Senn koma jólin

skrifað 20. nóv 2017
Jólatré bæjarins verður í SmágörðunumJólatré bæjarins verður í Smágörðunum

Jólaundirbúningur í Hveragerðisbæ

Hið árlega jóladagatal Hvergerðinga, Jól í bæ, er tilbúið og verður borið út til bæjarbúa í lok vikunnar en þar eru upplýsingar um alla þá viðburði sem verða í boði í kringum jólahátíðina. Starfsmenn áhaldahúss eru í óðaönn að setja upp jólaseríur og jólaljósin í bænum farin að ljóma. Jólahátíðin „Jól í bæ“ er samstarfsverkefni allra sem í bænum búa og leggjum við metnað í að gera bæinn okkar sem hátíðlegastan með jólaljósum og skreytingum.
Jólapeysudagur okkar Hveragerðinga verður 15. desember og væri gaman að sem flestir taki fram jólapeysurnar eða setji jólaskraut á peysu þennan dag.

Jólaljósin tendruð á jólatré bæjarins

Fyrsta sunnudag í aðventu þann 3. desember verða jólaljósin tendruð á stóra jólatrénu í Smágörðunum. Skátafélagið Strókur býður upp á heitt kakó í skátaheimilinu og munu jólasveinar úr Reykjafjalli fá bæjarleyfi hjá Grýlu. Einnig syngur skólakór grunnskólans undir stjórn Dagnýjar Höllu. Um kvöldið verður aðventukvöld í Hveragerðiskirkju.

Jólagluggar

Undanfarin ár hafa fyrirtæki og stofnanir skreytt sérstaka dagatalsglugga og er opnaður einn gluggi á dag í desember fram að jólum. Hver gluggi er skreyttur með ákveðnu þema tengt jólum og er jólabók við hvern glugga sem útskýrir táknið. Fjölmargir hafa lagt leið sína um bæinn að skoða gluggana og tekið þátt í jólaratleiknum. Það var Guðrún Tryggvadóttir hjá Náttúran.is sem er hugmyndasmiður jólabókanna og hafði hún veg og vanda að hönnun táknanna og textanum sem fylgja hverju tákni. Fleiri viðburðir tengdir jólum verða kynntir síðar, sjá http://hveragerdi.is/

Eigið ánægjulegar stundir við undirbúning jólanna

Jóhanna M. Hjartardóttir
menningar- og frístundafulltrúi