Góð heimsókn á bæjarskrifstofu

skrifað 23. apr 2018
IMG_7417IMG_7417

Stutt til vina minna, rólegur bær, get hjólað í skólann, gaman í íþróttum var á meðal þess sem kom fram hjá nemendum í 2.bekk Grunnskólans þegar þau heimsóttu bæjarstjóra í liðinni viku.


Árlega hafa nemendur í 2. bekk við Grunnskólann í Hveragerði heimsótt bæjarstjóra og bæjarskrifstofuna. Er heimsóknin liður í verkefni um Hveragerði og nærsamfélagið en krakkarnir heimsækja einnig fyrirtæki, söfn og aðrar stofnanir í bænum. Þannig fræðast þau um bæinn sinn og mannlífið sem hér er, en einnig um umhverfi og sögu bæjarins.

Á bæjarskrifstofunni var haldinn fundur í fundarsal bæjarstjórnar með hinum ungu nemendum þar sem bæjarstjóri fór yfir ýmsar athyglisverðar staðreyndir varðandi bæjarfélagið. Einnig komu nemendurnar með ábendingar um það sem betur mætti fara auk þess sem þau sögðu frá því sem þau eru ánægð með. Voru nemendurnir til mikillar fyrirmyndar og höfðu skemmtilegar skoðanir á því sem rætt var um.

Að lokum fengu nemendurnir veitingar áður en farið var í skoðunarferð um skrifstofuna og meðfylgjandi myndir voru teknar af hópunum

IMG_7427