins sem hafa komið að verkinu þau Elfa Dögg Þórðardóttir, verkefnastjóri jólasýningarinnar,Jóhanna M. Hjartardóttir og Árni Svavarsson. Lengst til hægri er hönnuður táknbókanna sem munu standa við alla gluggana, Guðrún Tryggvadóttir.
Guðrún Tryggvadóttir myndlistarmaður hefur tekið saman þau tákn sem einkenna jólaglugga bæjarins. Guðrún tengir viðfangsefnið jólum, umhverfinu, okkur sjálfum og náttúrunni.
Þessar hugleiðingar Guðrúnar skýra táknin sem tengjast jólagluggunum:
„Hátíðleiki jólanna er ekki sjálfgefinn og verður ekki raunveruleg upplifun nema við tökum þátt í ákveðnum menningar- og sögulega tengdum athöfnum og gjörðum sem hafa djúpa þýðingu fyrir okkur sem manneskjur, hvort sem við gerum okkur grein fyrir því eða ekki.
Tákn jólanna eru klassísk og tengjast bæði náttúrunni sjálfri og andlegum og trúarlegum hlutum, verum og hugmyndum. Táknin tala til sálar okkar með „dularfullum" hætti en með aðferðum myndgreiningar s.s. lita- og formfræði og þekkingar á þeim táknum sem hafa menningarsögulega skírskotun má nálgast það að skilja þýðingu hvers tákns fyrir sig og þannig komast nær því að gera sér grein fyrir raunverulegri þýðingu táknanna fyrir okkur sem mannverur í þessari tilveru okkar.
Stór hluti hátíðleiks jólanna felst í barnslegri „tilhlökkun" um að draumar rætist og fullorðinslegri „von" um að allt fari vel að lokum og daginn lengi á ný. Það er á ábyrgð foreldranna að tilhlökkun barnanna sé haldið lifandi og það er gríðarlega mikilvægt að börnin okkar fái að hlakka til og upplifa lífið sem eitthvað sem leyfir draumum að rætast en er einnig sem stórt leyndarmál. Það hlýtur að vera mjög mikilvægt fyrir þroska barnsins þannig að það geti hlakkað til lífsins sem framundan er.
Jólin eru hin raunverulega hátíð lífsins á jörðinni, ekki eingöngu fæðingar Jesú Krists þó að í okkar samfélagi tengist hún kristninni. Flest ef ekki öll samfélög heimsins hafa hátíðir á þessum tíma árs, eða um sín áramót enda þurfa allir menn að tilbiðja lífið og náttúruna, móður sína og loka hringveginum um sólina, sem árið er.
Jólin hjálpa okkur í gegnum veturinn og minna okkur á að lífið vaknar aftur eftir langan vetur (ber, könglar, hnetur, greni o.fl.) með því að mæla tímann og hlakka til með því að „telja niður að" galdri lífsins fæðingu frelsarans, þegar lífið vaknar.
Jóladagatöl hafa sögulega hefð á Íslandi og víða um heim og eru eitt mikilvægast „tilhlökkunartæki" fyrir börnin okkar. Dagatal í formi glugga sem fyrirtæki í bænum og börn í Grunnskólanum vinna úr ýmsum efnivið verða „opnaðir" einn af öðrum fram að jólum en það er nýjung í því að koma dagatali fyrir í bæjarumhverfi og móta í raun litla jólasýningu. Ég vona að gluggarnir og skilaboðin í opnu bókunum sem standa við hvern glugga eigi eftir að varpa ljósi á þýðingu jólanna og merkingu táknanna fyrir okkur mannfólkið.
Glugginn hefur ákveðna táknræna þýðingu. Hann myndar einskonar skil milli tveggja heima, og tengist jólunum á ýmsa vegu í hugum okkar. Það er útbreyddur siður að skreyta gluggana sína fyrir jólin. Frá 1. til 24. desember opna gluggar víðs vegar um Hveragerðisbæ. Fylgist með hvaða tákn fylgja hvaða degi því bráðlega verður spurningaleikur um tákn hvers glugga sendur heim til allra íbúa bæjarins."
Á morgun verður formlega opnaður fyrsti glugginn í jóladagatali Hveragerðisbæjar.
Nemar á blómaskreytingabraut Landbúnaðarháskólans á Reykjum skreyttu gluggann sem verður opnaður við innganginn í Fossflatargarðinum, neðst í Gossabrekkunni klukkan 10. Leikskólabörn á Undralandi koma og vígja hann sérstaklega ásamt formanni bæjarráðs, Guðmundi Þór Guðjónssyni.
Boðið verður upp á kakó og piparkökur í tilefni dagsins.
Guðrún Tryggvadóttir myndlistarmaður og framkvæmdastjóri www.natturan.is á veg og vanda að hönnun þeirra tákna og bóka sem munu birtast í jólagluggum bæjarins fram að jólum.
Elfa Dögg Þórðardóttir
Mannvirkja- og umhverfisfulltrúi Hveragerðisbæjar.
Ljós verða tendruð á jólatré bæjarbúa á morgun, fyrsta sunnudag í aðventu, kl. 17. Í ár er jólatréð staðsett á torginu við smágarðana við Hótel Örk en þar er talið að það njóti sínbetur en á miðbæjartorginu þar sem aspirnar hafa gerst frekar til plássins hin síðustu ár. Unnur Þormóðsdóttir, bæjarfulltrúi, mun flytja ávarp við athöfnina og síðan munu jólasveinarnir taka sér hlé frá jólaundirbúningnum og bregða sér til byggða til að syngja með börnunum hér í Hveragerði og færa þeim eitthvað hollt góðgæti.
Að athöfn lokinni býður Skátafélagið Strókur uppá kakó og kökur í nýuppgerðu húsnæði félagsins við Breiðumörk. Núer um að gera að búa til góðar minningar fyrir börnin mæta og sjá ljósin kvikna á trénu og gæða sér síðan á góðgæti í boði skátanna um leið og endurbætur á húsnæði þeirra eru skoðaðar.
Við hreinsun eða útskolun lagnanna er beitt miklum vatnsþrýstingi og hefur borið á því að vatnslásar í gólfniðurföllum og hreinlætistækjum hafi tæmst með tilheyrandi ólykt. Í nokkrum tilfellum hefur skólp runnið upp um gólfniðurföll en sem betur fer hefur það ekki, svo vitað sé, valdið tjóni. Þeir húseigendur, sem lenda í slíkum uppákomum eru beðnir velvirðingar á því og gott væri að þeir upplýstu byggingarfulltrúa um málið í síma 4834000 eða á netfangið gfb@hveragerdi.is. Verktakanum er uppálagt að gæta ýtrustu varúðar við hreinsunina.
Á næstu dögum mun fréttabréf Hveragerðisbæjar koma inn um bréfalúgur bæjarbúa. Þar eru fréttamolar frá starfsmönnum bæjarins um það helsta sem er á döfinni og stuttar greinar um ýmis mál sem gott er að hafa á einum stað.
Aðalefni fréttablaðsins er viðburðadagatal bæjarins sem kemur út nú í annað sinn. Þar er samantekt frá félögum, hópum og stofnunum bæjarins á flestum þeim viðburðum sem verða í bænum fram yfir hátíðarnar. Heimasíða bæjarins www.hveragerdi.is kynnir breytingar og viðbætur ef þurfa þykir. Dagskráin er fjölbreytt og geta bæjarbúar notið þess að lyfta sér upp í jólaundirbúningnum við leik, söng eða upplestur.
Jólahátíðin, Jól í bæ, er samstarfsverkefni bæjarins, grunnskóla, leikskólana og fyrirtækja. Jólaandinn verður yfir bænum okkar og munum við opna jólagluggadagatal hjá ýmsum fyrirtækjum og stofnunum í bænum frá 1. desember til aðfangadags jóla. Það er von okkar að þessi nýbreytni veki lukku hjá bæjarbúum og þeir taki virkan þátt í gleðinni.
Njótið friðar í jólaundirbúningnum
Jóhanna M. Hjartardóttir
Menningar- og frístundafulltrúi
Eftirfarandi frétt er af vef Umhverfisstofnunar:
--------------------------------------
Mælingar á brennisteinsvetni
13.11.2009
Síðan í febrúar á þessu ári hefur Umhverfisstofnun verið með
mælingar á brennisteinsvetni í Hveragerði. Niðurstöður þeirra má
sjá á meðfylgjandi línuritum. Sjá má að hæstu sólahringsmeðaltöl
eru á bilinu 35-40µg/m3 sem er um fjórðungur af
heilsuverndarviðmiðum Alþjóða heilbrigðismálastofnunarinnar (WHO).
Hæstu klukkutíma meðaltöl eru nokkuð hærri eða rúmlega
180µg/m3.
Í dag eru ekki til nein viðmiðunarmörk um brennisteinsvetni fyrir
almenning hér á landi en reglugerð um það er í vinnslu. Mjög
mismunandi er milli landa hvaða mörk gilda fyrir almenning en víða
eru sett fram mörk fyrir bæði klukkutíma- og sólahringsmeðaltal.
Sem dæmi má nefna að í Bandaríkjunum eru mörk mjög misjöfn milli
ríkja, hæsta sólahringsmeðaltal er leyft í Oklahoma eða 300µg/m3 en
einna lægst í Vermont eða 8µg/m3. Í Kaliforníu hafa verið sett
svokölluð óþægindamörk og eru þau 42 µg/m3 fyrir
klukkutímameðaltal. Á meðfylgjandi mynd má sjá mælingar á
klukkutímameðaltali í Hveragerði og til viðmiðunar mörk þriggja
ríkja Bandaríkjanna, Arisona, Pennsylvaniu og Hawaii. Á annarri
mynd má sjá sólarhringsmeðaltal og heilsuverndarmörk WHO.
Einu mörkin sem fyrir brennisteinsvetni sem í gildi eru á landinu
eru vinnuverndarmörk. Vinnuverndarmörk fyrir brennisteinsvetni eru
15.000 µg/m3 fyrir 8 klukkutíma vinnudag. Umhverfisstofnun telur
rétt að benda á að þegar kemur að því að meta þá mengun sem
almenningur verður fyrir þá eru vinnuverndarmörk ekki nothæfur
mælikvarði. Vinnuverndarmörk vernda ekki heilsu þeirra sem eru
viðkvæmir fyrir og gilda aðeins á vinnustöðum og miða við að
jafnvel þurfi stundum að grípa til persónuhlífa eins og ryk- eða
gasgríma. Vinnuverndarmörk eru oft um 100 sinnum hærri en þau mörk
sem gilda fyrir almenning. Sem dæmi má nefna að svifryksmengun eins
og hún gerist verst á gamlárskvöld í Reykjavík er nokkuð undir
vinnuverndarmörkum en hinsvegar vel yfir heilsuverndarmörkum fyrir
almenning.
Mælirinn í Hveragerði er staðsettur í vestanverðum bænum, um 700
metrum vestan við jarðhitasvæðið í bænum. Mælingar sýna að hæstu
styrkirnir mælast í vestlægum áttum sbr. meðfylgjandi
vindrós.
Hægt er að smella á myndirnar til að sjá þær í hærri upplausn.
Safnahelgi á
Suðurlandi verður haldin í annað sinn helgina 5. – 8.
nóvember.
Fjölbreytt menningardagskrá og uppákomur um allt Suðurland.
Söfn, sýningar, fyrirlestrar, bíó, markaðir, tónlist, söngur,
bækur, myndlist,
ljósmyndir, hagyrðingar, söguslóðir, handverk, útskurður, vefnaður,
ást og
erótík, gönguferðir og opin hús svo fátt eitt sé nefnt.
Veitingahúsin bera
fram rammíslenskan mat úr heimabyggð og ýmis tilboð hjá
ferðaþjónustuaðilum.
Dagskráin er það fjölbreytt að allir ættu að geta fundið eitthvað við sitt hæfi jafnt ungir sem aldnir. Í Hveragerði er sérstök dagskrá í Bókasafninu, Listasafni Árnesinga og á Heilsustofnun NLFÍ.
Dagskrána í heild má finna hér og á www.sofnasudurlandi.is
Viðurkenning Vinnueftirlitsins til fyrirtækja sem skarað hafa
framúr voru afhent við hátíðlega athöfn á Vinnuverndarráðstefnunni
2009
sem haldin var á Grand Hótel í dag, 20. október 2009
Það er okkur Hvergerðingum sérstakur heiður að Leikskólinn Óskaland
skyldi hljóta þessa viðurkenningu í ár ásamt Fiskiðjunni Flateyri.
Gunnvör Kolbeinsdóttir leikskólastjóri og Guðlaug Jónsdóttir,
aðstoðarleikskólastjóri, tóku á móti viðurkenningunni sem er mikill
heiður og viðurkenning á því góða starfi sem unnið hefur verið á
leikskólanum Óskalandi undanfarin ár. Við Hvergerðingar óskum
Gunnvöru og Guðlaugu og öllu þeirra starfsfólki innilega til
hamingju með viðurkenninguna.
Rökstuðningur Vinnueftirlits ríkisins:
Á leikskólanum starfa um 25 manns. Fjöldi barna er 92. Leikskólinn
var byggður 2004 og stækkaður 2007. Hjá leikskólanum er stöðugt og
markvisst unnið að vinnuvernd. Starfsmenn leikskólans tóku þátt í
að skipuleggja húsnæðið á hönnunarstigi og komu með margar tillögur
þar af lútandi. Þar á meðal fóru þau og skoðuðu aðra leikskóla á
Suðurlandi. Úr varð langur listi af atriðum sem betur mættu fara.
Hljóðhönnun leikskólans tókst vel en að auki nota starfsmenn
markvisst mottur og annað til að draga úr hávaða.
Öryggistrúnaðarmannakerfið og áhættumatið er til fyrirmyndar hjá
leikskólanum. Á kaffistofu leikskólans er afburða vel upp sett
starfsmannahandbók um vinnuverndarmál. Heilsufarsskoðanir hafa
verið gerðar reglulega en við þær komu í ljós veikindi starfsmanna
sem þeir vissu ekki af sjálfir sem leiddi til að brugðist var við
strax í framhaldinu. Leikskólinn hefur einnig vel upp setta
viðbragðsáætlun vegna svínaflensu.
Mikið er gert til að þess að koma í veg fyrir óþarfa líkamlegt álag
og má í því sambandi nefna að stólar og borð starfsmanna og barna
eru til mikillar fyrirmyndar. Einnig eru notaðir svokallaðir
gólfstólar og fiskistólar sem draga úr álagi þegar unnið er með
börnunum.
Mikið er gert til að efla andlega og félagslega líðan starfsmanna,
m.a. farið í óvissuferðir, haldnir “líða vel dagar” og prjónað
saman.
Neyðaráætlun og rýmingaráætlun leikskólans eru æfðar
starfsdögum.
Það er mat Vinnueftirlitsins að hið kerfisbundið vinnuverndarstarf
hjá Leikskólanum Óskaland sé til fyrirmyndar og til þess fallið að
draga úr slysahættu og heilsutjóni og því veitum við þeim
viðurkenningu hér í dag.
Kaupsamningur og afsal af Sólborgarsvæðinu var lagður fram og samþykktur á fundi bæjarstjórnar þann 8. október síðast liðinn. Með samningnum eignast Hveragerðisbær77,4 ha spildu lands sem nær til alls lands innan marka Hveragerðisbæjar austan við Varmá og greiðir fyrir 62,5 mkr. Með í kaupunum fylgir samþykkt deiliskipulag af svæðinu sem fyrirtækið Eykt vann í kjölfar hugmyndasamkeppni sem fór fram árið 2006.
Með undirskriftt samninganna falla úr gildi aðrir samningar milli Hveragerðisbæjar og Eyktar ehf um uppbyggingu á svæðinu en ljóst var orðið eftir efnahagshrunið haustið 2008 að forsendur voru brostnar fyrir uppbyggingunni og ekki síður þeim uppbygginarhraða sem þarvar fyrirhugaður. Bæjarstjórn mat hagsmuni bæjarins það mikla í þessu máli að ákveðið var að greiða fyrirtækinu sem svarar þeim kostnaði sem það hafði lagt út fyrir og að bærinn myndi í kjölfarið eignast landið.
Á samþykktu deiliskipulagi er gert ráð fyrir þéttri byggð
einbýlis-, rað-, og parhúsa. Fjölbýlishúsum og atvinnu- og
þjónustuhúsum auk skólamannvirkja og íþróttahúsi. Íbúafjöldi á
svæðinu gæti orðið rúmlega 2.000 manns miðað við það skipulag sem í
gildi er á svæðinu. Því er ljóst að hagsmunir Hvergerðinga til
langs tíma felast í forræði yfir skipulagi svæðisins og þrátt fyrir
að ekki sé raunhæft að halda að uppbygging verði hröð næstu árin þá
hefur Ísland áður unnið sig út úr kreppu og nauðsynlegt er í
þessari stöðu að unnið séí haginn fyrir komandi kynslóðir.
Bæjarstjóri hefur þegar gengið frá kaupunum en Virðing ehf
fjármagnaði kaupin með láni til 30 ára með veði í landinu
sjálfu.
Bæjarstjórn hefur samþykkt að taka upp þriggja tunnu
sorpflokkunarkerfi í bæjarfélaginu frá og með 1. desember 2009.
Viðauki við gildandi samning milli Hveragerðisbæjar og Íslenska
gámafélagsins(ÍG) um þjónustuna var samþykktur af bæjarstjórn þann
8. október en á þann fund mætti forstjóri fyrirtækisins Jón Þórir
Frantzson og kynnti innleiðingu, fyrirkomulag og framtíðarskipulag
sorphirðu hér í Hveragerði. Kerfið sem Íslenska gámafélagið hefur
innleitt í nokkrum sveitarfélögum gengur í daglegu tali undir
heitinu "Stykkishólmsleiðin" en Stykkishólmur var fyrsta
sveitarfélagið til að gera samning við ÍG um þriggja tunnu flokkun,
svokallað þriggja tunnu kerfi.
Með viðaukasamningnum munu bæjarbúar taka skrefið til fulls í
flokkun sorps og hefja flokkun sorps og moltugerð lífræns úrgangs
frá öllum heimilum í bæjarfélaginu. Er þetta skref í fullu samræmi
við yfirlýsta stefnu bæjarfélagsins í umhverfismálum en Hveragerði
var eitt fyrsta sveitarfélagið á landinu til undirrita
Ólafsvíkuryfirlýsingu og hefja vinnu í anda Staðardagskrár 21. Nú
er hafin vinna við vottun bæjarfélagsins sem Green Globe samfélags
og er innleiðing flokkunar mikilvægt skref í þeirri vinnu.
Rétt er að geta þess að í ljósi yfirvofandi lokunar
sorpurðunarstaðarins að Kirkjuferju er mikilvægt að leitað verði
allra leiða til að minnka urðun og flutning sorps út úr
bæjarfélaginu og þar með þann kostnað sem óhjákvæmilega myndi ella
falla á bæjarbúa. Með þessari breytingu á sorphirðu í bæjarfélaginu
telur bæjarstjórn að hægt sé að stilla hækkun kostnaðar vegna
sorphirðu og urðunar í hóf auk þess sem stórt skref er stigið í átt
að uppfyllingu markmiða í þegar samþykktri svæðisáætlun um
meðhöndlun sorps en þar er lofað minnkun á sorpi til urðunar um 70%
og að allri urðun lífræns úrgangs verði hætt árið 2020. Hækkun
mánaðarlegs gjalds verður á milli 8-900 krónur pr. mánuð á heimili
en fyrir þá sem þegar greiða fyrir græna tunnu umtalsvert
minna.
Nánari upplýsingar um þriggja tunnu kerfið má finna á síðunni www.flokkarinn.is
eða á heimasíðu
Íslenska gámafélagsins.
Breyting á Aðalskipulagi Hveragerðisbæjar 2005-2017 "Tvöföldun Suðurlandsvegar og aðlögun á landnotkun" var staðfest af Umhverfisráðherra þann 5. október 2009.
Hveragerðisbær er því tilbúinn með skipulagslegar forsendur fyrir tvöföldun Suðurlandsvegar. Umhverfisráðherra hefur nú þegar staðfest aðalskipulagsbreytingu Sveitarfélagsins Ölfuss vegna tvöföldunar Suðurlandsvegar frá Sandskeiði að Hveragerði. Því ætti Vegagerðinni ekki að vera neitt að vanbúnaði að bjóða út fyrsta áfanga tvöföldunarinnar um leið og fjármagn finnst til verksins.
Það hefur sýnt sig að hættulegasti hluti vegarins á milli Reykjavíkur og Árborgar er kaflinn á milli Hveragerðis og Selfoss og því er brýnt að ráðast í tvöföldun hans. Vegagerðin hefur í sumar gert nokkrar bráðabirgða úrbætur á þessum kafla með breikkun akbrauta við vegtengingar inn á veginn, sem er til bóta.
Sveitarfélögin Ölfus og Árborg eru nú að gera nauðsynlegar aðalskipulagsbreytingar svo hægt sé að hefja framkvæmdir við tvöföldun vegarins á milli Hveragerðis og Selfoss. Væntanlega ná þær fram að ganga síðar í vetur.
Vegagerðin gerir ráð fyrir að Suðurlandsvegur á milli Reykjavíkur og Litlu kaffistofunnar og milli Hveragerðis og Selfoss verði 2+2 vegur. 2+1 vegur verði milli Litlu kaffistofunnar og Kambabrúnar og 2+2 vegur í þröngu sniði verði í Kömbum. Samhliða framkvæmdum við Suðurlandsveg er gert ráð fyrir að lagðar verði reið-, göngu- og hjólaleiðir alla leið frá Reykjavík að Selfossi.
Bæjarstjórn hefur ítrekað óskað eftir því við opinbera eftirlitsaðila að þeir hlutist til um það að Orkuveita Reykjavíkur setji uppmæli vegna loftmengunar af völdum brennisteinsvetnis hér í Hveragerði. Því miður hefur uppsetningin dregist nokkuð en í þessari viku er nú unnið að því að koma mælinum upp og á að hann að verða gangsettur í lok vikunnar eða byrjun þeirrar næstu.
Mælinum hefur verið fundinn staður við kyndistöðina við Finnmörk en vegfarendur hafa undanfarið orðið varir við þónokkrar framkvæmdir á staðnum af þessum ástæðum.
Mælinum fylgir veðurstöð enda er mikilvægt að hægt sé að tengja saman vindátt og mæld gildi brennisteinsvetnis í andrúmslofti okkar bæjarbúa.
Mælitækin er hin vönduðustu að gerð en mælistöðin og veðurbúnaðurinn er frá fyrirtækinu Met One en brennisteinsvetnismælirinn sjálfur frá Thermo Scientific. Vonir standa til að mælingarnar verði aðgengilegar öllum í rauntíma á netinu auk þess sem gögnum verður safnað saman vegna rannsóknargildis þeirra.
Bæjarstjórn tekur undir álit skipulags- og bygginganefndar með eftirfarandi bókun:
Bæjarstjórn mótmælir harðlega tillögum um iðnaðarsvæði við Bitru þar sem hún telur að fyrirhugaðar framkvæmdir á svæðinu muni hafa veruleg skaðleg áhrif bæði á umhverfi og samfélag einkum í Hveragerði og nágrenni. Bæjarstjórn vísar í þessu sambandi í umsagnir sínar um sama mál frá 2007 og 2008, þar sem hún telur að fyrirhugaðar framkvæmdir muni hafa skaðleg áhrif á möguleika Hveragerðis og nágrennis sem íbúða-, heilsu- og ferðamannasvæðis.
• Í útsendum gögnum er ekki minnst einu orði á hugsanleg alvarleg áhrif af losun brennisteinsvetnis og annarra eiturefna frá Bitruvirkjun á líf og heilsu íbúa í Hveragerði. Bæjarstjórn mótmælir því harðlega að íbúar Hveragerðis og næsta nágrennis verði notaðir sem tilraunadýr, þegar horft er til þeirra alvarlegu áhrifa sem brennisteinsvetni, í því magni sem hér um ræðir, getur haft á heilsu fólks skv. því sem Alþjóða heilbrigðismálastofnunin (WHO) hefur þegar bent á í skýrslu stofnunarinnar (Sjá skýrslu WHO: Hydrogen Sulfide: Human Health Aspects, Genf, 2003). Sönnunarbyrðin og hin siðferðislega ábyrgð liggur hér alfarið hjá Orkuveitu Reykjavíkur og Sveitarfélaginu Ölfusi sem ber ábyrgð á skipulagsmálum svæðisins.
• Bæjarstjórn lýsir sérstökum áhyggjum af því að Reykjadalur og nágrenni verði á löngum tímabilum hugsanlega óhæfur til útivistar vegna mengunar af völdum brennisteinsvetnis. Mikil hætta er á að ferðaþjónusta skaðist af völdum fyrirhugaðra virkjunarframkvæmda með því að það bakland sem hún byggir á verði ónothæft með einhverjum hætti.
• Í Hveragerði eru reknar mikilvægar stofnanir á sviði öldrunar og heilsuverndar þ.e. Dvalarheimilið Ás og Heilsustofnun NLFÍ. Mengun af völdum eiturefna eða jafnvel minnsti grunur um slíka mengun yrði þessum stofnunum til óbætanlegs tjóns og myndi skaða alla framtíðarmöguleika um uppbyggingu heilsu- og ferðamannaþjónustu i bæjarfélaginu en slík uppbygging hefur verið yfirlýst stefna bæjaryfirvalda til margra ára.
• Blásandi borholur við Hellisheiðarvirkjun og Hverahlíð valda nú þegar óþægindum hjá þeim sem aka þjóðveginn yfir Hellisheiði. Ekki hefur enn verið settur upp virkur hreinsibúnaður fyrir brennisteinsvetni eða aðra eiturefnamengun á Nesjavallavirkjun og Hellisheiðarvirkjun en slíkt er algjör forsenda þess að farið sé í frekari jarðhitavirkjanir á svæðinu.
• Bæjarstjórn mótmælir tillögum um afléttingu vatnsverndar í kringum Bitru og Hverahlíð. Bæjarstjórn telur að ekki sé sýnt fram á það með óyggjandi hætti að vatnsból muni ekki mengast af völdum virkjanaframkvæmda á svæðinu. Minnsti efi um þetta atriði er með öllu óásættanlegur.
Bæjarstjórn hvetur Alþingi eindregið til að vinna að friðun Bitrusvæðisins og næsta nágrenni þess fyrir hvers kyns virkjanahugmyndum eða öðrum iðnaðarframkvæmdum og hlúa þannig að því sem útivistarsvæðis. Jafnframt eru orkufyrirtækin hvött til þess að kynna sér betur sjónarmið Hvergerðinga og þær rannsóknir sem til eru um áhrif brennisteinsvetnismengunar á mannslíkamann.
Ísland hefur alla burði til að vinna að sjálfbærri þróun og að taka þannig forystu á heimsvísu í þeim efnum. Virkjanir orku í landinu eru almennt þess eðlis að náðst hafa sæmilegar sættir um þær sem sjálfbærar. Aldrei getur náðst sátt um það að ráðast í svo umdeilda framkvæmd sem virkjun Bitru er. Virkjunin mundi einungis skaða góða ímynd orkugeirans bæði innanlands sem utan.
Forvarnardagur 2009 verður haldinn í öllum grunnskólum landsins í dag 30. september. Dagurinn er helgaður nokkrum heillaráðum sem geta forðað börnum og unglingum frá fíkniefnum, ráðum sem eiga erindi við allar fjölskyldur í landinu.
Forvarnardagurinn er haldin að frumkvæði forseta Íslands í samvinnu við Samband íslenskra sveitarfélaga, Íþrótta- og Ólympíusamband Íslands, Ungmennafélag Íslands, Bandalag íslenskra skáta, Reykjavíkurborg, Háskóla Íslands og Háskólann í Reykjavík.
Í Grunnskólanum í Hveragerði er sérstök dagskrá í tilefni dagsins. Þór Ólafur Hammer frá Skátafélaginu Stróki ræðir við nemendur 9. bekkjar. Einnig spjallar Jóhanna M. Hjartardóttir menningar- og frístundafulltrúi við krakkana. Guðríður Aadnegard námsráðgjafi hefur umsjón dagskránni.
Rétt er að minna á að næstkomandi fimmtudag eða þann 1. okt. næstkomandi tekur nýr verktaki við akstri á leið 51, SBA (Sérleyfisbílar Akureyrar). Búið er að halda fund með nýjum vagnstjórum þar sem farið var vandlega yfir þá þjónustu sem hér er veitt, stoppistöðvar og annað. Það sem mögulega gæti villt um fyrir fólki fyrstu dagana er að framvegis verða vagnarnir í öðrum lit. Fyrri vagnar voru gráir og hvítir en vagnar SBA eru ljósir og bláir.
Áberandi spjöld verða sett í framrúðu bílanna til að ítreka leiðanúmerið svo allir þekki nú sinn vagn.
Engar breytingar verða á leiðakerfi eða tímatöflu vagnanna þannig að notendur geta áfram treyst á hið góða kerfi sem byggt hefur verið upp.
Síðastliðinn föstudag var heimilið Bæjarássem starfrækt er af DvalarheimilinuÁsi formlega opnaðen heimilið hefur verið starfrækt í um mánuð. Boðið var til veislu í tilefni dagsins, heimilisfólk og starfsfólk hjálpaðist að við baksturinn og annan undirbúning. Heimilismaðurinn Haukur Sigurjónsson klippti á borðann og Gísli Páll Pálsson framkvæmdastjóri í Ási hélt ræðu. Þá leiddi Steinunn Svanborg Gísladóttir, forstöðukona Bæjaráss, fólk í allan sannleika um lífið í Bæjarási. Þar búa nú fjórir heimilismenn í hjúkrun, einn einstaklingur kemur í hvíld á sex vikna fresti og fjórir til fimm einstaklingar úr Hveragerði eru þar í dagdvöl. Í Bæjarási býr einnig kettlingurinn Hnoðri og hænur hafa aðsetur í upphitaðri "hænsnahöll" í garðinum. Þá kemur daglega hundur í heimsókn. Bæjarás er fyrsta heimilið hér á landi sem byggt er frá grunni á svokallaðri Eden hugmyndafræði. Á Akureyri hafa öldrunarheimilin hafið innleiðingu hugmyndafræðinnar.
Útrýmum leiða, einmanaleika og
vanmáttarkennd
Eden hugmyndafræðin á upphaf sitt að rekja til Bandaríkjanna en
hugmyndafræðingurinn William Thomas var yfirlæknir á hefðbundnu
hjúkrunarheimili þar í landi. Hann fann út að fyrir utan ýmsa
krankleika sem hrjá aldraða þá var það einkum þrennt sem amaði að
heimilisfólki, leiði, einmanaleiki og vanmáttarkennd. Hann ákvað að
taka mál í sínar hendur og stofnaði hjúkrunarheimili þar sem hann
markvisst vann að því að útrýma þessu þrennu. Það er meðal annars
gert með því að fólk ráði sér sem mest sjálft þó það sé komið á
hjúkrunarheimili, stórum heimilum er skipt í mörg lítil heimili og
heimilisfólk er með í ákvarðanatökum. Þá er áhersla lögð á dagleg
samskipti við börn, lifandi plöntur og gæludýr. Í dag eru heimilin
um 500 í Bandaríkjunum, um 30 í Danmörku og félagsmálaráðherra
Færeyja, Hans Pauli Ström, hefur lýst því yfir að öll
öldrunarheimili í Færeyjum verði rekin í anda þessarar
hugmyndafræði.
Þessi frétt er tekin af heimasíðu Dvalarheimilisins Áss http://ás.is/ þar
sem lesa má nánar um opnunina og sjá fjölda skemmtilegra mynda.
Með góðum vilja má halda því fram að fyrsta skóflustungan að mjúkhýsinu sem svo mjög hefur verið rætt um hafi verið tekin í liðinni viku þegar starfsmenn áhaldahúss ásamt skipulags- og byggingafulltrúa tóku níu prufuholur á fyrirhuguðum byggingareit til að kanna jarðvegsdýpt og aðstæður á svæðinu.
Helstu niðurstöður úr þessari könnun voru í alla staði mjög jákvæðar. Landið er afar flatt en hæðarmunur á öllum reitnum er rétt um 1 metri sem er framar öllum væntingum á svona stóru svæði. Jarðvegsdýpi er á bilinu 1,2 - 2,3 metrar sem einnig telst afar jákvætt. Í framhaldi af þessum mælingum mun verkfræðingur vinna kostnaðarútreikning semverður hafður til kynningar á borgarafundinum um mjúkhýsið sem fyrirhugaður er á árinu.
Á meðfylgjandi mynd má sjá starfsmenn áhaldahúss ásamt Peter Jessen verkfræðingi sem fylgdist með könnuninni á svæðinu.
Bæjarstjóri ásamt fulltrúum nemenda í 10. bekk undirrituðu í vikunni samning um aðstoð nemendanna við skólastarf í Grunnskólanum í Hveragerði. Með samningnum taka nemendurnir að sér að aðstoða í mötuneyti skólans. Þau munu annast gæslu í frímínútum og í hádegi ásamt skólaliðum og kennurum og annast gæslu á skólaskemmtunum elsta stigs. Fyrir þessa vinnu mun bæjarsjóður greiða nemendunum kr. 50.000,- á mánuði og skal upphæðin renna óskipt í ferðasjóð nemenda. Til þess að greiðsla fari fram þurfa nemendur að framvísa til bæjargjaldkera staðfestri yfirlýsingu umsjónarkennara á því að sú vinna sem kveðið er á um í samningnum hafi verið unnin samkvæmt starfslýsingu. Bæjarstjóri, Aldís Hafsteinsdóttir, lýsti við undirritunina yfir mikilli ánægju með þetta samstarf sem án vafa ætti eftir að verða til mikils gagns í starfi skólans. Á meðfylgjandi mynd má sjá Aldísiásamt Hafsteini Davíðssyni og Huldu Katarínu Sveinsdóttur sem undirrituðu samninginn fyrir hönd nemenda.
Að loknu
keppnistímabilinu í fyrra, þegar í ljós kom að Hamar héldi sæti
sínu í 2. deild í knattspyrnu karla, urðu miklar breytingar á
leikmannahópnum og því var ljóst strax í upphafi að nokkurn tíma
tæki fyrir liðið að stilla saman strengi.
Þar sem engin vetraræfingaaðstaða er til staðar í Hveragerði
stundaði liðið æfingar á leiðinlegum tímum á hinum og þessum
gervigrasvöllum í Reykjavík og því helltust margir Hvergerðingar úr
lestinni. Oftast voru þó 6 Hvergerðingar í hópnum, en liðið var
samt að mestu byggt upp af leikmönnum af Reykjavíkursvæðinu.
Úrslit leikja s.l. vetur voru ekkert sérstök og því var viðbúið að
á brattan yrði að sækja í sumar, sem og varð raunin. Liðið var
lengi í gang og eftir fyrri umferðina var liðið einungis með 6 stig
og í neðsta sæti 2. deildar. Samt sáust greinileg batamerki á leik
liðsins með hverjum leik og eftir Verslunarmannahelgi fóru stigin
loksins að týnast inn.
Undir lok keppnistímabilsins magnaðist spennan í botnbaráttunni og
með frábærum endaspretti og gríðarlegri baráttu tókst liðinu að
tryggja sæti sitt í 2. deild með því að fá 10 stig af 12 mögulegum
í síðustu fjórum leikjunum. Þrátt fyrir að liðið væri í botnbaráttu
í allt sumar hætti liðið aldrei að leika skemmtilega knattspyrnu og
áhorfendur á leikjum liðsins voru oftast nokkuð margir og skemmtu
sér vel.
Nýtt og glæsilegt vallarhús við Grýluvöll var mikil lyftistöng
fyrir deildina og hjálpaði til við að byggja upp góða stemningu á
heimaleikjum. Margir lögðu starfinu lið með sjálfboðavinnu og
styrkjum og þakkar stjórn knattspyrnudeildar öllum þeim sem lögðu
hönd á plóginn kærlega fyrir.
Með samstilltu átaki standa vonir til að fleiri Hvergerðingar æfi
og leiki með liðinu á næstu árum, því góður efniviður er til staðar
í yngri flokkum deildarinnar. Má nefna að 3. flokkur karla er
skipaður mörgum efnilegum knattspyrnumönnum. Forsvarsmenn
knattspyrnudeildarinnar eru þess fullvissir að með tilkomu
mjúkhýsisins muni hagur knattspyrnumanna vænkast til muna, því
vetraræfingaaðstaða í bænum er í raun forsenda þess að liðið verði
byggt upp á heimamönnum í framtíðinni.
Valgeir Ásgeirsson, formaður knattspyrnudeildar Hamars
Spurningakeppnin Útsvar mun hefjast í sjónvarpinu 19. september næstkomandi. Hvergerðingar senda lið í keppnina eins og undanfarin ár. Liðið okkar er skipað þeim Heimi Eyvindarsyni, grunnskólakennara og tónlistarmanni, Sigurði Eyþórssyni, framkvæmdastjóra og Svövu Þórðardóttur, lyfjafræðingi. Hvergerðingar mæta liði frá Fjarðabyggð í þætti sem verður á dagskrá sjónvarpsins 3. október næstkomandi.
Við óskum þeim góðs gengis í keppninni.
Áfram Hveragerði !
Myndin er tekin þegar Svava, Heimir og Sigurður komu saman til skrafs og ráðagerðar.
Þjónustumiðstöðin Drift opnar aftur mánudaginn 21. september eftir
gott sumarfrí. Miðstöðin var opnuð síðastliðinn febrúar sem
viðbrögð Hveragerðisbæjar og Rauðakrossdeildar Hveragerðis við
efnahagsástandinu í landinu þar sem fólk í atvinnuleit og aðrir
gátu sótt námskeið, fengið kvatakort í sund og líkamsrækt eða bara
til þess að fá sér heitt kaffi og spjallað við aðra sem í
miðstöðina komu.
Miðstöðin verður aftur starfrækt á mánudögum og fimmtudögum frá
09:00 til 12:00 þar sem sjálfboðaliðar munu taka vel á móti öllum
sem þangað munu koma. Við opnun miðstöðvarinnar þann 21. september
mun Heiðdís Gunnarsdóttir hláturjógaleiðbeinandi halda
klukkustundarnámskeið í hláturjóga frá kl. 09:00 – 10:00 og hvetjum
við alla sem hafa áhuga á þátttöku að mæta og byrja daginn vel,
lyfta andanum og hlægja saman.
Ýmislegt er í boði í Hveragerði fyrir fólk sem er í atvinnuleit.
Golfklúbbur Hveragerðis er með æfingasvæði og púttgrín við
golfskálann í Gufudal sem allir hafa aðgang að, en boltavél er til
staðar þar sem hægt er að kaupa 10 bolta á 100kr. og mun
æfingasvæðið vera opið út september og jafnvel inn í október ef
veður leyfir. Einnig er golfvöllurinn á Hótel Örk opinn öllum að
kostnaðarlausu. Það verður áfram í boði fyrir fólk í atvinnuleit að
sækja kvatakort í sundlaugina og í æfingasal Laugarsport. Að lokum
býður Heilsustofnunin NLFÍ upp á gönguferðir kl 11 á morgnana og
ýmis konar fræðslu um heilsu og líðan.
Að lokum viljum við vekja athygli á því að okkur vantar
sjálfboðaliða til þess að vinna við Drift. Er þetta kjörið tækifæri
fyrir fólk sem er í atvinnuleit til þess að halda sér virku og
einnig fyrir alla sem hafa áhuga og tíma til þess að láta gott af
sér leiða.
Af heimasíðu Grunnskólans:
Í glampandi sól og andvara þann 3. september fóru 1. ,5. og 10.
bekkir saman í gönguferð upp í Hamar að nýrri útistofu
Grunnskólans. Gönguferðin var liður í umhverfisstefnu skólans og
upphafið að myndun vináttutengsla á milli nemenda af öllum stigum
skólans. Þessi tengsl munu vonandi endast alla grunnskólagönguna og
fyrirhugað er að á hverju hausti fari nýr hópur saman í slíka
göngu. Nemendum var raðað í litla hópa á þann hátt að saman voru
börn úr hverjum árgangi. Þannig leiddu 5. og 10. bekkingar nemendur
úr 1. bekk á milli sín. Það var ánægjulegt að sjá hve góð börnin
voru hvert við annað og allir leiddust með bros á vör. Þegar yngstu
börnin urðu þreytt settu stórir og stæðilegir 10. bekkingar þau á
háhest og báru þau áleiðis. Þegar komið var í útistofuna fengu
nemendur það verkefni að hjálpast að við að gróðursetja plöntur sem
Grunnskólanum var úthlutað úr Yrkjusjóði. Að lokinni gróðursetningu
gengu nemendur í sömu hópum heim í skóla.
Gönguferðin tókst einstaklega vel og mun örugglega stuðla að auknum
samskiptum á milli nemenda í skólanum þar sem vinátta, virðing og
tillitsemi er í hávegum höfð.
Erna Ingvarsdóttir
Deildarstjóri yngsta stigs
Fjölmargar fleiri myndir
má sjá hér.
Réttað verður í Ölfusréttum mánudaginn 21. september. Fyrir þá sem ekki þekkja til þá eru réttirnar hér rétt neðan við hringtorgið eða hægra megin við Þorlákshafnarveg. Þó fé hafi mikið fækkað í Ölfusi þá er alltaf gaman að kíkja í réttirnar og sérstaklega þykir yngstu kynslóðinni mikið til koma. Rétt er þó að mæta snemma því það er ekki lengi gert að draga þegar fé er ekki fleira en hér er. Safnið verður komið á sunnudagskvöld en margir gera sér þá ferð niður eftir til að kanna heimtur af fjalli.
Þessi frétt var birt á mbl eftir Ölfusréttir í fyrra.
Hér má sjá myndasyrpu tekna í Ölfusréttum sennilega 1979, heiðurinn af þessum myndum á Sigurbjörn Bjarnason, Bláfelli. Þarna má sjá marga góða, gegna og gengna Hvergerðinga og Ölfusinga.
Ef einhverjir luma á góðum myndum teknum í Ölfusréttum væri
gaman að fá að bæta þeim í safn bæjarins og þá ekki síst ef
einhverjir eiga myndir úr gömlu réttunum sem voru þar sem Hótel Örk
stendur nú.
Skrifað var formlega undir samning milli Hveragerðisbæjar og
nemendur í 7. bekkjum Grunnskólans í Hveragerði í síðustu
viku. Samningurinn felur í sér að nemendurnir hreinsa rusl af
götum bæjarins einu sinni í mánuði og sjá einnig um ákveðin
verkefni tengd Græn fána verkefninu sem nú er unnið hörðum höndum
að innan grunnskólans. Allir nemendur 7. bekkjar
skrifuðu undir samninginn en bæjarstjóri, Aldís
Hafsteinsdóttir, fyrir hönd bæjarins. Elfa Dögg
Þórðardóttir mun hafa yfirumsjón með framkvæmdinni í góðu samstarfi
við umsjónarkennara bekkjanna þær Jóhönnu Ýr Jóhannsdóttur og
Kristínu Örnu Hauksdóttur. Á myndinni má sjá þær Elfu
og Aldísi ásamt Rizzu Katrínu Ranara og Árna Veigari
Gunnarssyni.
Bækurnar eru ætlaðar sem hvatning til lestrar og í þær má skrá bækur sem lesnar eru og hugleiðingar um þær. Kristin Helga Gunnarsdóttir rithöfundur skrifaði skemmtilegan formála og Björn Heimir Önundarson nemandi í Hvolsskóla teiknaði myndir í bókina. Nokkrar konur á Suðurlandi sem eiga það sameiginlegt að starfa á bókasöfnum og vilja stuðla að auknu læsi gáfu lestrardagbækurnar út og Menningarráð Suðurlands styrkti verkefnið þannið að ákveðið var að afhenda sjöundubekkingum á Suðurlandi lestrardagbækur í ár og næstu tvö árin. Þessi árgangur var valinn vegna þess að hann tekur þátt í Stóru upplestrarkeppninni og verður gjöfin vonandi til þess að hvetja nemendur til að lesa mikið og æfa sig vel fyrir keppnina.
Almenningsbókasöfn hafa lestrardagbækur til sölu ef fleiri vilja skrifa hjá sér það sem þeir lesa.
Myndin sýnir nokkra nemendur úr 7. Ö með lestrardagbækurnar sínar.
Kolbrún og Auður Gunnarsdætur sendu bæjarráði nýlega bréf og með því fylgdi ávísun að upphæð kr. 150.000.-. Peningarnir eru gefnirtil minningar um foreldra þeirra systra, hjónin Gunnar Björnsson og Ingimaríu Þorbjörgu Karlsdóttur frá Álfafelli.
Óska systurnareftir því að peningagjöfin verði nýtt til kaupa á
trjám til gróðursetningar á vesturbakka Varmár með tengingu við
listigarðinn á Fossflöt.
Bæjarráð þakkaði systrunum höfðinglega gjöf sem vafalaust mun verða
til þess að efla og auka hið vinsæla útivistarsvæði við Fossflöt.
Bæjarráð fól ennfremur mannvirkja- og umhverfisfulltrúa að sjá um
nánari útfærslu á gróðursetningu á svæðinu.
Afsláttur til námsmanna af persónubundnum íbúakortum í Strætó var samþykktur á fundi bæjarráðs Hveragerðisbæja þann 3. september s.l.
Við framvísun gilds skólaskírteinis í framhalds- eða háskóla og kvittunar f. kaupum á annað hvort 3 eða 9 mánaða persónubundnum íbúakorti fæst 15% endurgreiðsla af kortinu á bæjarskrifstofu Hveragerðisbæjar fyrir námsmenn sem lögheimili eiga í Hveragerði. Með þessu móti lækkar hver ferð í 206 krónur sé miðað við ferðir fram og til baka milli Reykjavíkur og Hveragerðis alla virka daga. Nýti nemarnir kortin umfram þetta til dæmis á kvöldin, um helgar og innanbæjar í Reykjavík þá er verðið pr. ferð orðið umtalsvert lægra. Er af þessu fyrirkomulagi augljós sparnaður fyrir námsmenn og mikið hagræði að auki. Öryggið sem felst í persónubundnu íbúakorti er einnig mikið enda fær notandinn nýtt kort ef hið gamla týnist á meðan að venjulegu kortin og farmiðaspjöldin eru notanda sínum glötuð týnist þau.
Það er von bæjarstjórnar Hveragerðisbæjar að þessi afsláttur verði til þess að enn fleiri nýti sér ferðir Strætós en verið hefur en slíkt er bæði hagkvæmara en ekki síður öruggara heldur en ef farið er á milli á einkabílnum í misjöfnum veðrum.
Námsmenn sem og aðrir eru hvattir til að kynna sér leiðakerfi Strætós á heimasíðunni www.straeto.is en þar má auðveldlega finna út hvernig best er að komast héðan að austan og á leiðarenda í Reykjavík.
Aldís Hafsteinsdóttir
Bæjarstjóri
Á Blómstrandi dögum var í gangi ratleikur alla dagana. Viðkomustaðir voru víða um bæinn þátttakendum til fróðleiks og skemmtunar. Þátttaka var nokkuð góð.
Aldís Hafsteinsdóttir bæjarstjóri dró úr réttum lausnum. Það var hópur Jónu Krútt sem bar sigur úr bítum og óskum við þeim til hamingju.
En hópinn skipuðu þær Soffía og Karólína Stefánsdætur, Snælandi 7, 108 Reykjavík. Þær fá senda viðurkenningu fljótlega.
Kæru Hvergerðingar !
Nú að lokinni bæjarhátíð okkar, Blómstrandi dagar, vil ég þakka íbúum, fyrirtækiseigendum og stofnunum fyrir þátttökuna í hátíðinni og hvað allir voru samtaka í að gera bæinn sem glæsilegastan. Það er alveg ljóst að gestir sem heimsóttu okkur hafa haft með sér heim góðar minningar og magafylli. Bærinn iðaði af lífi og er ómetanlegt hvað margir lögðu hátíðinni lið. "Margar hendur vinna gott verk" á vel við því að bæjarhátíðin yrði nú lítilfjölleg ef samtakamáttur bæjarbúa væri ekki fyrir hendi.
Nú á næstu misserum mun menningar-, íþrótta- og frístundanefnd ákveða hvenær næsta bæjarhátíð verður að ári. Margir höfðu orð á því að hátíðin væri of seint í ár en það hafði líka kosti í för með sér í undirbúningi. Félögin eru byrjuð að starfa og tilbúin til að taka þátt og leggja hátíðinni lið. Skólinn byrjaður og flestir komnir úr sumarfríi en elstu nemendurnir voru góðir starfsmenn sem erfitt hefði verið að ná til ef skólinn hefði ekki verið tekinn til starfa. Ég þakka þeim öllum kærlega fyrir hjálpina.
Sú hugmynd hefur komið upp að bæta við einum lit í viðbót í hvert hverfi. Að rauða hverfið fái líka hvítan lit, bleika hverfið fái gráan (silfraðan) lit og bláa hverfið fái gulan lit. Sendið inn ykkar hugmyndir því að þetta er bæjarhátíð okkar allra en við horfum áfram á menningar- og heilsuhátíð fyrir alla fjölskylduna.
Þúsund þakkir Hvergerðingar, þið eruð öll frábær !
Jóhanna M. Hjartardóttir
menningar- og frístundafulltrúi
jmh@hveragerdi.is
Söngsveit Hveragerðis með frábæra útgáfu tónleika í fyrrakvöld og í gærkvöldi sló Hinn íslenski Þursaflokkurí gegn á fantagóðum tónleikum í kirkjunni. Ígær vareinnig afhjúpað skilti um sundlaugina í Laugaskarði. Njörður Sigurðsson sá um alla textagerð en systkinin sem kennd eru við Laugaskarð, Ester, Þorsteinn og Jóhanna afhjúpuðu síðan skiltið. Á myndunum má sjá Hjartarbörnin við þá athöfn.Í dag kl. 16 verður síðan næsta skilti afhjúpað sem er við elsta hús bæjarins Varmahlíðarhúsið. Að lokinni þeirri athöfn verður húsið opið almenningi til sýnis.
En strax eftir afhjúpun skiltisins í gær fór fram fyrsta brekkuhlaupið af þremur en þá var hlaupið upp Laugaskarðsbrekkuna. Ótrúlega strembið sögðu þeir sem tóku þátt. Á morgun laugardag verður síðan hlaupið í Gossabrekkunnien það er lengsta brekkan í þessu þríhlaupi" helgarinna. Þá mæta allir aftur og vonandi enn fleiri. Á sunnudaginn verður hlaupið upp Laufskógabrekkuna og þá verða veittar viðurkenningar fyrir bestan sameiginlegan árangur.
Í daglaugardag verður aðal fjörið á Blómstrandi dögum og ótrúlega mikið að sjá, skoða og njóta. Dagskránna má finna hér á síðunni. En á heimasíðu bæjarstjórans www.aldis.is má finna myndir frá gærdeginum og vonandi gefst tími yfir helgina til að setja þar inn fleiri myndir.Eftir helgi mun síðan bætast í myndasafnið á síðu Blómstrandi daga.
Nú fer að styttast í bæjarhátíðina okkar Blómstrandi dagar 2009. Nú mega allir íbúar fara að keppast við að skreyta hverfin í rauðum, bláum eða bleikum lit. Veraldarvinir eru að vinna að skreytingum fyrir bæinn sem verða settar upp á föstudag inni í hverfunum.
Ég minni á skrúðgönguna úr hverfunum kl. 21 í Listigarðinn á laugardagskvöldið þar sem allir koma saman og taka lagið, hver með sínu nefi, með Ingó Veðurguði.
Höfum bæinn sem
glæsilegastan þessa daga svo eftir verði tekið.
Nánari upplýsingar
um hverfislitina
hér.
Menningar-, íþrótta- og frístundafulltrúi.
Ratleikur á bæjarhátíðinni, Blómstrandi dagar 28. - 30. ágúst
Þessi bæjarhátíðar-ratleikur verður með Hveragerðisþema.
Viðkomustaðir verða víða um bæinn þátttakendum til fróðleiks og
skemmtunar. Hægt er að leggja af stað frá Sundlauginni í
Laugaskarði, Hverasvæðishúsinu, Listasafninu eða
Bókasafninu.
Í eða á neðantöldum stöðum hanga spurningar í gluggum eða aftan á
skiltum, þannig að hver og einn þarf aðeins að leita. Þið svarið
spurningunum og skilið af ykkur lausnum í ratleikjakassa sem eru
staðsettir á fjórum ofantöldum stöðum og verður dregið úr réttum
lausnum eftir bæjarhátíðina.
Veitingastaðurinn Hoflandsetrið gefur heppnum hópi (hámark 5) pizzamálíð í verðlaun fyrir þátttökuna.
Þátttökublaðið fyrir ratleikinn verður á viðkomustöðunum, sem
eru nefndir hér fyrir ofan, og einnig má prenta það út með því að
smella hér.
Útgáfutónleikar Söngsveitar Hveragerðis verða fimmtudaginn 27.
ágúst í Hveragerðiskirkju kl 20:00.
Aðgangseyrir kr. 1500 og 1000 kr. fyrir eldri borgara.
Tilefni tónleikanna er útgáfa geisladisks, sem söngsveitin hefur unnið og eru tónleikarnir kynning á efni söngdisksins og eru þeir hluti af dagskrá Blómstrandi daga í Hveragerði. Einsöngvarar og undirleikarar, sem eru á geisladisknum koma fram á tónleikunum.
Lagaval er fjölbreytt og gott af innlendri og erlendri tónlist. Öll vinna við diskinn er vönduð og ekki til sparað, margir einsöngvarar og undirleikarar. Stjórnandi söngsveitarinnar er Margrét Stefánsdóttir, og syngur hún einnig einsöng, aðrir flytjendur eru gestasöngvararnir Sigfús Pétursson stórsöngvari frá Álftagerði og Davíð Ólafsson óperusöngvari. Einsöng syngja einnig félagar úr söngsveitinni þau Erna Ingvarsdóttir, Ian Wilkinson, Sæmundur B. Ingibjartsson. Undirleikarar eru Ester Ólafsdóttir á piano og orgel, Guðmundur Pálsson leikur á fiðlu, Ian Wilkinson á básúnu, Stefán I. Þórhallssson á slagverk og Sævar Þór Helgason á gítar.
Upptakan fór öll fram í Hveragerðiskirkju veturinn 2009 og hljóðritun unnin af Studio Sýrlandi.
Söngsveit Hveragerðis hélt tónleika á tíu ára afmæli sínu á Blómstrandi dögum 2008 og er útgáfan í tilefni af þeim tímamótum.
Söngsveit Hveragerðis vonast eftir að sjá sem flesta og eiga ánægjulega stund með ykkur á þessum tónleikum í Hveragerðiskirkju 27. ágúst n.k.
Söngsveit Hveragerðis
Bæjarráð Hveragerðisbæjar, í umboði bæjarstjórnar, hefur
samþykkt tillögu að breytingu á aðalskipulagi Hveragerðis
2005-2017,,Tvöföldun Suðurlandsvegar og aðlögun á landnotkun” ásamt
greinargerð og Umhverfisskýrslu.
Breytingartillagan var auglýst og lá frammi til kynningar á
bæjarskrifstofum Hveragerðisbæjar frá 25. maí til 22. júní
sl.
Athugasemdafrestur rann út þann 6. júlí sl. og bárust 5
athugasemdir. Bæjarráð hefur afgreitt athugasemdirnar og sent þeim
eða fulltrúum þeirra sem þær gerðu, umsögn sína.
Athugasemdir gáfu ekki tilefni til breytinga á auglýstum
skipulagsuppdrætti en tekið var tillit til athugasemda frá
Orkustofnun og Fornleifavernd ríkisins og voru gerðar breytingar á
texta greinargerðar og Umhverfisskýrslu í samræmi við þær
athugasemdir.
Tillagan verður send Skipulagsstofnun, sem gerir tillögu til
umhverfisráðherra um lokaafgreiðslu hennar.
Þeir sem óska nánari upplýsinga um tillöguna og niðurstöðu
bæjarráðs geta snúið sér til skipulags- og byggingarfulltrúa
Hveragerðisbæjar en einnig má finna svör við einstökum athugasemdum
hér.
Bæjarstjóri Hveragerðisbæjar
Menningarganga um Hveragerði – KONUR OG ANDINN
Sunnudaginn 16. ágúst kl. 14
Bókasafnið í Hveragerði og Listasafn Árnesinga efna til
menningargöngu um Hveragerði undir yfirskriftinni KONUR OG
ANDINN
Lagt verður af stað kl. 14 frá Bókasafninu sem er staðsett í
Verslunarmiðstöðinni við Sunnumörk. Göngunni lýkur í Listasafni
Árnesinga með spjalli um yfirstandandi sýningu ANDANS KONUR, París
- Skálholt, en þar eru verk Gerðar Helgadóttur og Nínu
Tryggvadóttur til sýnis.
Á leiðinni munu einstaklingar sem tengjast fjórum skapandi konum,
sem bjuggu í Hveragerði á árum áður, segja frá þeim og verkum
þeirra.Konurnar eru Valdís Halldórsdóttir (1908-2002) rithöfundur
og ritstjóri ásamt því að vera kennari og húsmóðir, Ingunn
Bjarnadóttir (1905-1972) tónskáld meðfram sínum húsmóðurstörfum,
Árný Filippusdóttir (1894-1977 ) hannyrðakona og rak kvennaskóla í
Hveragerði og Ásdís Jóhannsdóttir (1933-1959) ljóðskáld, sem
skrifaði auk þess dagbók með skemmtilegm vangaveltum.
Hlíf Arndal og Inga Jónsdóttir munu leiða gönguna og er verkefnið
styrkt af Menningarráði Suðurlands.
----------------------------------------------------------------------------
Nánari upplýsingar veita:
Hlíf Arndal, gsm: 6918367 6918367 ,
hlifarn@hveragerdi.is eða
Inga Jónsdóttir, gsm: 8951369
8951369 ,
listasafn@listasafnarnesinga.is
Miklar breytingar hafa orðið á hveravirkni í og við Hveragerði í kjölfar jarðskjálftans stóra sem reið yfir Suðurland þann 29. maí 2008. Nýtt hverasvæði opnaðist fyrir ofan bæinn þar sem nú má sjá risastóra bullandi leirhveri, hvæsandi gufuhveri og sjóðbullandi vatnshveri. Allir verandi til vitnis um þá ógnarkrafta sem í náttúrunni búa. Það er sérlega fróðlegt að fylgjast síðan með þróun svæðisins sem er síbreytilegt og því erauðveldlega hægt að hafa ánægju afað heimsækja það aftur og aftur.
Hverasvæðið í miðbænum fór heldur ekki varhluta af breytingum í kjölfar skjálftans en þar minnkaði vatnsmagn verulega strax eftir skjálftann. Vatnsmagn fer einnig eftir grunnvatnsstöðu og því hafa þurrkar sumarsins haft sín áhrif á svæðið. Samt er heilmikið líf á svæðinu og uppá síðkastið hefur Manndrápshverinn verið í miklu stuði. Hann spýtir úr sér með látum á um tveggja tíma fresti að sögn Loryu sem er umsjónarmaður svæðisins í sumar. Íbúar og gestir eru hvattir til að heimsækja svæðið og sjá hvernig hverirnir eru síbreytilegir í okkar nánasta umhverfi. Hér má sjá myndband sem Lorya tók af Manndrápshvernum. Stóra spurningin er síðan hvort þarna sé nokkuð goshver í uppsiglingu ?
Í dag, þann 10. ágúst rennur út skilafrestur vegna þátttöku í sameiginlegum landshlutabæklingi um Suðurland á vegum Markaðsstofu Suðurlands.
Ferðaþjónustuaðilar í Hveragerði eru beðnir um að hafa nú þegar samband viðforstöðumann stofunnar í s.864-7011 864-7011 eða sudur@visir.ishafi þeir áhuga á að vera með í bæklingnum.
Á bæjarhátíðinni Blómstrandi dögum 27. - 30. ágúst næstkomandi verður hannyrðasýning á verkum Árnýjar Filippusdóttur skólastjóra Kvennaskólans á Hverabökkum í Hveragerði. Sýningin verður í húsnæði eldri borgara Þorlákssetri, Breiðumörk 25 í Hveragerði. Sýningin verður opin á laugardag og sunnudag 29. - 30. ágúst frá kl. 14 - 17.
Allir hjartanlega velkomnir
--------------------------------------------
Árný Filippusdóttir (1894-1977) kom mjög við sögu húsmæðrafræðslu hér á landi bæði sunnanlands og norðan um miðja tuttugustu öldina. Hún var frumkvöðull að sérmenntun kvenna á Suðurlandsláglendinu og stofnaði húsmæðraskóla í Hveragerði af litlum efnum og rak sem einkaskóla á annan áratug af mikilli hugsjón. Árný lagði stund á hannyrðir og listir bæði í Danmörku, Þýskalandi og Póllandi í tæpan áratug. Nánari upplýsingar um Árnýju má finna á veraldarvefnum á heimasíðu sem nokkrir nemendur við Háskóla Íslands hafa tekið saman.
Verkefnið Menning, hugvit og handverk í Hveragerði sem hófst 6. Júní á vegum Handverks og hugvits undir Hamri Hveragerði hefur gengið vel. 15 aðilar eru með verk sín til sýnis og sölu í Handmenntahúsi Grunnskólans að Breiðumörk 24 í Hveragerði.
Ráðnir voru tveir aðilar af atvinnuleysisskrá til að vinna að
verkefninu með styrk frá Vinnumálastofnun í samstarfi við
Svæðisvinnumiðlun á Selfossi. Þá fékk verkefnið styrk frá
Menningarráði Suðurlands. Styrkur Hveragerðisbæjar til hópsins var
hvað mestur en hópurinn fékk til afnota Handmenntahúsið sem er í
hjarta bæjarins.
Að starfinu hafa komið ýmsir tónlistarmenn. Opið hús var 23.
júlí síðastliðinn og svignuðu borðin undir glæsulegu handverki
þeirra listamanna sem hafa komið að starfseminni. Fjölbreytt
tónlistardagskrá hljómaði yfir daginn þar sem margir tónlistarmenn
komu fram. Hljómsveitin, Hitakútur, lék órafmagnaða tónlist,
gítarleikarinn Hörður Friðþjófsson kom með gítara til sýnis sem
hann hefur smíðað og spilaði hann fyrir gesti léttar ballöður.
Harmonikkuleikarinn Jón Júlíusson lék á nikkuna og Hara systurnar,
Rakel og Hildur Magnúsdætur, sungu við undirleik Sigurðar Einars
Guðjónssonar. Boðið var upp á vöfflur, kaffi og djús.
Dagurinn tókst í alla staði mjög vel og komu gestir víða.
Verkefnið Menning hefur gefið okkur handverksfólkinu mikið.
Fjölmargir gestir hafa heimsótt okkur í sumar og var áberandi hvað
margir gestir komu erlendis frá. Heimasíðan okkar,
www.handverkgalleri.is hefur fengið fjölmargar heimsóknir og hafa
margar pantanir borist víða að úr heiminum.
Við þökkum öllum fyrir góðar móttökur í sumar og hefur
verkefnið Menning, hugvit og handverk í Hveragerði gefið okkur
góðan grunn til áframhaldandi vinnu og lofað góðu framhaldi sem
vonandi verður næsta sumar.
Handverksmarkaðurinn verður opinn til 9. ágúst í Handmenntahúsi
Grunnskólans að Breiðumörk 24.
Fyrir hönd handverkshópsins
Ármann Ægir Magnússon
Hitakútur að spila fyrir viðstadda
Margmenni á staðnum
Jón Júlíusson harmonikkuleikari.
Hera systur skemmta börnunum
Rakel að máta eitt af handverkunum
Bæjarhátíðin Blómstrandi dagar í Hveragerði
27. - 30. ágúst.
fjölskyldu-, menningar- og heilsuhátíð
www.blomstrandidagar.is
Dagskrá 2009
Undirbúningur er vel á veg kominn og hafa fjölmörg fyrirtæki, stofnanir, félög og einstaklingar lagt sitt af mörkum til að gera bæjarhátíðina, Blómstrandi dagar, sem veglegasta. Blómstrandi tilboð, skemmtidagskrár, sýningar og hreyfing fyrir alla fjölskylduna í boði fyrir bæjarbúa og gesti.
Tónlistin skipar stóran sess á hátíðinni. Opnun hátíðarinnar verður á fimmtudagskvöldinu þegar Söngsveit Hveragerðis heldur tónleika í Hveragerðiskirkju. Þursaflokkurinn verður með tónleika í Hveragerðiskirkju á föstudagskvöldinu og verða einnig tónleikar á Cafe Kidda rót. Síðan mun Hljómsveitin, Í svörtum fötum spila á blómadansleik á Hótel Örk á laugardagskvöldinu. Kjörís verður með veglega afmælishátíð í tilefni af 40 ára afmæli fyrirtækisins. Skemmtidagskrá með tónlistarfólki úr Hveragerði verður á Kjörísplaninu á laugardeginum. Einnig mun verða skemmtun í miðbænum á vegum bæjarins þar sem m.a. tríó Palla Sveins, Kristjana Stefánsdóttir, félagar úr Leikfélagi Hveragerðis o.fl. koma fram.
Fjölbreytt afþreying verður fyrir börnin. Hljómlistarfélag Hveragerðis verður með barna- og fjölskyldutónleika í Þinghúsinu (gamla hótelinu) og Hótel Örk með sundlaugarpartý og grillaðar pylsur. Einnig verða sýningar, þrautir og leikir á vegum íþróttadeilda Hamars og golfklúbbs Hveragerðis. Á Leiksýningin Pína pokastelpa og gömlu góðu leikirnir verða fyrir fjölskylduna á Fossflöt. Einnig verða hoppu- og þrautabrautarkastalar í gangi alla helgina á mismunandi stöðum í bænum.
Heilsutengd dagskrá verður í boði eins og gönguferðir, gangandi leikhús, ratleikur, brekkuhlaup o.fl. Brekkuhlaupin eru hlaupin í þremur brekkum bæjarins, Laugaskarðs-, Gosa- og Laufskógarbrekku og eru veittar viðurkenningar fyrir besta tímann í hverri brekku fyrir sig og síðan fyrir sameiginlegan árangur hjá þeim sem hlaupa öll hlaupin.
Ýmsar sýningar verða þessa daga. Sýningin Andans konur er í Listasafni Árnesinga ásamt fjölskylduleiknum, Gaman saman en þar leysir fjölskyldan þrautir og verður veitt viðurkenning til heppins þátttakenda. Hin Íslenska Landnámshæna verður til sýnis í Hverasvæðishúsinu og geta gestir fengið að sjóða egg í bullandi hver. Í Þorlákssetri, húsnæði eldri borgara verður hannyrðasýning á verkum Árnýjar Filippusdóttur sem var skólastjóri Kvennaskólans á Hverabökkum í Hveragerði.
Markaðstorg verður í Grunnskólanum og verður handverk, heimilisiðnaður, nýtt grænmeti og ýmiskonar heimilisiðnaður til sýnis og sölu.
Litskrúðugar skrúðgöngur úr skreyttum hverfum bæjarins mætast á aðalgötu bæjarins og fara fylktu liði inn á Fossflöt á laugardagskvöldinu. Þar syngjum við saman í brekkunni og horfum á brennu og flugeldasýningu. Ingó mun leiða brekkusöng af sinni alkunnu snilld.
Allar nánari upplýsingar og dagskrá er að finna áheimasíðu hátíðarinnar www.blomstrandidagar.is
Jóhanna M. Hjartardóttir
menningar- og frístundafulltrúi
Nú hafa verið settar á heimasíðuna myndir frá garðyrkju- og blómasýningunni "Blóm í bæ". Á sama stað má einnig sjá myndir teknar í Laugaskarði á þjóðhátíðardaginn 17. júní.
Margir Hvergerðingar eru flinkir myndasmiðir og því þykir okkur öllum afar vænt um þegar þeir hinir sömu eru til í að leyfa fleirum að njóta myndanna. Á myndasíðunni má nú sjá myndir sem meðal annars eru teknar af Ösp Vilberg Baldursdóttur, Guðmundi Erlingssyni, Helga Skúlasyni, Pétri Ingvarssyni, Ármanni Ægi Magnússyni, Kristni Harðarsyni, Magnúsi Hlyni Hreiðarssyni, Guðmundi Þóri Guðjónssyni, Guðmundi Erlingssyni, Páli Guðjónssyni, Aldísi Hafsteinsdóttur og fleirum.
Ef þú lesandi góður átt myndir af mannlífinu hér í Hveragerði sem þú myndir vilja deila með okkur hinum, hafðu þá samband við Huldu Sigurðardóttur (hulda@hveragerdi.is) og hún kemur myndunum í rétt myndasafn.
Myndasöfn bæjarins má sjá hér.
Dóms- og kirkjumálaráðuneytið hefur staðfest nýja lögreglusamþykkt fyrir Hveragerðisbæ og hefur hún því þegar tekið gildi. Er þetta í fyrsta sinn sem bæjarfélagið setur sér lögreglusamþykkt og var slíkt því löngu tímabært.
Með lögreglusamþykktinni er hnykkt á ýmsum málum sem oft geta valdið ágreiningi og því eru íbúar hvattir til að kynna sér samþykktina en hana má lesa hér á heimasíðu bæjarins.
Fimmtíu skátar víðsvegar að úr veröldinni munu mæta til Hveragerðis í dag kl. 13 og dvelja hér á tjaldsvæðinu næstu 4 daga. Er dvöl hópsins hluti af Roverway mótinu sem er alþjóðlegt mót fyrir skáta sem haldið er hér á Íslandi dagana 20.-28. júlí. Fyrstu dagana munu þátttakendur mótsins dreifast í 50 manna hópum um landið en í lokin sameinast allir skátarnir á Úlfljótsvatni. Þátttakendur á Roverway eru rúmlega 3000.
Hópurinn sem dvelur hér í Hveragerðimun vinna undir yfirskriftinni "Boiling flowers". Verður lögð áhersla á jarðhita, hagnýtingu hans, jarðskjálfta og afleiðingar jarðskjálfta. Næstkomandi föstudag mun hópurinn leggja af stað og ganga yfir til Úlfljótsvatns.
Um leið og við bjóðum gestina velkomna í bæinn þá gleðjumst við yfir því að það er útlit fyrir einstaklega fallegt veður í Hveragerði næstu daga. Skátarnir semog aðrir gestir bæjarins munu því eiga góða daga í vændum.
Hér má sjá frétt um setningu Roverway mótsins og á þessari síðu má nálgast