Íþróttamannvirki

Menningar- og frístundafulltrúi er yfirmaður íþróttamannvirkja.

Sundlaugin í Laugaskarði

Laugaskarði
810 Hveragerði
Sími: 483-4113

Börn og ungmenni yngri en 18 ára með lögheimili í Hveragerði eða stunda nám í Hveragerði fá frítt í sund.


Sagan

Sundlaugin í Laugaskarði er 50 metra löng og 12 metra breið og var um langa hríð langstærsta sundlaug landsins. Hún er svokölluð gegnumrennslislaug, hituð upp með jarðgufu, sem tryggir eðlilegt sýrustig og hreinleika vatnsins. Laugin er í skjólsælli hvilft sem veit gegn suðri, norðan Varmár.

Gæslumaður er ávallt á vakt við laugina og auk þess er myndavélakerfi til að auka öryggi sundlaugargesta. Þar er heit, grunn setlaug, heitur pottur með rafmagnsnuddi og náttúrulegt gufubað.

Laugin var byggð í tveimur áföngum, sá fyrri var 25x12 metrar og var tekinn í notkun árið 1938, en síðari hlutinn árið 1945. Í henni æfði íslenska landsliðið í sundi allt til 1966 þegar Laugardalslaugin í Reykjavík kom til sögunnar.

Það var Ungmennafélag Ölfushrepps sem beitti sér mest fyrir því að laugin var gerð og lögðu félagsmenn fram ómælda sjálfboðavinnu. Þeim bættist góður liðsauki þegar Lárus Rist sundkappi fluttist til Hveragerðis árið 1936 og má segja að hann hafi tekið forystu við uppbyggingu laugarinnar og réði meðal annars staðarvali.

Í dag er rekin líkamsræktaraðstaða í sundlauginni af íþróttafélaginu Hamri. Þar er vel búinn lyftingasalur ásamt sal sem nýtist fyrir s.s. spinning, yoga, karlaþrek osfv.

Hveragerðisbær annast allan rekstur og viðhald laugarinnar.

Stöðugildi sundlaugarinnar eru fjögur og hálft.

Upplýsingar varðandi æfingar og mót í sundlauginni má finna á heimasíðu Hamars www.hamarsport.is.

Hamarshöll - Vallarhús, Vorsabæjarvöllum

norðan Hamars
810 Hveragerði
sími 483 1240

Fjölnota íþróttahús með gervigrasvelli, íþróttagólfi og 9 holu púttvelli.

Búnings- og baðklefar eru í vallarhúsi sem er við hliðina á Hamarshöll.

Húsið var byggt árið 2012 og er fjölnota íþróttahöll sem hýsir gervigrasvöll, níu holu púttvöll og fjölnota íþróttagólf í fullri stærð. Stærð íþróttahallinnar er um 5000 m² (104 x 48). Íþróttahöllin er upphituð úr tvöföldum dúk sem er borinn uppi af innri loftþrýstingi og loftþrýstingi á milli ytra og innra lags í útveggjum og þaki. Ákveðið var að skipta við framleiðendur frá DUOL sem bjóða mjög vönduð hús með háum gæðastuðli sem eru með Evróskri vottun samkvæmt EN stöðlum og hafa verið samþykkt af Brunamálastofnun Íslands.

Íþróttafélagið Hamar í Hveragerði hefur afnot af húsinu en einnig er hægt að leigja tíma til iðkunar allt árið um kring. hafið samband við menningar- og frístundafulltrúa í síma 660 3911.

Hveragerðisbær annast allan rekstur og viðhald íþróttahússins.

Íþróttahús Hveragerðis

við Skólamörk
810 Hveragerði
Sími: 483-4348

Stærð íþróttasalarins er 18x33 metrar, áhorfendastæði eru fyrir 240 manns og þar eru búnings- og baðklefar.

Húsið var byggt í tveimur áföngum og var fyrri áfangi tekinn í notkun 1976 en síðari áfangi 1984. Undir hálfu húsinu er kjallari með fjögurra metra lofthæð og þar er nú félagsmiðstöð með æfingaaðstöðu fyrir hljómsveitir. Lægri kjallari undir hinum helmingnum er nýttur sem geymsla.

Grunnskólinn í Hveragerði hefur afnot af húsinu á skólatíma til íþróttakennslu. Að skóla loknum hefur Íþróttafélagið Hamar afnot af húsinu og þar fer fram fjölbreytt íþróttastarf á vegum Hamars.

Hveragerðisbær annast allan rekstur og viðhald íþróttahússins.

Stöðugildi við íþróttahúsið eru þrjú og hálft.

Upplýsingar varðandi æfingar og mót í íþróttahúsinu má finna á heimasíðu Hamars www.hamarsport.is.

Íþróttavellir Hveragerðis

Grýluvöllur
norðan Hamars
810 Hveragerði

Grýluvöllur er aðalleikvangur meistaraflokks Hamars í knattspyrnu. Hann er 105m x 65m að stærð, grasstúka er fyrir áhorfendur

Æfingavöllur

sunnan Hamars
810 Hveragerði

Æfingavöllurinn er 110m x 65m að stærð, þar fara fram flestar æfingar og mót fyrir yngri knattspyrnu iðkendur Hamars.

Golfklúbbur Hveragerðis annast slátt, sáningu, söndun og áburðargjafir.

Hveragerðisbær annast allan rekstur og viðhald íþróttavalla.

Upplýsingar varðandi æfingar og mót á völlunum má finna á heimasíðu Hamars www.hamarsport.is.